Ko Hono Akoʻi Haku Kaumeʻa

Ne u ʻalu mo ha fānau kalasi nima mo e ono kehe ʻi ha meʻa fakaako ʻaho ʻe ua ki ha feituʻu ʻe taha ke mau ako ki he anga e moʻui ʻi he kuonga muʻá. Ne u loki fakataha mo ha toko tolu ʻo hoku kaungāmeʻá ʻi ha mōtele. Naʻe maʻu hake ʻe ha taha ʻo hoku ngaahi kaumeʻá ha Tohi Tapu ʻi he toloá. Naʻá ne huke hake ki ha ngaahi peesi peá ne kole mai ke u tokoni ange ke ne lau ia. Naʻá ku ofo ʻi he ʻikai te ne ʻiloʻi ha taha ʻo e ngaahi talanoa ʻi he Tohi Tapú. Ne u pehē ʻe au kuo ʻiloʻi ʻe he tokotaha kotoa pē. Naʻá ku akoʻi kiate ia ʻa e Fakatupú, ʻa ʻĀtama mo ʻIvi, mo e Toetuʻú. Naʻá ku fakamatala ange foki ʻo kau kia Siosefa Sāmita. Ne u talaange ki ai ha niʻihi ʻo e ngaahi talanoa ne u ako ʻi he Palaimelí.

Hili iá, naʻá ku ongoʻi pē ʻoku totonu ke fai haʻama lotu. Naʻá ku tuku ke lotu hoku kaumeʻá. Ne u tokoni kiate ia ʻaki ʻeku lau tahataha ange pē ha kupuʻi lea peá ne toki angimui ki ai. Naʻá ku maʻu ha ongo māfana, pea naʻe pehē ʻe hoku kaumeʻá naʻá ne ongoʻi fiefia ʻaupito.

Naʻe ʻikai te u teitei ʻamanaki ʻe hoko ia ʻi ha ʻalu fakaako peheni. Naʻá ku fiefia ʻi he maʻu e faingamālie ke u hoko ai ko ha faifekau, kuó u ʻosi mateuteu pea naʻe ʻikai te u manavahē ke vahevahe mo e niʻihi kehé ʻa e ngaahi meʻa naʻá ku tui ki aí.