Ang Espirituhanong mga Gasa nga Gihatag ngadto sa Presidente sa Stake

Samtang ang usa ka stake president sa kasagaran maggikan sa kasamtangan nga posisyon sa pagkapangulo sa stake, aduna gihapoy mga eksepsyon. Sa usa ka higayon kami miinterbyu og mga kaigsoonan gabii na kaayo, wala mobati sa kumpirma sa Espiritu diha sa maayong mga tawo nga among nahimamat. Sa katapusan, human nga among nahurot og interbyu ang naa sa giandam nga listahan, kami miadto sa mga maayong mga tawo nga sa kasamtangan wala mangalagad sa posisyon sa pagkapangulo. Sa dihang kami nakahimamat sa usa ka magtutudlo sa Gospel Doctrine alas 10:00 sa gabii, ang Ginoo gamhanang mikumpirma nga siya mao ang Iyang gipili. Paghuman og paabut sa call among nasayran nga siya anaa lamang sa iyang balay, nagpaabut sa among tawag. Mga pipila ka buwan, sa wala pa kahibalo kabahin sa pag-ilis og stake presidency, siya ug ang iyang asawa nakamata sa gabii nasayud nga ang calling moabut kaniya.

Kadtong nangalagad isip mga presidente sa stake wala mag-apas sa office nga ilang gihuptan. Ang tanan napaubos ug ang pipila nasanapan sa pagbati dihang sila gitawag. Sa dihang akong gitawag ang usa ka presidente sa stake sa Europe kinsa miyembro na sa Simbahan mga 10 ka tuig, siya naghangos sa pagsulti, “O ayaw, ayaw, dili ako. Dili ko makahimo niana.” Maayo gani, ang iyang talagsaong asawa, nga diha sa iyang kilid, migakos kaniya ug miingon, “Mahal, mahimo gyud na nimo. Ako nasayud nga mahimo nimo.” Siya sakto, ug siya mialagad nga maayo kaayo.

Sa Pilipinas, usa ka tawo kinsa nakakita sa dali nga pagtubo sa Simbahan uban sa dili pa kaayo sinati sa pagpangulo, mitubag sa dihang gitawag, “O ayaw, dili ako. Ako tigulang na kaayo.” Sa dihang iyang nasayran nga ang pipila sa mga miyembro sa Napulog Duha may tulo ka dekada ang pagka maguwang kaniya, iya kining gidawat ug maayo kaayong mialagad.

“Kamo wala magpili kanako, hinonoa ako mao ang nagpili kaninyo, ug nagtudlo kaninyo” (Juan 15:16), miingon ang Manluluwas. Kita wala magtinguha o mobalibad sa mga call nga moabut kanato.

Sa mga panahon, mahimong sa wala pa, panahon sa, o human sa call, ang Ginoo momatuod niana nga tawo nga gitawag nga ang iyang call iya sa Dios. Usa ka batan-on nga presidente sa stake ang mi-report sa pamatuod nga gihatag kaniya sa ingon ani nga paagi:

“Sa dihang ako giinterbyu, ako 32 anyos ug nakaalagad og upat ka tuig isip bishop. Usa sa nagpahigayon sa interbyu nangutana kanako og duha ka pintok nga pangutana: (1) Giunsa nimo pag-angkon ang imong pagpamatuod? ug (2) Mahimo ba nga imong ipakigbahin ngari kanamo ang imong pagpamatuod sa Manluluwas? Ako mipakigbahin sa akong kasinatian panahon sa akong pagka batan-on, sa mubong panahon human sa pagkamatay sa akong mama, dihang akong nakat-onan sa akong kaugalingon mismo ang kamatuoran sa gipahiuli nga ebanghelyo, ilabi na gayud kabahin sa Basahon ni Mormon.

