Ang Panalangin sa Pagtrabaho

Karon, daghan ang nakalimot sa bili sa pagtrabaho. Ang pipila nasayop sa pagtuo nga ang labing taas nga tumong sa kinabuhi mao ang pagkab-ot og usa ka kondisyon diin ang usa ka tawo dili na kinahanglan motrabaho. Si Presidente David O. McKay (1873–1970) ganahan kaayo nga mosulti, “Kita kinahanglan nga makaamgo nga ang pribilehiyo sa pagtrabaho usa ka gasa, ang kusog sa pagtrabaho usa ka panalangin, nga ang paghigugma sa pagtrabaho usa ka kalampusan.”¹

Ang pagtrabaho dili lamang kabahin sa ekonomikanhong panginahanglanon; kini usa ka espirituhanong kinahanglanon. Ang atong Amahan sa Langit nagtrabaho aron sa pagpahinabo sa atong kaluwasan ug kahimayaan (tan-awa sa Moises 1:39). Ug, sa sinugdanan uban ni Adan, Siya nagmando kanato sa pagtrabaho. Bisan sa Tanaman sa Eden, si Adan gimandoan nga “atimanon [ugmaron] kini ug bantayan” (Genesis 2:15). Human sa Pagkapukan, si Adan gisultihan, “Sa singot sa imong nawong magakaon ikaw sa tinapay” (Genesis 3:19). Sama sa ubang mga sugo, adunay hingpit nga kalipay sa pagsunod niini. Sa pagtrabaho nga—matinud-anon ug mabungahon—modala og katagbawan ug usa ka pagbati sa bili sa kaugalingon. Pagkahuman og buhat sa tanan aron kita mahimong mapaningkamuton sa kaugalingon, sa pagsangkap sa atong kaugalingong mga panginahanglanon ug sa atong pamilya, kita makaduol sa Ginoo uban sa pagsalig sa pagpangutana kon unsa pa kaha ang atong kulang.

Ang Langitnong Amahan naghatag kanato sa tanan nga mga talento ug mga gasa nga makatabang kanato sa pagsangkap sa atong mga kaugalingon ug sa atong mga pamilya. Ang pagkat-on sa pag-ila sa atong mga talento ug sa mga gasa—ug sa mga interes—usa ka importante nga lakang sa pagpangandam og kabuhian. Si Presidente Henry B. Eyring, Unang Magtatambag sa Unang Kapangulohan, mikat-on gikan sa iyang amahan, nga si Henry Eyring, sa pagpili og usa ka kabuhian nga moangay sa iyang interes.

Tungod sa iyang gugma sa siyensya, si Professor Henry Eyring miawhag sa iyang anak nga mga lalaki sa pag-major og physics isip usa ka pagpangandam alang sa kabuhian sa siyensya. Samtang si Presidente Eyring nagtuon og physics sa University of Utah, siya nakig-istorya uban sa iyang amahan nga miusab sa direksyon sa iyang kabuhian. Siya mihangyo sa iyang amahan og tabang sa usa ka lisud kaayo nga problema sa matematika. “Ang akong amahan didto sa pisara nga among gibutang sa ilawom sa silong,” mihinumdom si Presidente Eyring. “Sa kalit siya mihunong. ‘Hal,’ siya miingon, ‘nagtrabaho kita niining sama nga problema usa ka semana na ang milabay. Ingon og wala ikaw makasabut og maayo niini karon kompara sa nangagi. Wala ba ka nagtuon niini?’”

Naulawan og gamay, si Presidente Eyring miangkon nga wala niya kini mabuhat. Si President Eyring nakahinumdom sa tubag sa iyang papa: “Sa dihang ako siyang gisultian nga wala, ang akong amahan mihunong sa kadiyot. Kadto usa gyud ka malumo ug sakit nga higayon sa pagbati, tungod kay ako nasayud unsa niya ako kamahal ug unsa niya ka gusto nga ako mahimong usa ka scientist. Dayon siya miingon, ‘Hal, sa akong hunahuna ikaw kinahanglan nga moundang sa physics. Ikaw kinahanglang mangita og usa ka butang nga imo gayud nga ganahan nga bisan kon ikaw wala maghunahuna og bisan unsa nga butang, mao kana ang imong hunahunaon.’”²

Kon kita nakaeksamin na sa atong kaugalingong mga interes ug mga abilidad ug kon kita nakakuha na og mga tambag niadtong kinsa atong kaila ug nahigugma kanato—ilabi na sa Ginoo—kita kinahanglan nga mangita og edukasyon ug kasinatian gikan sa atong gipili nga natad sa kabuhian. Ang edukasyon ug pagbansay mao ang duha sa labing angayan nga puhonan nga maayong himoon ni bisan kinsa.

