Fakafeʻungaʻi Koe pea Kau Atu ki he Moihū ʻi he Temipalé

Silivia H. ʻAlaleti, tokoni ʻuluaki ʻi he kau palesitenisī lahi ʻo e Fineʻofá: “Ko e temipalé ko e fale ia ʻo e ʻEikí. ʻOkú Ne fakahinohino mai e ngaahi tūkunga ke fakaaongaʻi aí, ngaahi ouau ʻoku totonu ke fakahoko aí, pea mo e ngaahi tuʻunga moʻui ʻe lava ke tau feʻunga ai ke hū. … ʻOku mahuʻinga ʻaupito ke tau moʻui taau fakafoʻituitui, ka tau fiefia ʻi he ngaahi tāpuaki ʻo e temipalé. ʻOku tau teuteu ʻaki ʻetau talangofua ki he ngaahi fekaú mo feinga ke fai e finangalo ʻo e ʻOtuá” (“Ngaahi Temipale Māʻoniʻoní, Ngaahi Fuakava Toputapú,” Liahona, Nōvema 2008, 113).

ʻEletā Tēvita B. Heiti (1906–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá: “Kuo pau ke moʻui ʻa kitautolu ʻe hū he temipalé ʻi ha founga ʻe tokoni ke tau taau ai ke hū pea kau kakato ki ai. …ʻOku tau vakaiʻi ʻetau moʻui taau ke hū he temipalé ʻi he… ngaahi ʻinitaviu mo e kau taki lakanga fakataulaʻeikí. ʻOku fakamoʻoniʻi ʻe heʻetau fakamoʻoni hingoá mo ʻenau fakamoʻoni hingoá ʻa ʻetau moʻui taau ke hū ki he temipalé” (“Come to the House of the Lord,” Ensign, May 1992, 15).

T&F 110:7:“Te u fakahā au ʻe au ki hoku kakaí ʻi he ʻaloʻofa ʻi he falé ni.”

Palesiteni Hauati W. Hanitā (1907–95): “Tau toutou ō ki he temipalé ʻi he lahi taha ʻe lava ʻi hotau taimí mo e foungá mo hotau tūkunga fakatāutahá. ʻOua naʻa tau ʻalu pē maʻa hotau kāinga kuo pekiá, ka tau ō ke maʻu e tāpuaki fakatāutaha ʻo e kau ʻi he ngaahi ouau he temipalé, ke maʻu ʻa e fakamāʻoniʻoniʻi mo e malu ʻoku maʻu ʻi loto he ngaahi holisi māʻoniʻoni ko ia kuo fakatapuí. Ko ha feituʻu fakaʻofoʻofa e temipalé, ko ha feituʻu ʻo e maʻu fakahā, ko ha feituʻu ʻo e melino” (“The Great Symbol of Our Membership,” Tambuli, Nov. 1994, 6).

T&F 38:32: “Te u ʻoatu ai kiate kimoutolu ʻa ʻeku fonó; pea ʻe fakakoloaʻiaʻi ai ʻa kimoutolu ʻaki ʻa e mālohi mei ʻolunga” (vakai foki, T&F 95:8).

ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá: “ ʻOku mahuʻinga tatau pē ʻa e ngaahi tāpuaki ʻo e ʻenitaumeni fakatemipalé kiate kitautolu takitaha ʻo hangē ko hotau papitaisó. Ko hono ʻuhinga ʻeni ʻoku tau teuteu ai ke tau maʻa ke hū he temipale ʻo e ʻOtuá. Ko e ngāue fakatemipalé ko ha faingamālie ia ke tau fakahoko ai e ngaahi ʻenitaumeni mo e fuakava maʻá e kakai moʻuí pea fakahoko ai foki ʻa e ngaahi ouau tatau pē ki hono huhuʻi ʻo e kakai pekiá. Ko e ʻuhinga ʻeni ʻoku fakahinohino ai kitautolu ʻi he folofolá ke langa ha ngaahi temipale pea teuteuʻi ʻetau moʻuí ke taau ke kau ʻi he ngaahi ouau mo e ngaahi fuakava ʻi he temipalé. …

“Ko e tefitoʻi taumuʻa ʻo e temipalé ke fakahoko e ngaahi ouau ʻoku fie maʻu ki hotau hakeakiʻi ʻi he puleʻanga silesitialé. ʻOku tataki kitautolu ʻe he ngaahi ouau fakatemipalé ki hotau Fakamoʻuí pea ʻomai kiate kitautolu ʻa e ngaahi tāpuaki ko ia ʻoku tau maʻu ʻo fakafou ʻi he Fakalelei ʻa Sīsū Kalaisí” (“Temple Blessings,” ʻi he Brigham Young University 2005–2006 Speeches [2006], 1, 4).

Palesiteni Kōtoni B. Hingikelī (1910–2008): “Ko e tangata pe fefine kotoa pē ʻoku ʻalu ki he temipalé ʻi ha laumālie moʻoni mo e tuí, te ne foki mei he fale ʻo e ʻEikí ko ha tangata pe fefine lelei ange ia. ʻOku fie maʻu ke ʻi ai maʻu pē ha fakalakalaka ʻi heʻetau moʻuí hono kotoa. ʻOku fie maʻu ke ʻai pē pea tuku atu ʻa e longoaʻa mo e vātau ʻo e māmaní ka tau hū atu ʻi he ngaahi holisi ʻo ha fale toputapu ʻo e ʻOtuá, ke tau ongoʻi ai ʻa Hono laumālié ʻi ha ʻātakai ʻo e māʻoniʻoní mo e melinó” (“Of Missions, Temples, and Stewardship,” Ensign, Nov. 1995, 53).