Anaa sa Panimalay alang sa Pasko

Ang usa ka butang nga gitinguha natong tanan sa atong mga kasingkasing, panahon sa Pasko ug sa kanunay, mao ang pagbati nga gibugkos diha sa gugma ug uban sa matam-is nga kasigurohan nga kini molungtad hangtud sa kahangturan. Kini mao ang saad sa kinabuhing dayon, diin ang Ginoo mitawag nga Iyang labing mahinungdanon nga gasa ngadto sa Iyang mga anak (tan-awa sa D&P 14:7). Kini nahimong posible pinaagi sa mga gasa ngari kanato sa Iyang Bugtong Anak: ang pagkatawo, Pag-ula ug Pagkabanhaw sa Manluluwas. Kini pinaagi sa kinabuhi ug misyon sa Manluluwas nga kita adunay kasigurohan nga kita mahimong manag-uban sa gugma ug magpuyo hangtud sa kahangturan isip mga pamilya.

Ang pagbati nga may dakong tinguha sa pagpauli diha na kanato sukad pa sa atong pagkatawo. Kanang talagsaon nga damgo dili matinuod kon walay hilabihan ka hugot nga pagtuo—paigo alang sa Espiritu Santo nga modala kanato sa paghinulsol, bunyag, ug mohimo ug motuman sa mga sagradong pakigsaad uban sa Ginoo. Kining hugot nga pagtuo nagkinahanglan og mahangturon nga kaisug sa mga pagsulay sa mortal nga kinabuhi. Dayon, sa sunod nga kinabuhi, kita pagaabiabihon sa atong Langitnong Amahan ug sa Iyang Bugtong Anak niana nga panimalay sa atong mga damgo.

Bisan niini nga kinabuhi kita makaangkon og kasiguradoan sa pag-abut niana nga adlaw ug mobati sa hingpit nga kalipay nga atong masayran kon sa katapusan kita moabut sa panimalay. Ang pagsaulog sa pagkatawo sa Manluluwas panahon sa Pasko naghatag kanato og espesyal nga kahigayunan sa pagsinati niadtong hingpit nga kalipay niini nga kinabuhi.

Daghan kanato ang namatyan og mga mahal sa kinabuhi. Kita mahimong gilibutan sa mga indibidwal kinsa nagtinguha sa pagguba sa atong hugot nga pagtuo diha sa ebanghelyo ug sa mga saad sa Ginoo nga kinabuhing dayon. Ang pipila kanato naproblema sa mga sakit ug sa kawad-on. Ang uban mahimong adunay panagbingkil diha sa ilang pamilya o wala na gayuy pamilya. Apan kita mahimong modapit sa Kahayag ni Kristo sa pagdan-ag kanato ug motugot kanato sa pagkakita ug pagbati sa pipila ka mga gisaad nga hingpit nga kalipay nga nagpaabut kanato.

Sama pananglit, samtang kita nagpundok nianang langitnong panimalay, kita pagaliyokan niadtong kinsa napasaylo na sa tanang sala ug kinsa nagpinasayloay sa usag usa. Kita mahimong motilaw niaana nga hingpit nga kalipay karon, ilabi na samtang kita mohinumdom ug mosaulog sa gasa sa Manluluwas ngari kanato. Siya mianhi sa kalibutan aron mahimong Kordero sa Dios, sa pagbayad sa kantidad sa tanang sala sa mga anak sa Iyang Amahan dinhi sa pagkamortal aron ang tanan mahimong mapasaylo. Sa panahon sa Pasko kita mobati og mas dakong tinguha sa paghinumdom ug pagpamalandong sa mga pulong sa Manluluwas. Siya mipasidaan kanato nga kita dili mapasaylo gawas kon kita mopasaylo sa uban (tan-awa sa Mateo 6:14–15). Kana sa kanunay lisud nga buhaton, mao nga kamo kinahanglan nga mag-ampo alang sa tabang. Kini nga tabang sa pagpasaylo kasagarang moabut kon kamo gitugutan nga makakita nga kamo nakapasakit og maayo o mas labaw pa nga sakit kaysa inyong nadawat.

Kon kamo mobuhat niana nga tubag sa inyong pag-ampo alang sa kaisug nga mopasaylo, kamo mobati og kagaan sa mga palas-anon diha sa inyong abaga. Ang pagdumot usa ka bug-at nga palas-anon. Samtang kamo mopasaylo, kamo mobati sa hingpit nga kalipay nga gipasaylo. Niining panahon sa Pasko kamo mahimong mopasaylo ug modawat sa gasa sa pagpasaylo. Ang pagbati sa kalipay nga moabut mahimong usa ka daklit nga kasinatian kon unsa ang atong mahimong bation nga magkapundok ngadto sa mahangturong panimalay nga atong gipangandoy.