Pagkat-on aron mahigugma nga makat-on. Sama kaimportante sa pagpadayon og deposito ngadto sa savings account, importante usab ang pagpadayon sa pag-angkon og edukasyon sa inyong kaugalingon sa inyong napilian nga propesyon o kabuhian aron ang inyong mga kahanas dali nga magamit sa panginabuhi. Sama sa usa ka marinero nga kanunay magbantay sa kalangitan alang sa kausaban sa panahon, padayon nga anaa sa panahon ang inyong kabuhian nga motabang kaninyo nga makabantay sa nagkausab nga kondisyon sa inyong natad nga kabuhian ug mohimo sa gikinahanglan nga mga kausaban.

Walay usa kanato ang nag-inusara diha sa kadagatan; kita kabahin sa usa ka dako nga pundok. Ug sama sa usa ka barko nga pandagat nga adunay daghang suporta nga mga barko, ang Simbahan adunay mga bishop ug mga branch president, mga presidente sa Relief Society, mga presidente sa korum, mga employment especialist, ug uban pa kinsa andam nga motabang kanato aron makapadayon. Ang susama nga tabang naglakip sa pagdala kanato ngadto sa mga kapanguhaan ug pagbansay nga mohaum sa atong piho nga sitwasyon—sama sa pagsulat sa résumé, paghimo og epektibong pagpangita og trabaho, ug pagkat-on sa pagpresentar og maayo sa atong kaugalingong panahon sa mga interbyu.

Sa una sa wala pa gamita ang pulong nga pagpadaghan og mga kaila [networking], ang mga marinero mag-ilisanay og impormasyon kabahin sa delikadong mabaw nga mga dapit, bag-ong mga rota, ug kapanguhaan og suplay. Ang usa ka marinero nga hapit na mosulod sa dili pamilyar nga mga katubigan makig-istorya ngadto ni bisan kinsa nga adunay magamit nga impormasyon ug kasinatian nga ikapakigbahin. Sa karon nga palibut sa pagpangempleyo, ang pag-establisar ug pagpalungtad og kaila niadtong kinsa adunay magamit nga impormasyon o kasinatian parehas gayud kaimportante. Ang lokal nga mga lider sa ward o branch ug mga paryente maoy maayo nga sinugdanan.

Usa sa labing importante nga mga responsibilidad sa mga ginikanan mao ang pagtudlo sa ilang mga anak sa pagtrabaho. Bisan ang gagmay nga mga bata magsugod sa pagsinati sa mga benepisyo sa pagtrabaho kon sila nalakip sa mga buluhaton sa balay ug sa pagserbisyo ngadto sa uban. Ang maalamon nga mga ginikanan motrabaho uban sa ilang mga anak, mohatag og pagdayeg kanunay, ug siguraduhon nga walay trabaho nga dili mahimo.

Sa dihang si Presidente Thomas S. Monson batan-on pa, ang iyang mga ginikanan mitudlo kaniya sa baruganan sa trabaho pinaagi sa ilang mga ehemplo. Ang iyang amahan, nga usa ka tig-imprinta, nagtrabaho og dugay ug maayo sa praktikal nga paagi sa matag adlaw sa iyang kinabuhi. Kon siya anaa na sa panimalay, siya dili mohunong sa pagtrabaho aron siya makapahulay og tarung nga angayan unta alang kaniya. Siya mipadayon sa pagtrabaho aron sa pagserbisyo sa iyang pamilya ug ingon man sa iyang mga silingan.³ Ang iyang mama kanunay nga nagtrabaho aron sa paghatag og pipila sa gikinahanglang serbisyo ngadto sa sakop sa pamilya o higala. Ang mga ginikanan ni Presidente Monson kanunay mohangyo kaniya sa pag-uban kanila o sa pagbuhat og pipila ka mga pagserbisyo alang kanila, naghimo kaniya nga makakat-on mahitungod sa trabaho aron sa pagserbisyo sa uban.