“Samtang ako mipakigbahin sa akong pagpamatuod sa Manluluwas, ako nakadawat og usa ka pagsaksi nga ako ang tawagon nga sunod nga presidente sa stake. Ako midrayb padulong sa balay ug misulti sa akong asawa kabahin sa akong kasinatian. Sa dihang siya akong gisultihan nga naa koy hunahuna nga ako ang tawagon nga sunod nga presidente sa stake, siya mitubag, ‘Ikaw maayo, apan dili gyud ka ana ka maayo.’ Ang telepono mibagting duha ka oras ang milabay, ug ako gidapit sa pagbalik uban sa akong asawa, ug ang call gihatag.”

Pagkahuman sa pagpataas sa kamot alang sa pagpaluyo sa kinatibuk-ang sesyon sa komperensya sa stake, kami nga gipadala mopandong sa among kamot sa ulo sa bag-ong presidente sa stake ug motugyan kaniya sa mga yawe sa priesthood nga gikinahanglan aron sa pagdumala ug sa pagdirekta sa mga buluhaton sa stake. Kini nga mga yawe sa pagdumala sa stake moabut pinaagi sa pagdelegar gikan sa Presidente sa Simbahan ug sa uban pang 14 ka mga Apostoles kinsa nagkupot sa tanang mga yawe dinhi sa yuta. Anaa niining mga yawe mao ang espirituhanong katungod ug gahum.

Ang Ginoo kanunay naghatag og mga yawe ngadto sa Iyang pinili nga mga Apostoles. Ngadto kang Pedro Siya mipahayag “Hatagan ko ikaw sa mga yawe sa gingharian sa langit: ug bisan unsay imong pagabugkuson dinhi sa yuta, didto sa langit pagailhon kini nga binugkos: ug bisan unsay imong pagaluagan dinhi sa yuta, didto sa langit pagailhon kini nga linuagan” (Mateo 16:19). Ang pipila niining mga yawe dayon ipakigbahin ngadto sa lokal nga mga lider. Sa Zarahemla, si Alma “mi-orden og mga pari ug mga anciano, pinaagi sa pagpandong sa iyang mga kamot sumala sa kapunongan sa Dios, aron sa pagdumala ug pagbantay ibabaw sa simbahan” (Alma 6:1).

Makapaikag kaayo, adunay usa ka higayon nga ang pagkuha og rekomen sa templo nagkinahanglan og pirma gikan sa Presidente sa Simbahan. Karon kini nga katungod anaa na diha sa mga yawe nga gidelegar ngadto sa mga presidente sa stake. Uban sa iyang mga magtatambag, siya usab morekomendar og mga bishop ngadto sa Unang Kapangulohan ug mo-orden kanila kon sila aprobahan; siya moaprobar niadtong kinsa i-orden ngadto sa Melchizedek Priesthood; siya morekomendar ug moset-apart og full-time nga mga misyonaryo; ug siya moalagad isip usa ka maghuhukom sa Israel sa pagtabang niadtong may bug-at nga mga sala aron sa pag-angkon og hingpit nga kapasayloan. Siya mogiya sa mga buluhaton ug mga desisyon sa mga bishop ug mga presidente sa branch diha sa stake.

Sa ingon niini nga mga kapasidad, ang Ginoo mobu-bu sa iyang pagpadayag ngadto sa Iyang mga presidente sa stake. Usa ka presidente sa stake nga nagpuyo sa habagatang bahin sa Estados Unidos mipakigbahin sa mosunod nga kasinatian ngari kanako:

