ʻOku ou fiefia moʻoni ʻi hono maʻu mai ʻo e Liahoná ʻi he māhina takitaha. ʻOku ʻomi ai ha ngaahi fakamatala mahuʻinga kau ki he founga ke tau moʻui ʻakí. ʻOku ou fakamālō ki he ngaahi makasini ʻo e konifelenisí ʻoku ʻomi ai e ngaahi pōpoaki mei he palōfitá mo e kau taki kehe ʻo e Siasí, ʻo u ako ai e meʻa ʻoku finangalo e Tamai Hēvaní ke tau faí mo e founga ke fai ʻaki iá. ʻOku ʻi he ngaahi makasiní ha ngaahi pōpoaki fakaʻofoʻofa ke fakaʻaongaʻi ʻi heʻetau ngaahi efiafi fakafāmili ʻi ʻapí. Ko e ʻuluaki meʻa pē ʻoku ou kumi ʻi he Liahoná ko e ngaahi fakamatala ko ia maʻá e toʻu tupú, pea ko e taimi kotoa pē ʻoku ou lau ai ʻení, ʻoku ou ongoʻi malu mo toe ofi ange ai ki he Tamai Hēvaní.

ʻOku ou fakaʻaongaʻi e Liahoná ke hoko ko ha fakahinohino ʻi heʻeku moʻuí. ʻOkú ne ʻai ke tau vakai ki he moʻui ʻa e kakai ʻi onopōní pea tau vakai ki heʻetau moʻuí ʻi he ngaahi tūkunga tatau pē. ʻOku ou fakaʻaongaʻi foki e ngaahi meʻa kuo nau aʻusiá ʻi heʻeku ngaahi leá mo e efiafi fakafāmili ʻi ʻapí. Naʻe tokoni foki e ngaahi sīpinga ʻi he Liahoná ki haku kaumeʻa ʻo mahino ai kiate ia ko ha kakai Kalisitiane kitautolu, pea neongo ʻoku tau fehangahangai mo e ngaahi palopalemá ʻo hangē ko ia ʻoku hoko ki he kakai kotoa, ka ʻoku ʻomi ʻe he ongoongoleleí ʻa e mālohi kiate kitautolu ke lavaʻi ia.