Ko e Tokotaha ʻAʻahi Pulipuliá

Naʻe vave e tā e mafu ʻo Sūliá ʻi heʻene fakasiosio atu ki he loki naʻe ʻikai ha tahá. Naʻe tatau tofu pē ʻa e loki Palaimelí mo hono ngaahi sea kuo fokotuʻutuʻu fakafuopotopotó mo e palakipoe naʻe efuá pea mo e loki Palaimeli ʻi hono uōtí. Ka naʻe ongoʻi ʻe Sūlia ʻoku faikehe hono keté heʻene hū atu he matapaá. Mahalo naʻe hā tatau pē ʻa e ngaahi meʻa aí, ka naʻe ʻiloʻi ʻe Sūlia naʻe ʻikai tatau. ʻI he ʻaho ní, ko ha tokotaha ʻaʻahi pē ia.

Naʻe tangutu hifo ʻa Sūlia ʻi he sea mamaʻo taha mei he matapaá. Naʻá ne fiefia ʻi he meʻa kotoa pē fekauʻaki mo e ʻaʻahi mai hono fāmilí ke feʻiloaki mo kinautolu naʻá ne tokoua ʻakí mo ʻene ongo kuí, tuku kehe pē ʻene hoko ko ha tokotaha ʻaʻahi ʻi ha uooti kehé. Naʻe fakaʻofoʻofa e ngaahi hiva Palaimelí ia mo e ako kau ki he Fakamoʻuí, ka naʻe ʻikai te ne saiʻia ʻi he tangutu toko taha mo ʻikai maheni mo ha tahá.

Naʻe ʻikai foki ke saiʻia ʻa Sūlia he fanongo ki he talanoa mo e kakata ʻa e tamaiki kehé kae ʻikai ke nau sio ange ki aí. Hangē ne ʻikai tokanga ange ha taha ia pe ʻokú ne ʻi ai pe ʻikai. Hangē naʻe ʻikai lava ha taha ia ʻo sio kiate iá—ko Sūlia ko e tokotaha ʻaʻahi fakaofo naʻe ʻikai lava ha taha ʻo sio ki aí!

Naʻe ngāngāhi pē ʻe Sulia hono ongo foʻi fī kelokelo loloá mo fakaʻamu naʻá ne ʻi hono uōtí mo ʻene faiako Palaimeli ko Sisitā Sohanisoní, pea mo hono kaungāmeʻa lelei tahá, ʻa ʻAna. Naʻá ne pehē loto pē, “Mahalo ʻe kehe ʻeni,” peá ne ʻai fakalelei hono matasioʻatá pea toe fakatokalelei hono pivá. “Mahalo te u lava ʻo ʻai ke kehe kapau te u feinga mālohi.”

Naʻe ʻohovale ʻa Sūlia he ava ʻa e matapaá. Naʻe hū mai ki he lokí ha tamaiki fefine ʻe toko tolu ʻoku nau talanoa fiefia. Naʻe hoko mai ai ha ongo tamaiki tangata. Naʻe ʻai e fuʻu mānava ʻa Sūlia mo malimali fakamālohi pē.

Naʻá ne pehē ange, “Mālō e lelei!” Naʻe fakafokifā e sio ange ʻa e tokotaha kotoa ki ai. Naʻe kula e mata ʻo Sūliá.

Naʻe pehē ange ha taha ʻo e tamaiki fefiné, “Mālō e lelei.”

Naʻe fehuʻi ange ʻe ha taʻahine kehe, “Ko hoʻo haʻu foʻou?”

Naʻe pehē ange ʻe Sūlia, “ ʻIkai, ko ʻeku ʻaʻahi mai pē ki heʻeku kuí.”

“ ʻIo.”

