Pagsimba pinaagi sa Balaan nga Pagtahud

Si Propeta Joseph Smith mihatag og makapainteres nga pagtulun-an sa balaan nga pagtahud diha sa iyang pag-ampo sa pagpahinungod sa Templo sa Kirtland niadtong 1836. Si Joseph miampo nga ang mahinulsulon mahimong mobalik ug “mahiuli ngadto sa mga panalangin nga ikaw mi-orden nga ibu-bu niadto kinsa motahud kanimo diha sa imong balay” (D&P 109:21). Ang pag-ampo sa Propeta mihatag og gibug-aton kon unsa man ang mga panalangin sa balaan nga pagtahud: pulong sa kaalam, kahingpitan sa Espiritu Santo, maayo diha sa mga mata sa Ginoo, ang gahum sa Dios, ug kapasayloan (tan-awa sa mga bersikulo 14, 15, 21, 22, 34). Sa tinuoray, ang mga bunga sa balaan nga pagtahud daghan kaayo!

Daghan sa atong gisulti diha sa Simbahan kabahin sa balaan nga pagtahud kasagaran nakapokus kabahin sa paghilum diha sa mga dapit nga simbahan, nga gihatagan og dakong pagtagad ang paghilum sa mga bata. Tinuod, ang kahilom usa ka importante nga bahin sa balaan nga pagtahud, apan ang tibuok, mabungahong kahulugan sa konsepto sa balaan nga pagtahud naglakip og mas labaw pa kaysa walay saba ug kagubot. Ang kahilom dili motugbang sa balaan nga pagtahud.

Ang atong mga simbahan mao gayud ang balay sa pagsimba diin kita makahimo sa paglingkod og hilum sa pasiuna nga musika ug mamalandong sa kaanindot sa gipahiuli nga ebanghelyo, pag-andam sa atong mga kasingkasing ug mga hunahuna alang sa sakrament, ug pagpamalandong sa kahalangdon sa atong Langitnong Amahan ug sa katahum sa Pag-ula sa Manluluwas. Asa man ang mas maayo nga dapit sa pagkonsiderar sa ingon ka sagrado ug kaimportante nga mga butang? Kining pagpakita sa atong pagsimba natural lamang nga pagaubanan og kinaiya sa balaang pagtahud.

Ang ingon nga oportunidad sa pagsimba importante kaayo sa pagpalig-on sa atong hugot nga pagtuo ug makahatag og agianan asa ang espiritu sa pagpamatuod ug pagpadayag modagayday ngadto sa atong mga kalag. Ang katinuod niini matandogon nga nasinati nako diha sa usa ka Adlaw nga Igpapahulay samtang ako milingkod panahon sa pasiuna nga musika alang sa miting sa sakrament. Ang akong asawa ug ako nagpangita og espiritwal nga panudlo kabahin sa usa ka piho nga pangutana sa among kinabuhi. Mapasalamaton kaayo, ang tubag miabut pinaagi sa napili nga pasiunang himno. Agi og tubag sa nindot nga paminawong melodiya, ang Espiritu tin-aw kaayo nga mipakita sa saktong dalan alang kanamo. Sa walay suwerte, sa wala pa mahuman ang himno, ang tawo nga naglingkod tapad nako misandig ug misugod sa pagpakig-istorya kanako, ang Espiritu diha-diha dayon mibiya. Ang usa ka bahandi sa matam-is nga pagpadayag naputol tungod sa kakulang sa balaan nga pagtahud.

Gikan niini nga kasinatian ako nakaangkon og espesyal nga pagdayeg sa kabalaan sa usa ka hilom nga higayon sa pasiuna nga musika. Si Presidente Boyd K. Packer, Presidente sa Korum sa Napulog Duha ka mga Apostoles, mihatag og gibug-aton niining kamatuoran sa dihang siya mipahayag, “Ang walay balaan nga pagtahud mohaum sa mga katuyoan sa kaaway pinaagi sa pagpugong sa importanting mga agianan sa pagpadayag sa hunahuna ug sa espiritu.”⁴

Ang mga sukod sa balaan nga pagtahud dili gayud lisud. Kaysa tugutan nato ang atong mga hunahuna sa paglatagaw sa mga kalibutanon nga mga butang, kinahanglan natong disiplinahon ang atong mga hunahuna sa mga dapit ug mga panahon sa balaan nga pagtahud sa paghunahuna sa mga butang sa Dios: ang kanindot sa Pag-ula, mahangturong mga pamilya, ang kahingpitan sa Pagpahiuli sa ebanghelyo. Kining mga sukod sa balaan nga pagtahud molakip sa pagdisiplina sa atong batasan aron sa pagpakita sa kinaiya nga pagtahud, gugma, ug pagyukbo. Kini molakip sa pagsinina og tarung sa atong labing nindot nga bisti, maglikay sa hilabihan ka dili pormal nga pagsinina sunod sa panahon karon, ug maglikay sa kusog nga pagpakig-istorya ug makasamok nga batasan diha sa building sa Simbahan. Ug kon anaa sa simbahan, kita kinahanglang magtinguha nga mas “mohilum”, ilabi na panahon sa pagpangalagad sa sakrament.

Ang tinguha alang sa balaang pagtahud nga kinaiya moaghat kanato sa pagplano og una kon kita naghunahuna og daan nga kinahanglang mobiya sa miting sa bisan unsang rason ug molingkod sa luyo duol sa gawasanan aron mobiya nga hilom. Ang pagbiya sa tunga-tunga sa serbisyo, ilabi na panahon sa pagpamulong o lain nga presentasyon, makabalda sa mamumulong ug niadtong naglingkod tapad kanimo. Agi og respeto alang sa uban ingon man usab sa Ginoo, kita kinahanglang maglikay sa ingon nga mga lihok nga wala sa lugar.

Kasagaran atong ipahisama ang balaan nga pagtahud sa usa ka kongregasyon ngadto sa kinaiya sa mga bata karon. Tinuod, ang mga bata makahatag og usa ka espesyal nga hagit kabahin sa balaan nga pagtahud. Apan ang unang balaod nga may kalabutan sa mga bata mao ang pagdala kanila! Sila matudloan, sila madala sa gawas, ug sila makabalik ngadto sa miting. Ug sa pagtudlo mas maayo nga paminusan ang gidaghanon sa mga himan sa pagbansay nga dad-on sa simbahan, sama sa mga dulaan ug pagkaon. Ang mga kongregasyon sa mga Santos sa Ulahing mga Adlaw sa kasagaran napanalanginan og daghang mga bata ug kabatan-onan, ug kita kinahanglan nga mapasalamaton alang niini. Sila ang kaugmaon sa Simbahan.

Ang kinasingkasing nga balaan nga pagtahud usa ka importante nga bahin sa atong pagsimba sa atong Langitnong Amahan ug sa Ginoo. Sa tanang mga kalihokan ug panghunahuna sa atong mga kinabuhi matag adlaw, kita unta makalikay niadtong mopakita og kakulang sa balaan nga pagtahud ngadto Kanila. Sa tanan natong mga kalihokan sa pagsimba, kita unta magtinguha sa pagpalapad ug pagpalambo sa atong mga pagbati sa pagtahud, gugma, ug pagyukbo ngadto sa atong Langitnong Amahan ug sa Iyang Anak, nga si Jesukristo. Kini nga mga pagbati mao ang timailhan sa usa ka tinuod nga kinaiya sa Kristyano.