Pag-amuma pinaagi sa Pag-alagad sa Kalooy

Moroni 7:48: “Pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo.”

Presidente Dieter F. Uchtdorf, Ikaduhang Magtatambag sa Unang Kapangulohan: “Ang mga disipulo ni Kristo sa tibuok panahon sa kalibutan nailhan tungod sa ilang kamanggiloy-on. … Sa kaulahian, ang gidaghanon sa mga pag-ampo nga atong gipamulong makatabang sa atong kalipay, apan ang gidaghanon sa mga pag-ampo nga atong gihatagan og tubag labaw nga mahinungdanon. Atong bukhon ang atong mga mata ug pangitaon ang mabug-at og mga kasingkasing, tan-awa ang nagmagul-anon ug nawad-ag paglaum; atong paminawon ang hilom nga mga pag-ampo sa uban nga naglibut kanato, hinaut nga mahimo kitang instrumento sa kamot sa Ginoo sa pagtubag niadto nga mga pag-ampo” (“Ang Kalipay, Inyong Kabilin,” Liahona, Nob. 2008, 119, 120).

Barbara Thompson, ikaduha nga magtatambag sa kinatibuk-ang kapangulohan sa Relief Society: “Kita kinahanglan nga moluwas ‘sa tanan nga labing nindot nga naa sa [atong] kinahiladman’ aron isip mga anak nga babaye sa Dios kita makahimo sa atong bahin sa pagtukod sa gingharian sa Dios. Kita adunay tabang sa pagbuhat niini. Ingon sa gipahayag ni Joseph, “Kon kamo mopuyo diha sa inyong mga kahigayunan, ang mga anghel dili mapugngan nga mahimo ninyong mga kauban.’

“Kita magtambayayong sa usag usa natong alantuson, magbangutan uban niadto nga nagbangutan, mohupay niadto nga nagkinahanglan sa kahupayan, ug sa ingon mohupot sa mga panaad nga atong gihimo [tan-awa sa Mosiah 18:8–10]” (“Karon Kita Maglipay,” Liahona, Nob. 2008, 116).

D&P 81:5: “Tabangan ang maluyahon, ipataas ang mga kamot sa nawad-an og paglaum, ug lig-unon ang mga tuhod nga mahuyang.”

Elder Russell M. Nelson sa Korum sa Napulog Duha ka mga Apostoles: “Ang Maayong Magbalantay miingon, ‘Pakan-a ang akong mga nating karnero.’ (Juan 21:15.) Busa ang usa ka babaye nga mopakaon sa iyang mga hinigugma, mohatag og panabang ug pagkaon sama sa gibuhat sa Manluluwas. Ang iyang balaanong gasa mao ang pag-amuma, sa pagtabang sa mga batan-on, sa pagbantay sa mga kabus, sa paghupay sa nawad-an og paglaum.

“Ang Ginoo miingon, ‘Ang akong buhat ug ang akong himaya [mao] ang pagpahinabo sa pagka-imortal ug sa kinabuhi nga dayon sa tawo.’ (Moises 1:39.) Mao nga ang Iyang mahalaron nga anak nga babaye nga disipulo mahimong matinud-anong moingon, ‘Ang akong buhat ug ang akong himaya mao ang pagtabang sa akong mga hinigugma sa pagkab-ot nianang langitnong tumong.’

“Ang pagtabang sa lain nga tawo nga makab-ot ang iyang langitnong katakus usa ka bahin sa balaanong misyon sa babaye. Isip usa ka inahan, magtutudlo, o santos nga moamuma, siya motabang sa ubang mga tawo nga molambo sa ilang katakus. Sa pagpakig-uban sa Dios, ang iyang balaanong misyon mao ang pagtabang sa mga espiritu nga mabuhi ug ang mga kalag pagabayawon. Kini mao ang katuyoan sa iyang pagkalalang. Kini halangdon, makapabayaw, ug mahimayaon” (“Woman—Of Infinite Worth,” Ensign, Nob. 1989, 22).

Silvia H. Allred, unang magtatambag sa kinatibuk-ang kapangulohan sa Relief Society: “Ang Ginoo mipanalangin sa kababayen-an og diosnong mga kinaiya sa gugma, kalooy, kaayo, ug gugmang putli. Pinaagi sa atong binulang pagbisita isip mga visiting teacher, kita adunay gahum sa pagpanalangin sa matag sister samtang atong gitunol ang atong mga kamot sa gugma ug kamabination ug sa paghatag sa mga gasa sa kalooy ug gugmang putli. … Kini ang akong pag-ampo nga kita mosaad og dugang nga pasalig sa pagtunol sa atong gugma ug kalooy sa pagtabang, ug paglig-on sa usag-usa sa pagbuhat nato sa atong visiting teaching uban ang kabubut-on ug malipayong kasingkasing” (“Pakan-a ang Akong mga Karnero,” Liahona, Nob. 2007, 113, 115).