“Би залбирлаа давталт багатай, утга төгс болгохын тулд юу хийж болох вэ?”

Заримдаа бид залбирахдаа зөвхөн өөрсдийнхөө тухай, өөрсдийнхөө хүсдэг зүйлийн тухай л боддог. Үүнээс үүдээд, надад, бид чинь амин хувиа хичээдэг хүмүүс үү гэсэн бодол төрдөг. Бусад хүмүүс, тэдний хэрэгцээний талаар бас бодож бай. Адислал бүрээ тоолж, энэхүү адислалуудын төлөө Тэнгэрлиг Эцэгт таларх. Залбирал бол зөвхөн бидний хүсэлт, гачигдал зовлонг Тэнгэрлиг Эцэг сонсохын төлөө биш, бас бид Түүнийг сонсохын төлөө юм. Хэрэв бид хүсч байгаа юмаа хам хум дуржигнуулчихаад, орондоо харайгаад орчихвол, яаж илчлэлт хүлээж авах вэ дээ? Тэнгэрлиг Эцэг биднээр юу хийлгэхийг хүсч байгааг асуу. Тэгвэл чи улам сайн хүн болно.

Ямар юманд өөрөө хамгийн их талархалтай байгаагаа, бас амьдралд чинь юу хамгийн их хэрэгтэй байгааг бодох цаг гарга. Сүнс чамайг удирдаж, хариулт болон зөвлөмжүүд нь тодорхой санаа, бодол, өдөөлтийн хэлбэрээр ирдэг. Эдгээр санаа, бодлуудыг ирээдүйд ашиглахын тулд тэмдэглэлдээ бичин хадгалж болно.

Би орой залбирахдаа, судруудаас юу уншсанаа боддог. Би ямар зөв зүйл хийснээ, цаашид юуг сайжруулах хэрэгтэй байгааг санахыг хичээдэг. Тэр өдөр тохиолдсон бэрхшээлийг даван туулахад туслахыг Тэнгэрлиг Эцэгээс гуйж болно. Зөвлөгөөг нь үргэлж санахад тусалж, үүнийг дагах хүч чадлыг надад өгөхийг Тэнгэрлиг Эцэгээс гуйдаг. Өдөр бүр өөр байдаг болохоор, бидэнд тогтсон зуршил байлаа ч гэсэн, өөр өөр зүйл ямагт тохиолдох болно. Ийм учраас, бид өнгөрсөн өдрийн тухай тунгаан бодох юм бол, хүсэх болон талархал илэрхийлэх юмс өөр өөр байх болно.

Ганцаараа байж, чангаар залбирч болох цаг, газрыг ол. Чангаар залбирах үед залбирал чинь илүү хувийн шинжтэй, илүү утга төгс сонсогддог. Ингэвэл хоосон давталтаас зайлсхийх, оюун ухаанаа төвлөрүүлэхэд амар байдаг. Ийм залбирал үнэхээр Тэнгэрлиг Эцэгтэй ярилцаж байгаа юм шиг байдаг.

Их Эзэнд итгэх болон Түүнтэй харилцах харилцааныхаа чанарыг дээшлүүлэх хэрэгцээг мэдэрсэн үедээ хүсч байгаа зүйлийнхээ тухай бодож, тэгээд залбирахаар өвдөг сөгд. Тэнгэрлиг Эцэгийг өөрийнхөө аав гэж төсөөлөн бодоод аавтайгаа ярьж байгаа юм шиг ярь. Мэдэрч байгаа бүхнээ Түүнд хэл. Зүрх сэтгэлээ нээн, чин үнэнээсээ ярь. Түүнд итгэ, Түүнд талархлаа илэрхийл, Түүнээс уучлал гуй, Түүнтэй нөхөрлөхийг эрхэмлэж, хайраа Түүнд илэрхийл, тэгээд дараа нь хариуг чих тавин сонс.

Урьдаас төлөвлөж, бүр хэдхэн минутанд ч гэсэн багтаагаад бодол санаа, хамгийн чин сэтгэлийн хүслээ дотроо тоймлон бодох юм бол чи Тэнгэрлиг Эцэгтээ хандан хэлэх үгс дээр илүү их анхаарал төвлөрүүлнэ. Гэр бүл, төрөл төрөгсдийнхөө тухай, бас өөрийн чинь залбирал хэрэгтэй байж болох бусад хүмүүсийн тухай бод. Тусламж, удирдамж, хамгаалалт хэрэгтэй олон хүн байдаг.

Адислал бүрийг онцгойлон авч үзэж, нарийн тодорхой залбирснаар “Өнөөдөр сайхан өдрийг өгч намайг адислаач” гэх юм уу “Бусад хүмүүст сайн үлгэр дуурайл үзүүлэх шийдвэр гаргахад намайг удирдана уу” гэх мэтийн улиг болсон загварыг өөрчилж чадна. Адислал бүрийг тусад нь авч үзэн, тодорхой зүйлд анхаарал хандуулсан залбирал зүрх сэтгэлд чинь ойр дотно юм. Учир нь ийм залбирал зорилгоороо Христийнхтэй илүү адилхан болдог.