Ko Ha Ngaahi Meʻa Fakaʻofoʻofa ʻi he Kahaʻú

ʻOku ʻi ai ha taha ʻoku kei ʻā?” ʻI heʻeku fuofua ʻeké, naʻe fanafana mai ha toko ua ʻo ʻio mai. Hili ha ngaahi houa mei ai, ne u ʻilo mei he lōngonoá ko au pē ne ʻikai te u lava ʻo mohé.

Ko hoku fuofua pō ia ʻi he Senitā Akoʻanga Fakafaifekaú (MTC). Ne u lea fakamāvae he ʻaho ko iá ki heʻeku ongo mātuʻá, feʻiloaki mo hoku hoá mo e kau faifekau foʻou kehe naʻe ō ki ʻĪtalí, peá u ʻalu ki he ngaahi fuofua kalasí. Naʻá ku ongosia, ka naʻe hohaʻa hoku ʻatamaí ʻo ʻikai ke u maʻu ha nonga. Ne u toutou fehuʻi loto pē, “Ko e hā ʻeni kuó u faí?” Naʻe ʻikai te u ʻiloʻi pe te u lava moʻoni ʻo ako ke hoko ko ha faifekau. Te u maʻu nai ʻa e loto-toʻa ke puna ki ha fonua muli mo vahevahe ʻa e ongoongoleleí mo ha kakai ʻoku ʻikai te mau maheni? Mahalo pē naʻe ʻikai totonu ia ke u ʻi heni. Naʻe kamata ke tafe hifo e loʻimatá ʻi hoku kouʻahé.

Ne u manatuʻi hake leva ha meʻa naʻe talamai ʻe heʻeku faʻeé ʻo kau ki hono tuongaʻane ko Lelí. Naʻe ngāue fakafaifekau ʻa Leli ʻi ʻUlukuai mo Palakuai ʻi he ngaahi taʻu ʻo e 1970. ʻI he kamataʻangá naʻe ʻikai te ne mamohe ʻi heʻene fakakaukau ki heʻene taʻefeʻungá. ʻI heʻene ongoʻi ʻene fuʻu faingataʻaʻiá, naʻá ne tuʻu mei hono mohengá, ʻalu ki falekaukau, ʻo ne tūʻulutui hifo ʻo kole ki he Tamai Hēvaní ke ne maʻu ha nonga. Naʻe lavaʻi ʻeni ʻe Leli, fakataha mo e tokoni ʻa e ʻEikí, ʻo ne ngāue fakafaifekau ʻi he tui faivelenga.

ʻI heʻeku fakakaukau ki aí, ne u ongoʻi ha ʻamanaki lelei peá u luelue fakalongolongo atu ki falekaukau. Naʻá ku tūlutui hifo ʻi he taila momoko ʻo e falikí ʻi he fakapoʻulí ʻo tangi. Naʻá ku kole ki he Tamai Hēvaní ke ne ʻomi ha nonga kiate au ke u lava ʻo maʻu ha lototoʻa ke hoko atu.

Naʻá ku tatali. Naʻe ʻikai ke hoko ha meʻa. Ne hoko atu pē ʻeku tatalí, ka ko e meʻa pē naʻá ku ongoʻí ʻa ʻeku tangí. Faifai pē pea ʻikai toe ʻi ai ha meʻa ke u fai ka ke foki ki hoku mohengá.

Ne u maʻu e talí ʻi he momeniti kimuʻa peá u mohé. Naʻe fakafonu ʻe he Laumālié hoku ʻatamaí ʻaki ha fakatātā maama mo ongo māfana ʻo ha feituʻu fakaʻofoʻofa. Naʻá ku ʻiloʻi fakafokifā neongo te u faingataʻaʻia mo manavahē ʻi he kamataʻangá, ka te u aʻu ki he feituʻu ʻoku fie maʻu ʻe he ʻEikí ke u aʻu ki aí ʻo kapau te u vilitaki atu ki muʻa. Ne u ongoʻi ai ʻa e nonga, peá u mohe.

Kuo fakaʻali mai ʻe he Laumālié ha ngaahi meʻa fakaʻofoʻofa ʻi he kahaʻú. ʻI he ngaahi taimi faingataʻa lolotonga ʻeku ʻi he MTC, naʻá ku kuikui pē mo manatu ki he ongo naʻá ku maʻú. Naʻá ku ikunaʻi ʻeku manavaheé ʻaki ʻa e lotu mo e ngāue mālohi.

Naʻe ʻikai fuoloa kuó u aʻu mo hoku hoa foʻoú ki Sīnoa ʻi ʻĪtali. Naʻe ʻi ai ha matapā sioʻata lahi mei he peito ʻo homa falé ki he falefakatoló. Ne u hū ki he falefakatoló ʻo sio ki he koló. Ne u ʻosi ʻiloʻi ʻe au ʻa e kolo ko ʻení peá u ʻofa ai. Ko e feituʻu ʻeni naʻá ku mamata ki ai ʻi hoku ʻatamaí ʻi he pō ko ia he MTC. Naʻá ku ʻiloʻi kuo tataki mai au ʻe he ʻEikí ki he momenití ni, pea naʻá ku ʻi he feituʻu pē naʻe totonu ke u ʻi aí.