Naʻa nau takitaha fili honau sea. Naʻe puli e malimali ʻa Sūliá ʻi heʻene fakatokangaʻi naʻa nau tangutu ʻi he ʻū seá kotoa tuku kehe pē sea ʻi hono tafaʻakí. Hala ʻatā ke lea ha taha kia Sūlia. Naʻá ne siofi pē hono nimá. Naʻá ne fakakaukau, “Ko e tokotaha ʻaʻahi fakaofo au he ʻoku ʻikai lava ha taha ia ʻo sio ki ai.” Naʻe tafe hifo ha loʻimata ʻi hono kouʻahé.

Hili ha uike ʻe taha mei ai, naʻe fiefia ʻa Sūlia ʻi heʻene lue atu ki he lotú. Meʻa fakalata moʻoni ʻete foki ki ʻapí! ʻI heʻene hū atu ki hono lokiakó, kuo ʻosi ʻi ai ʻa ʻAna ia.

Naʻe pehē ange ʻe ʻAna, “Sūlia, mālō e lelei! ʻOku ou fiefia hoʻo foki maí!”

Ne tangutu hifo ʻa Sūlia he tafaʻaki ʻo ʻAná. Taimi siʻi pē kuó na talanoa mo kakata. Ko e kamata fakamatala ia ʻe Sūlia kia ʻAna ʻene nofo uike taha mo ʻene kuí mo e ʻasi hake ha taʻahine lōloa, sino siʻi mo ʻulu kelo ʻi he matapaá. Naʻe sio atu ʻa Sūlia ki he nofo hifo ʻa e taʻahiné ʻi he sea mamaʻo taha mei he matapaá, ʻo ne tangutu toko taha pē.

Naʻe fakakaukau ʻa Sūlia, “Pau pē ko haʻane ʻaʻahi mai. Masiʻi, ʻoku ou fiefia ʻoku ʻikai ko au ia!” Naʻe sio hake e taʻahiné ʻo hanga takai pea toe sio pē ki hono nimá. Naʻe ʻikai ongoʻi fiemālie ʻa Sūlia ʻi he ʻikai ha taha ʻe lea ki aí. Naʻá ne fakakaukau ʻo pehē, “Fakaʻamu ange ʻe au naʻe ʻikai ko ha meʻa faingataʻa ʻete hoko ko ha tokotaha ʻaʻahí. ʻOku totonu pē ke kehe ʻeni ia!” Naʻe foki ʻene manatú ki he Sāpate kuo ʻosí peá ne manatuʻi ʻene loto-mamahi ʻi he ʻikai fakatokangaʻi ia ʻe ha tahá. Naʻe kemo hono matá. ʻOua leva angé—te ne ʻai ke kehe ʻeni!

Naʻe tuʻu hake ʻa Sūlia. Naʻá ne malimali mo pehē ange, “Mālō e lelei.” Naʻá ne lue hake ʻo tangutu he sea hoko atu ki he taʻahiné. “Ko hoʻo ʻaʻahi pē he ʻaho ní?”

Naʻe mataʻi ʻohovale e taʻahiné heʻene sio haké, pea toki mata fiefia leva. “ ʻIo, ʻoku ou ʻaʻahi mai ki hoku mehekitangá. ʻOkú ke ʻaʻahi mo koe?”

Naʻe kalokalo ʻa Sūlia. Naʻá ne talaange, “ ʻIkai, ka ʻoku ou ʻilo e ongo ʻokú ke maʻú. Ko hoku hingoá ko Sūlia. Ko hai ho hingoa ʻoʻoú?”

“Ko ʻEla.”

“Te ke fie haʻu ʻo nofo fakataha mo au mo ʻAna?”

Naʻe mamali ʻa ʻEla mo kamo ange. ʻI he foki atu ʻa e ongo tamaikí ni ki he tafaʻaki ʻe taha ʻo e lokí, naʻe maʻu ʻe Sūlia ha ongo māfana ʻi hono lotó. Naʻá ne fakakaukau, “ He ʻikai te mau tuku ke ʻi ai ha kau ʻaʻahi heni ʻe taʻe tokanga! Te u fakapapauʻi ʻe ʻikai hoko ia!”