“Niadtong Oktubre 2007, usa ka sister ang miduol kanako aron sa pagkuha sa iyang temple recommend. Panahon sa interbyu, ako nangutana kaniya kon ang iyang bana moari ba usab kanako alang sa iyang rekomen pagkahuman sa iyang interbyu. Siya miingon kanako nga ang iyang bana wala na moadto sa templo sobra na sa 20 ka tuig ug sila wala gayud mabugkos sa templo sulod sa ilang 40 ka tuig nga kaminyoon. Ako mibati og kusog nga pagdasig sa pagbisita niini nga igsoong lalaki diha-diha dayon. Kusog kaayo ang pagdasig nga ako mibiya sa akong opisina, nakit-an ko siya sa pikas bahin sa building, ug midala kaniya og balik ngadto sa akong opisina alang sa usa ka interbyu. Human sa usa ka interbyu, niinang higayona kami giapilan sa iyang bishop, siya gihatagan og rekomen sa templo. Kini usa ka emosyonal kaayo nga kasinatian alang kanamong tanan, ilabi na sa iyang asawa. Ako nakadawat og usa ka imbitasyon sa ulahing bahin nianang semanaha sa pagtambong sa ilang pagbugkos sulod sa templo.

“Sa sayo sa 2008, mga upat ka bulan human nga kining magtiayon nabugkos sa templo, kini nga igsoong lalaki mibangon sayo sa buntag aron motrabaho ug nakuyapan ug namatay sa ilang panimalay. Ako mapasalamaton sa hangtud nga ako naminaw sa mga pag-aghat sa Espiritu ug miawhag niining igsoong lalaki sa pagbuhat kon unsa ang iyang kinahanglang buhaton sa iyang kinabuhi.”

Ang Ginoo mipahayag nga ang stake mao ang “usa ka panalipod, ug usa ka dangpanan gikan sa unos” (D&P 115:6). Ang usa ka presidente sa stake mao ang magbalantay sa Ginoo kinsa kinahanglang mosigurado nga ang diwa sa kalingkawasan ug esprituhanong kaluwasan mabati sulod sa pagpakigdait sa Simbahan. Siya kinahanglan nga mabinantayong mosigurado nga ang doktrina nga gitudlo tinuod ug putli. Si Presidente Gordon B. Hinckley (1910–2008) kausa miingon:

“Ang mga katungdanan sa usa ka teacher sa Aaronic Priesthood mahimong ma-apply ngadto sa presidente sa stake. Siya ‘mao ang tigbantay diha sa [tibuok stake], ug magpaduol ug maglig-on [sa mga miyembro],

“‘Ug ang pagtan-aw nga walay kadautan sa simbahan, ni kapintas sa usag usa, ni pamakak, paglibak, ni pagsulti og kadautan;

“‘Ug ang pagtan-aw nga ang simbahan magkatigum sa kanunay, ug usab ang pagtan-aw nga ang tanan nga mga sakop naghimo sa ilang katungdanan’ (D&P 20:53–55).”¹

Ang iyang buluhaton naglakip sa pagdasig kon unsaon sa paglig-on sa mga pamilya, paglig-on sa mga bag-o nga kaliwatan, pagdapit og mas daghan sa mga anak sa Langitnong Amahan ngadto sa makalimpyo nga mga tubig sa bunyag, pagduol niadtong nagkawala sa Simbahan, ug modala sa mga ordinansa sa templo ngadto sa buhi nga mga miyembro ug niadtong kinsa nag-una kanato.

Sa tanan niining importante nga mga responsibilidad, ang Ginoo nagpanalangin sa mga presidente sa stake uban sa pagpalambo sa espirituhanong mga gasa. Sa ika-46 nga seksyon sa Doktrina ug mga Pakigsaad, ang Ginoo nagsulti og daghang mga espirituhanong mga gasa ug mipahayag:

“Kay dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios.

“Ngadto sa uban gihatag ang usa, ug ngadto sa uban gihatag ang lain, nga ang tanan makaangkon og kaayohan pinaagi niana” (D&P 46:11–12).

Dayon ang Ginoo midugang, “Ngadto sa uban ingon nga ang Dios motudlo ug mo-orden sa pagbantay sa simbahan … nga kini mahatag ngadto kanila sa pag-ila sa tanan niadto nga mga gasa … nga adunay pangulo, aron ang matag sakop mahatagan og kaayohan pinaagi niana” (D&P 46:27, 29).