Si Presidente Monson nakat-on gikan sa iyang amahan kon unsaon sa pagpadagan og negosyo ug misugod sa iyang unang part-time job sa dihang siya 14 pa lamang, nagtrabaho sa printing shop nga gidumala sa iyang amahan. Si Presidente Monson misaysay nga human sa iyang edad nga 14, walay mga adlaw sa iyang kinabuhi—gawas sa Dominggo—nga siya wala magtrabaho. “Kon ikaw nakat-on sa pagtrabaho samtang ikaw batan-on pa, kana nga kinaiya magpabilin kanimo,” siya miingon.⁴

Kabahin sa pagpangempleyo, sama sa ubang labing importanting mga butang nga kita gitawag sa pagbuhat niini nga kinabuhi, importante nga kita magpadayon sa unahan. Kon atong buhaton ang atong labing maayo, sa pagpangita og tawhanon ug balaanong paggiya ug pagsalig sa atong mahigugmaong Langitnong Amahan, Siya mopanalangin sa resulta.

Isip usa ka batan-on nga lalaki, si Presidente Dieter F. Uchtdorf, Ikaduhang Magtatambag sa Unang Kapangulohan, gusto og lahi nga kasinatian sa pagpanarbaho isip usa ka bata nga tigdeliver og mga linabhan alang sa iyang pamilya. Siya wala kaayo malingaw sa kariton, sa bug-at nga bisikleta, o sa trabaho; hinoon, siya mikugi sa pagpanarbaho aron sa pagtabang sa iyang pamilya.

Siya misaysay niining mosunod kabahin sa usa ka panalangin nga gikan niadtong mahagitong kasinatian sa pagpanarbaho:

“Paglabay sa katuigan, sa dihang hapit na ako matawag sa pagkasundalo, nakahukom hinoon ako nga mobulontaryo ug magpiloto sa Air Force. Ganahan ako nga magpalupad ug nakahunahuna nga ang pagka-piloto maoy angay kanako.

“Aron madawat niadto nga plano kinahanglang makapasar ako og pipila ka mga eksamin, apil na ang makuti nga pag-eksamin sa panglawas. Ang mga doktor may gamayng kabalaka sa mga resulta ug naghimo og dugang nga pag-eksamin. Unya sila mipahibalo, ‘Aduna kay uwat sa imong baga nga nagpasabut nga aduna kay sakit sa baga niadtong panahon sa imong kabatan-on, apan dili kaduha-duhaan nga maayo kana karon.’ Ang mga doktor nangatingala og giunsa ako pagtambal nga naayo ang akong sakit. Hangtud niadtong adlawa sa pag-eksamin wala gayud ako masayud nga may sakit diay ako kaniadto sa baga. Unya akong nahinumduman nga kadtong kanunay nakong pag-ehersisyo nga may lab-as nga hangin isip usa ka laundry boy maoy nakatabang sa akong pagkaayo niadtong sakita. Kon dili pa niadtong dugang paningkamot sa pagtindak niadtong bug-at nga bisikleta kada adlaw, pagguroy sa kariton sa linabhan ngadto ug nganhi sa mga dalan sa among lungsod, tingali dili unta ako mahimong jet fighter nga piloto ug unya nahimong kapitan sa 747 airline. …

“Kon nahibaloan ko pa lang unta niadto og unsa ang akong nakat-onan paglabay sa pipila ka tuig—kon ako pa lang unta nga nakita ang katapusan gikan sa sinugdanan—Ako unta mapasalamaton niini nga mga kasinatian, ug makahimo unta kadto sa akong buluhaton nga mas magaan.”⁵

Niining panahona nga ang ekonomiya adunay daghang mga problema, diin ang kataub sa oportunidad sa pagpanarbaho mora og nagkakunhod, diin ang mga hangin ug mga sulog mora og mibatok sa atong kalamboan, importante kaayo ang paghinumdom nga ang Ginoo dili mohatag og mga sugo ngadto sa mga katawhan “gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Sigurado nga ang sugo sa pagtrabaho aron sa pagpatunhay sa kaugalingon ug sa pamilya mao ang usa sa mga sugo sa Ginoo nga giandam aron motabang kanato nga makapadayon.

Alang sa uban, ang hagit mora og makahahadlok, sigurado sama sa hagit ni Nephi nga sa dihang siya nagtan-aw sa kadagatan nga nag-abut sa unahan sa kalangitan. Ang usa ka batan-on nga lalaki sa disierto mao ang mahimong usa ka tighimo og barko ug usa ka marinero. Kana usa ka kausaban sa kabuhian. Si Nephi nagtinguha og instruksyon ug mitrabaho (tan-awa sa 1 Nephi 17:8–11). Bisan karon, ang Ginoo mopanalangin kanato samtang kita mopadayon sa pagsakripsiyo ug pag-alagad sa gingharian ug sa atong pagsugod sa paglawig uban sa hugot nga pagtuo, nasayud nga kita wala mag-inusara sa paglawig.