Usa ka Gasa sa Gugma

Human nga nahugno ang negosyo sa akong papa sa catering, ang akong pamilya miatubang og seryoso nga problema nga pinansyal. Ako nakahinumdom sa akong mama nga miuli sa balay nga may luha sa iyang mga mata, dili gayud mosulti kanamo unsa ang nahitabo bisan sa pagkahuman nako og pangutana unsa ang problema. Sa kadugayan kami mibalhin ngadto sa usa ka gamay nga apartment nga may usa ka kwarto tungod kay kini lamang ang among mabayaran.

Sa wala pa kana mahitabo, ang panahon sa Pasko sa kanunay mao ang panahon sa daghang mga pagluto, bag-ong mga sinina, mga party, pagbisita ngadto sa nindot nga mga lugar, ug mga regalo nga ipanghatag ug dawatunon. Ang akong mama adunay espesyal nga abilidad nga mahimong, sama sa among tawag kaniya, “Inahan sa Pasko.” Siya ganahan nga manghatag, ug matag Pasko siya malagsik ug mahigugmaong mobahin niadtong naglibut kaniya. Samtang kami nanagko, naghunahuna sa uban labaw pa kaysa among kaugalingon nahimong usa ka kinaiya nga kami usab naningkamot nga mapalambo.

Apan kadtong tuiga kami wala masayud unsa ang among buhaton. Si mama nabalaka tungod kay mao kadto ang unang Pasko nga dili sa among kaugalingon nga panimalay. Siya nabalaka tungod kay walay butang nga iyang mahunahunaan nga ipakigbahin ngadto sa uban. Hinoon, kami midasig kaniya tungod kay kami makahimo, pinaagi sa among gagmay nga paagi, makabuhat og usa ka butang aron sa pagpakatap sa diwa sa Pasko.

Hinoon, kami nakasuporta lamang gyud sa among kaugalingon, ug kami nanlimbasog sa kalinaw diha sa among bag-ong palibut. Ang tag-iya sa balay nga among giabangan dili usa ka Kristiyano, ug siya nasuko kanamo tungod kay kami mobangon og sayo aron mag-ampo uban sa pamilya ug manganta og mga himno. Ang among pagkanta makapamata kaniya tungod kay ang iyang kwarto sumpay sa among kwarto. Kanunay siya moreklamo, busa kami naningkamot nga mokanta og hinay ug dili siya madisturbo. Sa dihang iyang nakita nga kami dili mohunong sa pagbuhat sa among mga pag-ampo sa pamilya matag buntag, ang iyang mga reklamo naghinay-hinay og kawala.

Dayon adunay nahunahunaan ang akong papa. Siya mibati nga kami kinahanglan nga manganta og mga awit sa Pasko ngadto sa tag-iya sa balay isip among regalo ngadto kaniya. Ang tanan naghinam-hinam sa ideya—gawas lang kanako. Ako hugot nga misupak, nagpahinumdom sa akong pamilya kabahin sa mga reklamo niya kabahin sa among pag-ampo sa pamilya. Ako misugyot nga kami manganta ngadto sa usa ka tawo kinsa modayeg niini ug dili ngadto kaniya.

Apan ang akong papa miinsister, nagpasabut nga kini mahimong usa ka higayon alang kanamo nga among mapakita kaniya nga kami iyang mga higala bisan pa sa kalainan sa among mga relihiyon. Wala akoy kapilian gawas sa pag-apil uban sa akong pamilya sa pagpili ug pagpraktis og mga awit sa Pasko alang kaniya.

Sa Bisperas sa Pasko kami mibarug sa iyang pultahan ug mituk-tok. Wala niya ablihi ang pultahan, ug ako hapit na masuko ug nagpahinumdom sa akong papa sa among usik nga paningkamot. Apan sa dihang ako mitan-aw sa palibut, akong nakita nga ang tanang mga sakop sa akong pamilya nagpahiyum—nalipay sila sa among gibuhat. Nagtinguha ko sa akong kaugalingon nga makasinati sa sama nga pagbati.

Sa kaulahian ang tag-iya sa balay miabli sa iyang pultahan, ug sa makadiyot siya wala masayud kon unsa ang buhaton. Ang akong papa kalmadong misulti kaniya nga kami ganahan nga mokanta alang kaniya ug kon, kana mahimo ra ba, kami ganahan kaayo nga mosulod sa iyang apartment. Siya mipadaplin, ug kami misulod. Kami mikanta sa tanang awit sa Pasko nga among nahinumduman—apil ang among mga gipraktis ug kadtong wala. Sa wala madugay adunay usa ka talagason nga pagbati diha sa kwarto. Bisan nga kami nasayud nga siya wala makasabut sa mga kahulugan sa mga pulong, siya mipahiyum samtang kami nanganta. Misulti usab siya kanamo nga siya mibati og kamingaw ug ang pagkakita niya kanamo nga nagkahiusa nakapahimo kaniya sa pagpangandoy sa iyang kaugalingon nga pamilya. Sa wala pa kami mobiya, kami nanghinaut kaniya og usa ka malipayon nga Pasko ug usa ka bulahang Bag-ong Tuig. Siya mipasalamat kanamo, ug kami mibalik sa among kwarto.

Samtang ako naningkamot nga makatulog nianang gabhiona, ako namalandong kabahin sa panghitabo. Kini nakapahunahuna kanako nga ang tinuod nga regalo sa Pasko dili kinahanglan nga paliton sa tindahan o gani himoon sa balay; kini sa tinud-anay mao ang kinaiya ug ang tinguha nga anaa kanato sa pagbuhat kutob sa atong mahimo aron ang atong mga kaigsoonan mahimong malipayon. Ako nakaamgo nga ang labing nindot nga regalo nga atong ikahatag panahon sa Pasko wala magkinahanglan og daghang kwarta; hinoon, kini mao ang regalo sa gugma.

Nianang gabhiona ako nasayud nga ang akong pamilya mibati sa diwa sa Pasko pinaagi sa paghalad og gamay nga serbisyo ngadto sa usa ka nag-inusarang silingan.