Adunay mga higayon nga kining mga gasa may kalabutan sa espirituhanong mga saad nga ang Ginoo motuman. Usa ka kanhi presidente sa stake sa Brazil ang mipakigbahin ngari kanako niining kasinatian:

“Usa ka matinud-anon nga inahan nga walay bana uban sa iyang upat ka mga anak nanlimbasug sa kalisud. Ako nangutana kaniya, ‘Sister, ang imo bang mga anak nanambong kanunay sa seminary?’ Siya mitubag, ‘Ako adunay daghan kaayo nga mga problema ug nagpuyo layo kaayo sa simbahan. Kini delikado.’ Nianang higayona, ako mibati og kusog kaayo nga pag-aghat sa pagtambag ug pagsaad kaniya. Ako miingon, ‘Kon ikaw walay kwarta, ikaw kinahanglan nga molakaw og daghang kilometro uban kanila. Ubani sila; tambong sa klase uban kanila. Kon imo kanang buhaton, imong maluwas ang imong mga anak, ug ang tanan maminyo sa templo.’ Ako natingala sa unsay akong gisulti apan ako dili makalimud sa gahum sa inspirasyon.

‘Siya midawat sa tambag ug human sa daghang mga tuig siya milakaw uban sa iyang mga anak ngadto sa seminary. Ang iyang saad karon natuman. Ang tanan naminyo sa templo, ug ang iyang anak nga lalaki nag-alagad karon isip bishop sa iyang ward.

Siguro ang usa sa labing nindot nga gasa nga gihatag ngadto sa usa ka presidente sa stake mao ang mas lawum ug mas lapad nga paghigugma ngadto sa mga tawo nga siya gitawag sa pag-alagad. Sa dihang ako gitawag isip usa ka presidente sa stake, akong nakita ang akong kaugalingon nga nalunopan uban sa gamhanang pagbati og kabalaka ug paghigugma nga akong nabati alang niadtong anaa sa stake. Bisan niadtong kinsa adunay bug-at nga mga sala, ako mibati og dakong pagbati sa impatiya ug tinguha sa pagtabang. Kini nga mga pagbati sa gugma kanunay ubanan sa tinguha sa pagtabang sa mga miyembro nga mahimong tinud-anay nga kinabig ngadto sa Manluluwas ug sa Iyang gipahiuli nga ebanghelyo. Nag-alagad ako og daghang mga tuig isip usa ka counselor, apan sa dihang anaa na nako ang mga yawe sa presidency, ang mga pagbati mas gamhanan ug madasigon. Ako mibati nga tingali ako nakadawat og bahin sa gasa sa gugmang putli nga gihisgut ni Mormon sa dihang siya mitambag, “Pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo” (Moroni 7:48).

Kini nga mga pagbati modala sa usa ka presidente sa stake sa pagtabang, ug ang mga milagro mosunod. Usa ka presidente sa stake gikan as South America misaysay og usa ka ehemplo kon sa unsa nga paagi nga kini nga gugma nakapatandog kaniya sa pagpangita sa usa ka tawo kinsa nawala:

“Ako adunay kusog nga impresyon nga ako kinahanglan nga mosulay sa pagpangita og usa ka igsoon nga lalaki kinsa nag-alagad og dugay nga panahon isip akong kompanyon sa misyon. Siya naminyo ug dili na kaayo aktibo sa Simbahan. Ang iyang rekord sa pagkamiyembro anaa sa usa ka gamay nga yunit mga 150 ka kilometros [93 ka milya] gikan sa stake center. Ako mibiyahe didto ug nakig-istorya sa branch president, kinsa misulti kanako nga ang akong kanhi nga kompanyon sa misyon nagpuyo sa layong dapit sa nasud. Ang presidente mihatag kanako og mga direksyon ngadto sa gamay nga balangay. Pagkataud-taud ang aspaltadong dalan nahimo nang abugon nga dalan. Pagkahuman sa daghang mga kilometro, ako nakaamgo nga ako nasaag. Gipahunong nako ang sakyanan ug naghunahuna nga dili na lang mopadayon. Init kaayo kadtong adlawa, ug ang sakyanan walay aircon. Ang abug gikan sa dalan nakapalisud alang sa akong asawa ug sa akong mga anak. Ako miluhod sa dalan ug nangayo og tabang gikan sa Ginoo.

