Nagtudlo sa Akong Magtutudlo

Usa niana ka tinglarag sa daghang mga tuig nga nanglabay usa ako ka bag-ong migraduwar sa Columbia University sa Siyudad sa New York. Diha sa usa ka dakong lawak-klasehanan nga puno sa mga estudyante, ang among propesor naghisgut og moderno nga mga pagsundog sa karaan nga mga teksto. Sa iyang pagkutlo og lista sa mga pagmao-mao, nakurat ako sa pagkadungog kaniya nga midugang sa Basahon ni Mormon sa iyang lista.

Diha-diha ako nasayud nga dili ako makahimo sa pagbiya sa lawak-klasehanan nga walay pagabuhaton. Ako dili makahimo sa pagpakyas sa akong mga katigulangan, kansang mga pagpamatuod sa Basahon ni Mormon nakadala kanila sa pagsakripisyo sa tanang mga butang.

Human sa klase akong giduol ang propesor, kinsa naghupot sa Charles Anthon chair sa Columbia. Kapin sa 100 ka mga tuig ang mibalay, si Martin Harris miadto aron mobisita ni Propesor Anthon sa Columbia. Si Martin nagdala og papel nga may mga kinulit nga gikopya gikan sa mga palid diin ang Basahon ni Mormon gihubad.

Ako nakahinumdom sa akong amahan nga nakigbahin kanako og sulat nga gisulat sa iyang amahan mahitungod kang Martin Harris. Ang akong apohan nga lalaki misulti nga nakigkita ni Martin sa wala pa si Brother Harris mamatay. Sa diha nga si lolo nangutana kaniya mahitungod sa Basahon ni Mormon, si Martin mibangon sa iyang kaugalingon gikan sa higdaanan ug mihatag og lig-on nga pagpamatuod. Siya nakakita gayud og usa ka anghel, siya nakadungog gayud sa iyang tingog, ug nakakita gayud siya sa mga palid nga bulawan.

“Ang akong ngalan si Diana, ug ako usa ka miyembro sa Ang Simbahan ni Jesukristo sa mga Santos sa Ulahing mga Adlaw,” miingon ako nga nagkurog ngadto sa propesor. “Ang Basahon ni Mormon, alang kanako, mao ang usa ka basahon sa balaang kasulatan. Ako gusto nga makadungog sa imong mga katarungan tungod sa pagtawag niini nga usa ka minao-mao.”

Samtang naglakaw kami tabok sa campus, ang propesor, kinsa nakabasa Basahon ni Mormon, milista og pipila ka mga pagsupak sa pagkatinuod niini. Dinalian nakong gisulat kini, ug sa dihang nahuman siya, ako siya nga gihangyo, “Mahimo ba nga akong isulat ang akong nakat-unan gikan sa mga tinubdan sa hilisgutan agig tubag niini nga mga pagsupak?” Siya miuyon.

Mibalik ako ngadto sa dormitoryo, gisirad-an ang pultahan sa akong kwarto, miluhod sa pag-ampo, ug misugod sa paghilak. Ako mibati og kahuyang ug nakulangan. Maayo lang gani kay, nianang gabhiona kami adunay kalihokan sa Simbahan. Nagsunod sa usa ka hilisgutan nga nakapabayaw sa akong espiritu, nangayo ako og tabang gikan sa mga full-time missionary, kinsa didto mitambong. Sila mibahin og pipila ka mga tinubdan sa kasayuran nga nagtubag sa kadaghanan sa mga punto nga gipahayag sa akong propesor. Dayon nagsiksik ako sa dakong librarya sa Columbia. Sa akong papel akong gitubag ang mga pangutana sa propesor ug mihatag sa akong pagpamatuod sa pagkatinuod sa Basahon ni Mormon. Dayon ako kining gihatag kaniya.

Naghulat ako og pipila ka mga semana sa iyang tubag. Sa katapusan ako siyang gipangutana kon nabasa ba niya kini.

“Oo, ug ako kining gihatag sa akong asawa aron basahon. Iya akong gisultihan, ‘Bisan unsa pay imong buhaton, ayaw og gub-a ang hugot nga pagtuo niana nga estudyante.’” Dayon siya mitalikod ug milakaw.

Samtang nagkaduol ang Pasko, hugot nakong gihunahuna ang paghatag kaniya og usa ka kopya sa Basahon ni Mormon. Nakakita ako og kopya, midugang sa akong pagpamatuod, ug mipasalamat kaniya sa pagbasa sa akong papel. Ako dayong giputos ang basahon og Christmas wrapper ug gihatag kini kaniya. Wala madugay human niana, ako nakadawat og sulat gikan kaniya diin siya mipahayag og pasalamat tungod sa pagkadawat og kopya “niining talagsaon nga basahon.”

Sa diha nga akong gibasa ang iyang mga pulong, ang akong mga mata napuno sa mga luha. Ang Espiritu mihung-hong nga kining propesor dili na gayud mobugal-bugal sa Basahon ni Mormon. Ako mapasalamaton nga ang Espiritu mipahumok sa mga kasingkasing ug mitabang kanako nga masayud kon unsaon sa pagtudlo sa akong magtutudlo.