Adunay laing daklit nga kasinatian nianang hingpit nga kalipay sa umaabut nga panimalay nga mas dali natong makita panahon sa Pasko. Kini mao ang pagbati sa paghatag uban sa usa ka manggihatagon nga kasingkasing. Kini mahimong moabut samtang kita mobati sa mga kinahanglanon sa uban labaw pa kaysa sa atong kaugalingon ug kon kita mobati unsa kamanggihatagon ang Dios sukad-sukad ngari kanato.

Kini makatabang aron makita ang pagkamabination sa uban panahon sa Pasko. Pila na ka higayon nga kita nagbilin og usa ka regalo diha sa atubangan sa pultahan, nanghinaut nga dili mamatikdan, dayon masayran na lamang nga aduna nay daghang regalo gikan sa wala magpaila nga anaa na didto? Kamo ba mibati, sama kanako, nga naaghat sa pagtabang og usa ka tawo unya inyong mahibaloan nga unsa ang inyong gibati nga ihatag mao gayud ang gikinahanglan niining tawhana nianang higayona? Kana usa ka talagsaon nga kasiguradohan nga ang Dios nasayud sa tanan natong mga panginahanglan ug nag-agad kanato sa pagtabang sa mga panginahanglan sa uban nga naglibut kanato.

Ang Dios nagpadala niadto nga mga mensahe ngari kanato uban sa dugang nga pagsalig panahon sa Pasko, nasayud nga kita mosanong tungod kay ang atong kasingkasing mas sensitibo sa ehemplo sa Manluluwas ug sa mga pulong sa Iyang mga sulugoon. Panahon sa Pasko, kita ingon og bag-o lang nakabasa ug natandog pinaagi sa mga pulong ni Haring Benjamin. Siya mitudlo sa iyang katawhan, ug siya nagtudlo kanato, nga ang malukpanong gasa sa pagpasaylo nga atong madawat kinahanglan nga mopabati kanato og usa ka hilabihan ka pagkamanggihatagon ngadto sa uban:

“Ug tan-awa, bisan niini nga panahon, kamo nagpanawag sa iyang ngalan, ug nagpangayo alang sa usa ka kapasayloan sa inyong mga sala. Ug siya mitugot ba nga kamo mangayo sa kawang? Wala; siya mibu-bu sa iyang Espiritu nganha kaninyo, ug mao ang nakahimo nga ang inyong mga kasingkasing kinahanglan nga mapuno uban sa hingpit nga kalipay, ug mao ang nakahimo nga ang inyong mga ba-ba kinahanglan mahunong nga kamo dili na makapamulong, busa hilabihan kadako ang inyong kalipay.

“Ug karon, kon ang Dios, kinsa naglalang kaninyo, diin kamo nagsalig alang sa inyong mga kinabuhi ug alang sa tanan nga kamo aduna ug anaa, mohatag nganha kaninyo sa bisan unsay inyong pangayoon nga matarung, diha sa hugot nga pagtuo, nagtuo nga kamo makadawat, O unya, unsa pa kaha nga kamo kinahanglan nga makigbahin sa kabtangan diin kamo aduna ngadto sa usag usa.

“Ug kon kamo mohukom sa tawo kinsa nagpakilooy kaninyo alang sa inyong kabtangan nga siya dili mamatay, ug nanghimaraut kaniya, unsa ka makiangayon ang inyong pagpanghimaraut sa pagpugong sa inyong kabtangan, nga dili inyo apan sa Dios, ngadto kinsa usab ang inyong kinabuhi gipanag-iya; ug gani kamo wala magpakilooy, ni maghinulsol sa butang nga inyong nabuhat.

“Ako moingon nganha kaninyo, alaot ngadto niana nga tawo, kay ang kabtangan mahanaw uban kaniya; ug karon, ako moingon niini ngadto niadto kinsa mga adunahan kalabut sa mga butang niini nga kalibutan” (Mosiah 4:20–23).

