“Ang akong mga ginikanan dili mga miyembro sa Simbahan. Unsaon nako sa pagpakigbahin sa ebanghelyo uban kanila nga sila dili masilo?”

Sa wala pa ko mabunyagi niadtong 2006, ako nagtambong na og laing relihiyon diin nasakop ang akong pamilya. Sa sinugdanan ako nahadlok nga moistorya kabahin sa Simbahan ngadto sa akong pamilya tungod sa kahadlok nga dili dawaton. Apan sa dihang ako misugod sa pagbutang og mga Poster gikan sa Liahona sa pipika ka lugar sa among balay, ang mga miyembro sa pamilya misugod sa pagpangutana, “Unsa man ning litratoha? Unsa may gipasabut niini?” Kining mga pangutana nakahimo nga mas sayon ang paghisgut kabahin sa unsa ang mahatag sa Simbahan ngadto sa mga pamilya. Pinaagi niini, ang akong kinamanghuran nga igsoong babaye nabunyagan, ug karon, samtang anaa ko sa akong misyon, ang akong papa ug mama nagsulat kanako nga nag-ingon nga sila ganahan nga moadto sa simbahan.

Pahibaloa ang imong ginikanan pinaagi sa imong pagpuyo kon unsa kaimportante ang Simbahan para kanimo ug ang talagsaon nga kalainan nga nahatag niini sa imong kinabuhi. Sa pagtabang nimo sa pagbuhat niana, kinahanglan imong sundon ang tambag sa mga General Authority, apil na ang pagsunod sa ebanghelyo. Pagmakanunayon sa imong kaugalingong mga pag-ampo, sa pagbasa sa kasulatan, pagtambong sa simbahan, pagsunod sa mga sugo, pagsunod sa mga sumbanan diha sa Alang sa Kalig-on sa mga Kabatan-onan, sa pagtrabaho aron makab-ot ang mga tumong, ug pagsunod sa Espiritu Santo. Ikaw usab mahimong mag-ampo ug magpuasa alang sa imong mga ginikanan ug maghangyo sa Espiritu sa paggiya kanimo. Dugang niana, ako nagtuo nga kinahanglan imong ipakita ang imong gugma alang kanila.

Ako mag-ampo ug mangutana sa Dios nga, kon ako makig-istorya sa akong mga ginikanan, Iyang ibutang ang sakto nga mga pulong diha sa akong ba-ba aron dili sila malain nako. Ako usab mohangyo sa Iyang Espiritu aron sila mobati sa akong pagkasinsero ug sa akong gugma. Ako mopakigbahin og usa ka kasulatan diha sa Biblia nga mosuporta sa Basahon ni Mormon. Akong ipakigbahin ang akong mga kasinatian ug mga pagbati usab. Ako mosulti nga ang ebanghelyo, ang gugma sa Dios, ug ang pag-ampo modala kanato nga mas duol ngadto sa espirituhanong kalinaw nga gusto natong tanan nga maangkon. Ang buluhaton sa Ginoo lisud apan dili imposible. Salig sa Espiritu.

Kon ikaw nahadlok sa pagpakigbahin sa ebanghelyo, sugdi pinaagi sa pagsulti kanila unsa ang imong gibati kon ikaw mag-ampo ug magbasa sa mga kasulatan. Ipasabut nga kamo adunay pagpamatuod, ug ipasabut nganong ikaw ganahan sa ebanghelyo. Kon imong ihulagway kining mga pagbati, sila makasabut ug dili malain.

Ang akong papa dili miyembro, ug usahay lisud, apan adunay pipila ka mga butang nga akong nakat-unan. Una, kon ako makig-istorya ngadto kaniya inubanan sa gugma ug dili maghunahuna nga ako labaw sa uban, lisud alang kaniya sa pagsalikway unsa ang akong gipangsulti. Ang akong papa makabatyag niana nga gugma, bisan dili kami kanunay magkauyon. Ikaduha, ang ebanghelyo yano. Dili ato ang pagtuis o ang pag-usab niini. Isulti ang yano nga mga kamatuoran. Sa katapusan, hinumdumi nga kita gitawag aron mahimong mga saksi ni Kristo.

Kamo makahimo og usa ka positibo nga ehemplo ngadto sa imong mga ginikanan pinaagi sa pagsubay sa mga sumbanan sa Simbahan ug sa pagsunod sa tanang mga sugo, ilabi na sa Pulong sa Kaalam, ug pinaagi sa pagpakita og gugma ug pagkamasulundon pinaagi sa imong mga lihok. Sila makabantay sa imong batasan ug makatabang kanila nga moadto sa Simbahan sa Ginoo. Ako hugot nga mituo nga pinaagi sa imong personal nga mga pag-ampo, ikaw makahangyo sa Langitnong Amahan sa pag-usab sa ilang mga kasingkasing.

Si Pablo mitudlo kanato diha sa 1 Timoteo 4:12, “Ayaw itugot nga adunay magatamay kanimo tungod sa imong kabatan-on; hinonoa alang sa mga magtotoo, pagkinabuhi ingon nga panig-ingnan sa sinultihan ug sa paggawi, sa gugma, sa pagtoo, sa kaputli.” Ang pagpakita og maayo nga ehemplo maoy moabli sa ganghaan sa pagkakabig sa inyong mga ginikanan. Kini mohimo og saktong kahimtang sa palibut ug oportunidad sa pagpamatuod sa ebanghelyo. Ang pagbaton og hugot nga pagtuo, nga dili mahadlok, ug mahimong ehemplo makapausab sa ilang mga hunahuna ug mopanalangin sa ilang mga kinabuhi ug kanimo.