Ne u Moʻui Kakato ʻAki Nai e Ongoongoleleí?

Kuo pau ke fakatatali ʻeku ako folofolá. Kuo ʻosi ʻā kotoa ʻeku fānau tangata ʻe toko tolú—pea naʻe hengihengia ange ia ʻi honau taimi ʻā angamahení. Naʻe tangi mai ʻa Kateni mei hono kiʻi moheʻangá, ko e siʻi tahá ia pea naʻe māhina 18. Naʻá ku hū atu ki hono lokí ʻo ʻilo he taimi pē ko iá ʻoku puke.

Naʻe kamata pē ʻaho Mōnité mo e taulōfuʻu mai e ngaahi meʻa kehekehé. ʻI ha ʻosi atu pē ʻeku fetongi e vala ʻo Katení mo feinga ke fafangaʻí, kuó ne tekeʻi ʻe ia ki lalo ha foʻi hina sioʻata ʻo mahua e soosi ʻāpelé ʻi he falikí kotoa pea moefe takai e sioʻatá ʻi peito. ʻI heʻeku fakamaʻa iá, naʻá ku fakakaukau ki he ngaahi meʻa kotoa ko ia naʻe ʻikai ke lava ʻo faí: ʻa e hisitōlia fakafāmilí, ngāue tokoní, ngaahi meʻa ke ngaohi mo tauhi ʻi ʻapí, ngāue fakafaifekaú.

Ne u fifili ai, “ ʻE lava fēfē ke u fai e meʻa kotoa ko ia ʻoku ou ʻiloʻi ʻoku totonu ke u faí lolotonga iá ʻoku ʻikai mei lava hoku ngaahi tefitoʻi fatongia fakaʻahó?” ʻI heʻene aʻu ki he efiafí naʻá ku ongosia, ka ne u tuku ki tafaʻaki e ngaahi fakakaukau fakatupu lotosiʻí lolotonga e taimi kaí, efiafi fakafāmili ʻi ʻapí, mo e taimi kaukauʻi mo fakamohe ʻo e tamaikí.

Faifai pea mohe e fānaú, peá u nofo hifo leva ʻo fai e meʻa naʻe ʻikai ke u lava ʻo fai kimuʻa he ʻaho ko iá. Naʻá ku toʻo hake ʻa e Ensign ʻo Mē 2006 ʻa ia naʻe fakaava hake ki he lea ʻa Palesiteni Henelī B. ʻAealingi ko e “Hoko ʻo Tatau mo ha Tamasiʻi Siʻi.” Ne u sio hifo ki hano konga ne u ʻosi fakaʻilongaʻi kimuʻa: “ ʻE fie maʻu ha loto fakapapau, feinga, mo ha loto tui ke pukepuke ʻaki ʻi hotau lotó e tāpuaki ʻo e liliu ko ia [ʻo hotau ʻulungāangá]. Naʻe akonaki e Tuʻi ko Penisimaní ki ha niʻihi ʻo e ngaahi meʻa ko ia ʻe fie maʻu ke faí. Naʻá ne pehē kuo pau ke tau fafanga ʻa e fiekaiá, fakakofu ʻa e telefuá, ʻaʻahi ki he mahakí mo tokoniʻi fakalaumālie mo fakatuʻasino e kakaí, kae lava ke tau maʻu fakaʻaho e fakamolemole ʻo ʻetau angahalá” (Liahona mo e Ensign, Mē 2006, 17).

Ne u toe ongoʻi pē he taimi ko ia naʻe ʻikai te u moʻui kakato ʻaki e ongoongoleleí. Ne u fifili ʻo pehē, “ ʻE lava fēfē ke u fafanga ʻa e fiekaiá, fakakofu ʻa e telefuá, ʻaʻahi ki he mahakí mo tokoniʻi fakalaumālie mo fakatuʻasino e kakaí lolotonga ia ʻoku ʻikai te u lava ʻo tokangaʻi hoku fāmili ʻoʻokú?”

Ko e taimi ia naʻá ku ongoʻi ai ʻoku tali fiemālie pē ʻe he ʻOtuá ʻa e ngāue naʻá ku faí. Naʻe mahino lelei ʻaupito mo lava ke u sio ki ai ʻo u ʻiloʻi kuo pau ke u hiki ia ʻi ha pepa ke ʻoua naʻa ngalo ʻiate au. Naʻe lava ke u sioloto atu ʻi hoku ʻatamaí ki he ngaahi meʻa naʻá ku fai ʻi he ʻaho ko iá—ko e ʻaho kakato ʻo hono fafanga ʻo e fiekaiá, fai e foó ke fakakofu ʻaki ʻa e telefuá (naʻe tuʻo lahi ʻeku fetongi e vala ʻo Katení), tokangaʻi ʻema kiʻi pēpē naʻe puké, tokoni ki heʻema kiʻi tamasiʻi taʻu nimá ki hono teuteuʻi e lēsoni efiafi fakafāmili ʻi ʻapí fekauʻaki mo e ngāue fakafaifekaú, pea aleaʻi mo hoku fāmilí ʻa e mālohi ʻo e faʻifaʻitakiʻangá—ʻi hono fakalea ʻe tahá, ko hono tokoniʻi fakalaumālie mo fakatuʻasino e kakaí.

Naʻe mālohi pehē fau ʻeku maʻu e ongoʻi nongá ʻo u ʻilo ai ko hono talamai ia ʻe he ʻEikí kuó Ne tali ʻeku ngāué. ʻI heʻeku tokangaʻi hoku fāmilí, ko ʻeku fakahoko ia ʻo e ngaahi naʻinaʻi ʻa e Tuʻi ko Penisimaní mo Palesiteni ʻAealingí.