Kamo mibati na sa hingpit nga kalipay sa paghatag og limus ug pagdawat niini. Ang hingpit nga kalipay niining kinabuhia usa ka daklit nga kasinatian kon unsa ang atong bation sa kinabuhi nga umaabut kon kita manggihatagon dinhi tungod sa atong hugot nga pagtuo sa Dios. Ang Manluluwas mao ang atong talagsaon nga ehemplo. Panahon sa Pasko kita mamalandong og usab sa dugay nga panahon kon si kinsa Siya ug unsa siya kamanggihatagon kanato pinaagi sa pag-anhi sa kalibutan aron mahimo natong Manluluwas.

Isip Anak sa Dios, nga gipakatawo ngadto kang Maria, Siya adunay gahum sa pagbuntog sa tanang tintasyon ngadto sa sala. Siya mipuyo og hingpit nga kinabuhi aron siya ang mahimong walay kinutuban nga sakripisyo, ang walay hugaw nga Kordero nga gisaad gikan sa katukuran sa kalibutan (tan-awa sa Pinadayag 13:8). Siya miantus sa paghingutas sa sayop sa atong mga sala ug sa tanang mga sala sa anak sa Langitnong Amahan nga kita mahimong mapasaylo ug mobalik sa panimalay nga walay lama.

Siya mihatag kanato sa gasa sa usa ka kantidad nga dili nato matugkad. Kadto usa ka gasa nga wala Niya kinahanglana sa Iyang Kaugalingon; Siya wala magkinahanglan sa pagpasaylo. Ang hingpit nga kalipay ug pasalamat nga atong gibati alang sa Iyang gasa karon mapadako ug mahimong molungtad hangtud sa kahangturan kon kita mopasidungog ug mosimba Kaniya didto sa atong langitnong panimalay.

Ang panahon sa Pasko mohatag kanato og kadasig sa paghinumdom Kaniya ug sa Iyang walay kinutuban nga pagkamanggihatagon. Ang paghinumdom sa Iyang pagkamanggihatagon makatabang kanato nga mobati ug motubag sa inpirasyon nga adunay usa ka tawo kinsa nagkinahanglan sa atong tabang, ug kini makahimo kanato sa paglantaw sa kamot sa Dios nga nagkab-ot kanato sa dihang Siya nagpadala og usa ka tawo nga motabang kanato, nga kanunay Niyang gibuhat. Adunay hingpit nga kalipay sa paghatag ug sa pagdawat sa pagkamanggihatagon nga dinasig sa Ginoo, ilabi na sa Pasko.

Adunay laing daklit nga kasinatian sa langit nga mas daling makita panahon sa Pasko. Kini mao ang kahayag. Ang Langitnong Amahan migamit sa kahayag aron sa pagpahibalo sa pagkatawo sa Iyang Anak, ang atong Manluluwas (tan-awa sa Mateo 2; 3 Nephi 1). Usa ka bag-ong bitoon nga makita sa Silangan ug Kasadpang Bahin sa Kalibutan. Kini migiya sa Mga Mago padulong sa bata didto sa Bethlehem. Bisan ang dautan nga si Haring Herodes nakamatikod sa timailhan; siya nahadlok niini tungod kay siya dautan. Ang Mga Mago naglipay tungod sa pagkatawo ni Kristo, kinsa mao ang Kahayag ug ang Kinabuhi sa Kalibutan. Tulo ka adlaw nga kahayag nga walay kangitngit mao ang timailhan sa Dios nga gihatag ngadto sa mga kaliwatan ni Lehi, nagbalita sa pagkatawo sa Iyang Anak.

Kita nakahinumdom panahon sa Pasko nga dili lamang ang kahayag ang mipahibalo sa pagkatawo ni Kristo ngari sa kalibutan apan ang kahayag usab nga naggikan Kaniya. Daghang mga saksi ang mimatuod niana nga kahayag. Si Pablo mipamatuod nga iyang nakita kini diha sa dalan padulong sa Damascus:

“Nakita ko diha sa dalan ang usa ka kahayag gikan sa langit, nga masilaw pa kaysa adlaw, nga nagsidlak libut kanako ug kanila nga nanagkuyog kanako.

“Ug sa nangatumba kaming tanan sa yuta, nadungog ko ang usa ka tingog nga misulti kanako sa pinulongan nga Hebreohanon nga nag-ingon, Saulo, Saulo, nganong ginalutos mo ako? gisakitan ikaw sa imong pagpatid batok sa mga igtotudyok.

“Ug nangutana ako, Kinsa ka ba, Ginoo? Ug ang Ginoo mitubag, Ako mao si Jesus nga imong ginalutos” (Mga Buhat 26:13–15).

