Naʻe Fonu Homau Lotó ʻi he ʻOfa Faka-Kalaisí

Hangē naʻe fakaʻau ke toe vāmamaʻo ange e feohi ʻeku ongo tamaiki fefine taʻu 8 mo taʻu 10. Naʻe mamahi hoku lotó, ko ʻena faʻeé, heʻeku sio ki heʻena fekeʻikeʻí mo ʻena faʻa fesiofaki ʻitá.

Ne u lotu fakamātoato ki he ʻEikí lolotonga e taimi ko ʻení ke tokoniʻi au ʻi hoku ngaahi vaivaí. Naʻá ku lotu ke Ne tokoniʻi au ke u ako ʻa e meʻa naʻe fie maʻu ke u ʻiloʻi fekauʻaki mo e ʻofa faka-Kalaisí, pea naʻe tataki au ke u lau ha ngaahi potufolofola fakaʻofoʻofa.

ʻI he pō ʻe taha naʻe aʻu e meʻa naʻe fai ʻe heʻeku ongo tamaikí ki he ngataʻanga ʻeku kātakí. Naʻá ku ʻita ʻo kaikaila mo tafuluʻi kinaua peá u hū fakaʻita ki tuʻa ke u kiʻi fakamokomoko hifo mo fakakaukau. Hili pē ha ngaahi miniti siʻi kuo kamata ke fakamolū ʻe he Laumālié hoku lotó, ʻo ne ueʻi au ke u ʻalu ki fale ʻo kole fakamolemole ki heʻeku taʻahine lahí he ko ia naʻe fuʻu tō atu ki ai hoku ʻitá.

ʻI heʻeku hū ki he lokimohe ʻeku taʻahine taʻu 10, ne u sio atu ʻokú ne tūʻulutui pē mo tangi ʻi hono veʻe mohengá. Naʻá ne sio hake kiate au mo mokulu pē hono loʻimatá, peá ne pehē mai, “ ʻOku ʻikai te u ʻiloʻi e meʻa ke faí.” Naʻá ne talamai ʻene fie lotu mo lau ʻene folofolá ke ne ongoʻi sai, ka naʻe ʻikai lava ʻeni koeʻuhí naʻá ne ongoʻi taʻetaau.

ʻI heʻene talamai ʻene ongoʻi halaia ʻi he meʻa naʻá ne fai ʻi heʻemau keé peá ne talamai naʻá ku tonuhia pē aú, naʻá ku ongoʻi ngalivale ʻaupito. Naʻá ma talanoa peá ma fakaava hake e folofolá ʻo u lau kiate ia fekauʻaki mo e ʻofa faka-Kalaisí, “ ʻa e ʻofa haohaoa ʻa Kalaisí” (Molonai 7:47), mo ma vahevahe ha niʻihi ʻo e ngaahi meʻa kuó u akó. Ne fakasio ange ki loki hono tehina siʻisiʻí he taimi ko iá, peá ma fakaafeʻi ia ke hū ange. Naʻá ku fakamatalaʻi ange leva ki ai e meʻa naʻá ma lau ʻo kau ki he ʻofa faka-Kalaisí ʻi ha ngaahi lea ʻe lava ke mahino ki ha tokotaha taʻu valu.

ʻI he ʻosi ʻeku fakamatalá, naʻe hanga mai e ongo tamaikí kiate au pea naʻe hā mei hona fōtungá ʻa ʻena fakaʻamu ke fakafonu kinaua ʻaki ʻa e ʻofa maʻongoʻonga ko ʻeni ʻoku lau ki ai ʻa e folofolá. Naʻa mau tūʻulutui hifo leva ʻo kole ki he Tamaí ʻi he loto fakatōkilalo, hangē ko e faleʻi ʻa Molomoná, ke fakafonu kimautolu ʻaki ʻa e ʻofá ni (vakai, Molonai 7:48).

Naʻa mau ongoʻi e Laumālié, pea mau fetāngihi. Naʻa mau tuʻu hake ki ʻolunga, fāʻofua, mo fakahā ʻemau feʻofaʻakí. Ne u mamata ʻi he momeniti ko iá ki he kamata ʻalu hake ha ongo fakatokoua mo ha anga fakakaumeʻa taʻengata ʻi he vahaʻa ʻo ʻeku ongo tamaiki fefiné, pea naʻá ku ongoʻi fiemālie.

Talu mei ai mo e hokohoko atu e tupulaki hona vaá. Naʻe lahi ange ʻena fakaʻamu ke fakaleleiʻi ʻena ngaahi taʻe femahinoʻakí, fakahā ha kātaki ʻoku lahi angé, mo vahevahe ʻa e ngaahi meʻa naʻá na maʻú. ʻOku ou fakamālō ʻi he ngaahi holi māʻoniʻoni ʻi hona lotó mo e ngaahi feinga naʻá na faí.

Te u tukulotoʻi maʻu pē ʻa e meʻa ko ia naʻe hokó, pea ʻoku ou lotua ʻe lahi ange haʻane toe hoko ha ngaahi meʻa tatau lolotonga ʻoku hokohoko atu ʻeni ʻemau fakamālohia e ngaahi haʻi ʻo e ʻofa faka-Kalaisí mo e ʻofá ʻi homau ʻapí.