Ang Mas Mahinungdanon nga Gasa

Usa ka buntag niana sa akong pagkahuman og basa ug namalandong sa Basahon ni Mormon, akong naamgohan nga ako makahimo na usab sa paghuman niini sa katapusan sa tuig. Kini nga katumanan midala og balik sa handumanan sa akong igsoong lalaki, kinsa akong giatiman sa akong panimalay atol sa iyang katapusang mga semana uban sa wala nay kaayohan nga kanser niadtong 2005.

Si Oliver determinado sa pagtuman sa usa ka saad sa iyang kaugalingon sa pagsunod sa tambag ni Presidente Gordon B. Hinckley (1910–2008) ug mobasa sa Basahon ni Mormon sa katapusan sa tuig.1 Apan niana nga tinglarag, si Oliver aduna pa gihapoy daghang mga pahina nga basahon. Sa katapusan siya naluya na kaayo nga siya dili na makahimo sa pagbasa.

Determinado sa pagpadayon sa iyang pasalig, si Oliver mihangyo kanako kon mahimo ba nga mobasa ako sa Basahon ni Mormon ngadto kaniya. Layo na kaayo ako sa akong kaugalingong pagbasa, apan malipayon ako sa pagsugod diin siya mihunong.

Pinaagi sa pagbasa ngadto ni Oliver matag adlaw, nakahimo ako sa pagtabang kaniya nga makab-ot ang iyang tumong sa paghuman sa basahon sa katapusan sa tuig, pipila lang ka mga adlaw sa wala pa siya mamatay. Nianang higayuna dili na kaayo madungog ang iyang sinultihan, apan ang iyang hunahuna tin-aw ug aktibo. Uban sa hilabihan nga paningkamot, siya kanunay nga mopakita sa iyang pagpasalamat kanako tungod sa gasa nga akong gihatag kaniya, nag-ingon nga mahimo na siyang mamatay karon tungod kay siya nakatuman sa iyang saad.

Nakabasa na ako sa Basahon ni Mormon sa daghang mga higayon kaniadto, apan wala pa gayud ako sukad mobati sa espiritu nga hilabihan ka gamhanan o masabtan ang mga lagda niini nga ingon ka klaro sama sa akong gihimo panahon niadtong katapusang mga bulan sa kinabuhi sa akong igsoon. Tinuod gayud, si Oliver mihatag kanako og mas mahinungdanon nga gasa.