“Human sa pipila ka oras, kami miabut sa usa ka gamay nga balangay ug nakit-an ang akong kompanyon sa misyon. Ako siyang gidapit sa pagbalik. Siya nahimong aktibo sa Simbahan ug mialagad sa daghang mga posisyon sa pagpangulo. Ang iyang anak nga lalaki mialagad og usa ka halangdong misyon, ug karon ang akong higala ug kanhi kompanyon usa na ka counselor sa bishopric.

Adunay gahum sa katungdanan. Ang Ginoo mobarug uban sa Iyang mga presidente sa stake. Gikan kini sa usa ka presidente sa stake sa Ecuador: “Ako nakabantay sa usa ka lalaki sa stake kinsa sa kanunay makita nga dili malipayon. Usa ka adlaw ako nakadawat og kusog nga impresyon nga kinahanglan ko nga mobisita niining tawhana. Ako midrayb diha-diha dayon padulong sa iyang panimalay. Siya misulti kanako nga siya naguol pag-ayo kay sulod sa daghang mga tuig siya wala na makaistorya sa iyang amahan. Siya mipasabut nga ang iyang amahan gahi og kasingkasing ug miputol sa ilang relasyon. Gipangutana nako siya kon siya gusto ba nga ayohon ang sitwasyon. Human og drayb padulong sa balay sa iyang papa, ako mipahunong sa sakyanan sa ilang atubangan. Ako mituk-tok sa pultahan ug nakadungog og usa ka tingog nga nangutana, ‘Si kinsa na?’ Ako nakaila sa tingog sa iyang papa ug mitubag, ‘Ang imong stake president, Brother.’ Iyang giablihan ang pultahan og nakakita kanako nga nagbarug kilid sa iyang anak nga lalaki. Walay bisan usa ka pulong, sila naggaksanay sa usag usa ug misugod paghilak. Ang sitwasyon naayo na.”

Sa kalibutan adunay labaw pa sa 2,800 ka mga presidente sa stake. Sa daghang mga pamaagi, sila ordinaryo nga mga tawo—sama kanimo ug kanako. Sila nagtrabaho sa ilang kaluwasan sama nga kita nagtrabaho sa atoa. Apan sila nakadawat og talagsaon nga calling. Ang mga kamot gipandong sa ilang mga ulo, ug sila nakadawat og mga yawe sa priesthood.

Ako nakahimamat na og gatusan ka mga presidente sa stake. Sila mga tawo nga may nabuhat ug adunay integridad sa ilang personal ug propesyonal nga mga kinabuhi. Sila napuno sa hugot nga pagtuo, nga may determinadong tinguha sa pagpahimuot sa Ginoo.

Ako nakabisita sa ilang mga panimalay, miluhod uban kanila sa pag-ampo, ug nakadungog sa ilang kinasingkasing nga pagpangamuyo ngadto sa Langitnong Amahan. Ako mibati sa gahum sa Ginoo ngadto kanila. Ang Ginoo nahigugma kanila ug mihatag kanila sa mga espirituhanong mga gasa.

Kitang tanan mag-ampo alang sa atong presidente sa stake. Kitang tanan mobarug sa iyang kilid ug motabang kaniya. Kita maminaw kaniya ug mosalig kaniya. “Ug ang Israel maluwas … ; ug pinaagi sa mga yawe diin Ako naghatag sila pagagiyahan, ug dili na pagalibugon” (D&P 35:25).