Gisul-oban sa Gugma

Disyembre kadto, ang panahon sa diha nga ang mga pagbati sa katawhan mga malumo samtang sila nahinumdom sa pagkatawo ni Jesukristo ug sa unsay Iyang nabuhat alang kanato pinaagi sa Iyang walay kinutuban nga Pag-ula.

Sa diha nga ako miabut sa panimalay gikan sa trabaho, ang akong tulo ka mga anak ug ang akong gwapa nga asawa mipakigbahin kanako og usa ka desisyon nga ilang gihimo mahitungod sa Pasko: “Wala nay bisan unsa nga panginahanglan sa pagpalit alang kanamo og mga pinaskohan niining tuiga,” sila mipahayag.

Nakalitan, ako nangutana, “Ug unsa may nakaingon niini nga desisyon?” Ako kining gipangutana tungod kay, ang akong mga anak mahimong magsakripisyo sa pipila ka mga butang nga ilang gipaabut sa tibuok tuig.

Sila dayon milakaw ug mikuha sa duha nako ka daang gasgas nga mga biste. “Papa,” sila miingon, “uban sa kwarta nga atong gamiton alang sa pinaskohan sa Pasko, gusto namo nga imong ilisan kining daan nga mga biste og bag-o. Gusto namo nga magtan-aw kanimo nga moadto sa trabaho nga nagsul-ob sa usa ka bag-o nga biste!”

Akong naamgohan nga kini mao ang tinuod nga espiritu sa Pasko. Kon kita magsakripisyo og usa ka butang alang sa laing tawo, kita moabut sa salabutan sa kahulugan sa Pag-ula ni Jesukristo.

Sa kaulahian, sa dihang akong gisul-ob ang bag-ong biste nga akong nadawat alang sa Pasko, akong gibati nga ako gisul-oban sa gugma.