Ang batang lalaki nga si Joseph Smith mipamatuod nga siya nakakita og usa ka talagsaon kaayo nga kahayag sa kakahoyan sa Palmyra, New York, sa sinugdanan sa Pagpahiuli:

“Dinhi niini nga higayon sa dako nga kahadlok, ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“Diha-diha nga kini mipakita ako nakakaplag sa akong kaugalingon nga giluwas gikan sa kaaway nga migapos kanako. Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).

Ingon niana nga kahayag ang makita sa atong langitnong panimalay. Kini makahatag dayon kanato og hingpit nga kalipay. Apan bisan niini nga kinabuhi kamo napanalanginan og usa ka bahin niadtong talagsaon nga kasinatian, tungod sa Kahayag ni Kristo. Ang matag tawo nga natawo sa kalibutan nakadawat sa kahayag isip usa ka gasa (tan-awa sa Moroni 7:16). Hunahunaa ang mga higayon nga kamo nakasinati nga nahimo kamong usa ka saksi nga ang Kahayag ni Kristo tinuod ug bililhon. Kamo makamatikod gumikan niining talagsaong mapaniguruong kasulatan nga kamo nagiyahan pinaagi niana nga kahayag:

“Ug kana nga dili makahatag og kaayohan dili gikan sa Dios, ug iya sa kangitngit.

“Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw ka hayag hangtud sa hingpit nga adlaw.

“Ug … ako moingon niini aron kamo makahibalo sa kamatuoran, nga kamo unta mopapahawa sa kangitngit gikan diha kaninyo” (D&P 50:23–25).

Sa kalibutan nga gipangitngitan pinaagi sa dautang mga imahe ug bakak nga mga mensahe, kamo napanalanginan nga mas daling makaila sa mga kidlap nga pahinumdom sa kahayag ug kamatuoran. Kamo nakakat-on sa inyong kaugalingon nga ang kahayag mas mosanag samtang inyo kining dawaton sa dakong kalipay. Kini mas mosanag pa gayud hangtud sa hingpit nga adlaw kon kita maanaa sa presensya sa Tinubdan sa kahayag.

Ang kahayag mas daling maila panahon sa Pasko, kon kita mas moampo aron masayud unsa ang gusto sa Dios nga ipabuhat kanato ug siguro mas mobasa sa mga kasulatan ug daling motubag sa mga sugo sa Ginoo. Kon kita mopasaylo ug mobati nga gipasaylo, kon atong gipataas ang mga kamot sa nawad-an og paglaum (tan-awa sa D&P 81:5), atong gipasaka ang atong kaugalingon samtang kita nagpadulong ngadto sa Tinubdan sa kahayag.

Kamo nakahinumdon nga ang Basahon ni Mormon mihulagway sa mahimayaong panahon sa dihang ang matinud-anon nga mga disipulo sa Manluluwas midan-ag sa Iyang kahayag aron ang uban makakita (tan-awa sa 3 Nephi 19:24–25). Kita naggamit sa kahayag aron sa pagsaulog sa panahon sa Pasko. Ang atong pagsimba sa Manluluwas ug ang atong pagpangalagad ngadto Kaniya nagdala og kahayag ngadto sa atong mga kinabuhi ug sa mga kinabuhi nga naglibut kanato.

Kita uban sa pagsalig makahimo og tumong aron sa paghimo niining Pasko nga mas hayag pa kaysa miagi ug sa matag tuig nga mosunod kini mas mohayag pa. Ang mga pagsulay sa mortalidad mahimong mas mograbe, apan alang kanato, ang kangitngit dili mograbe kon atong ipunting ang atong mga mata nga mas matinud-anon ngadto sa kahayag nga mosanag kanato kon kita mosunod sa Agalon. Siya mogiya kanato ug motabang kanato subay sa dalan padulong sa taas ngadto sa panimalay nga atong gipangandoy.

Adunay mga higayon, kanunay sa Pasko, nga kita mibati og bahin unsa unya ang atong masinati kon kita sa katapusan mobalik na ngadto sa panimalay sa Amahan kinsa nahigugma kanato ug motubag sa atong mga pag-ampo ug sa Manluluwas kinsa mihayag sa atong kinabuhi ug mibayaw kanato.

Ako mopamatuod nga tungod Kaniya, kamo mahimong adunay kasiguradoan nga kamo makauli sa panimalay dili lamang panahon sa Pasko apan usab mopuyo hangtud sa kahangturan uban sa pamilya kinsa inyong gihigugma ug kinsa naghinigugmaay sa usag usa.