Mga pamatasan sa Primary

Si Natanael migunit og hugot sa kamot sa iyang mama Mama samtang sila naglakaw paingon sa kwarto sa Primary. Karon mao ang ikaduhang semana ni Natanael sa klase sa Sunbeam. Ang iyang tiyan naglain, ug sa matag lakang, labaw pa niyang gipahinayan og gamay ang paglakaw.

Sa miaging semana, ang Primary maingon og makalibug. Atol sa panahon sa pagpanganta, si Mia nagsige lang og barug ug nagpalibut-libut og lakaw. Si Natanael gikapoy og liningkod, mao nga siya mibarug usab. Apan ang iyang magtutudlo mihangyo dayon kaniya sa paglingkod og balik. Atol sa panahon sa pagpakigbahin, pipila sa mas magulang nga mga bata nagtabi og nangatawa. Usahay kini hilabihan ka saba sa pagpaminaw kon unsay gisulti ni Sister Miranda, ang presidente sa Primary. Sa diha nga ang iyang higala nga si Cara misugod sa paghilak, nakahimo kini ni Natanael nga kahilakon usab.

Samtang nagkaduol siya sa atubangan nga lingkuranan, si Natanael dili gusto nga mobuhi sa kamot ni Mama. Nabalaka siya basin ang Primary makalibug na usab niini nga semana. Dayon iyang nakita ang iyang magtutudlo.

“Hi, Natanael,” miingon si Sister Tejada. “Nalipay ko nga makakita nimo.” Gipikpik ni Sister Tejada ang lingkuranan nga tapad niya.

Si Natanael ganahan sa mahigalaon nga pahiyom sa iyang magtutudlo. Iyang gibuhian ang kamot ni Mama ug milingkod tapad ni Sister Tejada.

“Mobalik ra ko sa pagkuha nimo human sa klase,” miingon si Mama. “Timan-i ang pagbaton og balaan nga pagtahud.”

Si Natanael dili sigurado kon kahibalo ba siya og unsaon.

Human sa pangbukas nga pag-ampo, si Sister Miranda mibarug. “Karon kita adunay usa ka espesyal nga bisita,” siya miingon.

Sa kalit, usa ka puppet mitunga gikan sa likod sa lamesa nga tapad ni Sister Miranda. Ang puppet miikid-ikid, miwara-wara sa iyang mga kamot, ug miingon, “Oras na ba para manglakaw? Nagkinahanglan ko og mainom!”

Pipila sa mga bata miagik-ik.

“Kini unang higayon ni Arlo sa Primary,” miingon si Sister Miranda, “ug wala siya mahibalo unsaon sa pagbaton og balaan nga pagtahud. Apan sa dili pa siya makabaton og balaang pagtahud, siya nagkinahanglan nga makat-on og maayong mga pamatasan sa Primary.”

Si Natanael nakalitan. Sa pagpangaon si Mama usahay mopahinumdom kaniya sa pagbutang sa iyang panghapin nga panapton diha sa iyang mga paa. Kana mao ang maayong mga pamatasan. Ug si Papa kanunay nga mohangyo sa matag usa sa pagpasalamat ni Mama alang sa lamian nga pagkaon sa dili pa mosugod sa pagpanghipos sa lamesa. Kana mao ang maayo usab nga mga pamatasan. Apan unsa man ang mga pamatasan sa Primary?

Si Arlo misandig og patalikod ibabaw sa atubangan sa lamesa. “Hoy, ang matag usa kataw-anan nga tan-awon kon magtuwad!” siya miingon:

“Ang maayong pamatasan mao ang mga lagda nga nagpakita nga kita nagrespeto sa ubang mga tawo,” mipasabut si Sister Miranda. “Si Arlo wala mahibalo sa mga lagda alang sa maayong mga pamatasan sa Primary. Sa inyong pagtuo kita makatudlo kaha kaniya?” nangutana siya.

Si Sister Miranda miadto sa pisara ug nagdrowing og usa ka bukton. “Unsay kinahanglan nga buhaton ni Arlo sa iyang mga bukton?” nangutana siya.

“Ikyugpos kini!” Si Mia mitubag.

“Husto kana,” miingon si Sister Miranda.

Si Arlo mitindog. Iyang gikyugpos ang iyang mga bukton ug giisa ibabaw sa iyang ulo. “O, inyong gipasabut nga ingon niini?” siya nangutana.

Si Natanael nasayud nga kana dili husto.

Si Sister Miranda mihangyo kon ang matag usa diha sa Primary makapakita ni Arlo kon unsaon sa pagkyugpos sa iyang mga bukton.

Si Natanael dali nga mikyugpos sa iyang mga kamot. Si Arlo mikyugpos usab sa iyang mga bukton.

Diha sa pisara, tapad sa gidrowing nga bukton, si Sister Miranda misulat, “Ikyugpos ang atong mga bukton.”

Samtang si Sister Miranda nagdrowing og daghan pa nga mga litrato, ang mga bata mitudlo ni Arlo sa mga lagda alang sa maayong mga pamatasan sa Primary. Si Natanael nalipay nga siya nakahibalo na sa kadaghanan niini.

Karon si Arlo wala na mag-ikid-ikid o magwara-wara sa iyang mga kamot o magsinggit. Ang iyang mga tuhod wala na maglihok, ug ang iyang mga bukton gikyugpos. Ang mga bata hilum usab nga naminaw. Ang Primary dili na gayud saba ug makalibug. Si Natanael mibati og kalinaw ug kamalipayon. Dili kaayo lisud ang pagbaton og balaan nga pagtahud sa Primary. Siya nahibalo na kon unsaon.