Alang Kanato ang Usa ka Bata Natawo
Ang propeta sa unang panahon nga si Isaias mitagna sa pagkatawo sa Mesiyas ug mipadayag og daghan kabahin sa Iyang mga buluhaton.
Daghang mga dekada sa wala pa ang pagkatawo ni Jesukristo, si propetang Isaias mirekord sa mga butang nga gipadayag ngadto kaniya kabahin sa mga panghitabo sa pagkatawo ni Kristo. Usa niining panagna, makita sa Isaias 9:6, mohatag kanato og daghang mga kahibalo bisan sa gamay lang nga mga pulong niini kabahin sa Manluluwas ug sa Iyang tulumanon sa atong mga kinabuhi ug sa plano sa Langitnong Amahan. Ania ang pipila sa mga katin-awan sa mga ideya nga gipasabut niini nga bersikulo.
Ang Usa ka Bata Natawo, ang usa ka Anak nga Lalaki Gihatag
Ang Manluluwas gipadayag ngadto kang Adan, ang unang tawo, isip Bugtong Anak sa Dios (tan-awa sa Moises 5:7, 9; 6:52, 57, 59, 62). Sukad niadto ang tanang mga balaang propeta mipamatuod sa pagkatawo sa Anak sa Dios sa unod aron motubos sa Iyang mga katawhan (tan-awa sa Mga Buhat 10:43; Jacob 4:4)
Unsa man ang gipasabut sa pagkatawo ni Kristo?
Ang anghel kinsa mipahibalo sa pagkatawo sa Manluluwas ngadto sa mga magbalantay sa karnero mideklarar sa “maayong balita sa dakong kalipay, nga magaabut sa tanang mga tawo” (Lucas 2:10).
Sa dihang si Nephi nakakita sa panan-awon ni birheng Maria nagkupot sa batang Jesus, siya mibati sa pagsigurado “sa gugma sa Dios, nga makatag sa tibuok kalibutan diha sa mga kasingkasing sa mga anak sa mga katawhan” (1 Nephi 11:22).
Ang Manluluwas Mismo sa Iyang Kaugalingon mideklarar nga “Gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag kon dili may kinabuhing dayon” (Juan 3:16).
Ang Kagamhanan Igatungtong sa Iyang Abaga
Sa karaang Israel, ang mga pari ug mga hari gisul-uban og kupo [robe] ug sa simbolo sa ilang mga buhatan diha sa ilang mga abaga (tan-awa sa Isaias 22:21–22). Si Jesukristo, ang anak sa Dios, mianhi “ingon nga may kagahum” (Mateo 7:29). Ug Siya ang magmando isip Hari sa tanang mga hari ug ang Ginoo sa tanang mga ginoo panahon sa Milenyum, kon “siya maghari kansang katungod mao ang paghari” (D&P 58:22; tan-awa usab sa Mga Artikulo sa Hugot nga Pagtuo 1:10).
Kahibulongang Magtatambag
Ang pulong nga kahibulongan gikan sa Hebreohanon nga pinulongan alang sa “milagro,” nagsugyot sa milagro sa pagkatawo sa Mesiyas ug sa milagro nga Iyang pagabuhaton panahon sa Iyang kinabuhi. Ang pulong nga magtatambag may kalabutan sa mga sugo ug sa mga pagtulun-an sa Mesiyas nga mogiya kanato pagbalik ngadto sa Langitnong Amahan. Sama sa propeta sa Basahon ni Mormon nga si Jacob miingon, “[Ang Ginoo] nagtambag diha sa kaalam, ug diha sa kaangayan, ug diha sa dako nga kalooy, ibabaw sa tanan niya nga mga buhat” (Jacob 4:10).
Ang Dios nga Makagagahum
“Tuohi si Jesukristo, ang Anak sa Dios, ang labing talagsaon [nga tawo] sa panahon karon ug sa kahangturan. Tuohi nga ang iyang dili matupngan nga kinabuhi nagsunod dugay na kaniadto sa wala pa mabuhat ang kalibutan. Tuohi nga siya ang Tiglalang sa yuta nga atong gipuy-an. Tuohi nga siya mao si Jehova sa Daang Tugon, nga siya mao ang Mesiyas sa Bag-ong Tugon, nga siya namatay ug nabanhaw, … ug siya buhi, ang buhing Anak sa buhi nga Dios, atong Manluluwas ug atong Manunubos.”
Presidente Gordon B. Hinckley (1910–2008), “Be Not Faithless,” Tambuli, Abr. 1990, 4.
Ang Amahan nga Walay Katapusan
“Si Jehova, kinsa mao si Jesukristo ang Anak ni Elohim, gitawag og ‘ang Amahan,’ ug gani ‘mao gayud ang Amahan sa Kahangturan sa langit ug sa yuta’ (tan-awa sa … Mosiah 16:15). Uban sa susama nga kahulugan si Jesukristo gitawag og “Ang Amahan nga Walay Katapusan” (Isa. 9:6; itandi sa 2 Ne. 19:6). … Si Jesukristo, isip Tiglalang, kanunay nga gitawag nga Amahan sa langit ug sa yuta … ; ug tungod kay ang Iyang paglalang adunay kalidad nga mahangturon angayan lamang nga Siya pagatawagon nga Amahan nga Walay Katapusan sa langit ug yuta.”
“The Father and the Son: A Doctrinal Exposition by the First Presidency and the Quorum of the Twelve Apostles,” Ensign, Abr. 2002, 13; gikan sa Improvement Era, Ago. 1916, 934–42.
Ang Prinsipe sa Pakigdait
“Tingali kita nahisalaag gikan sa dalan nga modala ngadto sa kalinaw ug nakita ang panginahanglan nga mohunong sa makadiyot, sa pagpamalandong, ug sa paghinuktok sa mga pagtulun-an sa Prinsipe sa Pakigdait ug hukman ang paglakip niini diha sa atong mga panghunahuna ug mga aksyon ug mopuyo sa mas taas nga balaod, molakaw sa mas tungason nga dalan, ug mahimong mas maayo nga disipulo ni Kristo.”
Presidente Thomas S. Monson, “Finding Peace,” Liahona, Mar. 2004, 3.
“Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” Juan 14:27.
“Kay alang kanato ang usa ka bata matawo, alang kanato ang usa ka anak nga lalaki gihatag: ug ang kagamhanan igatungtong sa iyang abaga: ug ang iyang ngalan pagatawgon nga Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait” (Isaias 9:6).
Gikan sa wala: langit nga background © Digital Vision; Ang Propetang Isaias Nanagna sa Pagkatawo ni Kristo, pinaagi ni Harry Anderson; Kay Alang Kanato ang Usa ka Bata Natawo, pinaagi ni Simon Dewey, sa maayong kabubut-on sa Altus Fine Art; langit nga background pinaagi ni Steve Tregeagle