Uban sa Gugma gikan sa Akong mga Sister

Sa nagkaduol ang Pasko, mas mibug-at ang akong kasingkasing. Sa Nobyembre, ang akong bana ug ako walay regular nga trabaho. Ako ang mibayad sa abang sa balay, kuryente, ug sa telepono gikan sa akong nagkagamay nga sweldo, ug ang akong bana mibayad sa bayronon sa sakyanan gikan sa iyang nagkagamay nga sweldo. Ang nahabiling kwarta paigo lamang nga makasuporta kanamo. Inigka Disyembre adunay mas daghang trabaho ug mobalik na sa normal, apan kami dili sweldohan hangtud dili moabut ang Enero. Ubos niini nga kahimtang, bisan gani ang panihapon sa Pasko lisud gayud kaayo.

“Ang tanan mamaayo ra,” ako miingon sa akong kaugalingon. Niadtong ting-init ang akong bana nanguha og daghan kaayong mga raspberry, ug gihimo ni namong jam. Kami maghimo og mga pancake ug jam ug maghimo og among kaugalingong mga regalo. Apan sa dihang ang among tulo ka anak nga mga babaye (nga nanag-edad og 6, 8, ug 14) malipayong nagsugod sa pag-adurno og mga garland nga ilang hinimo, samtang sila nag-istoryahanay kabahin kon unsa ang ihatag sa ilang mga ginikanan ngadto kanila panahon sa Pasko, ang akong kasingkasing nasakitan.

Usa ka gabii ang akong mga visiting teacher miabut sa wala damha nga pagbisita. Ako wala nay igsoong mga lalaki ug mga babaye sa akong kaugalingon, mao nga ang mga sister sa Relief Society sa akong branch—ilabi na sa akong mga visiting teacher—tinud-anay nahimo na nakong mga igsoon. Nianang gabhiona sila mipakigbahin og usa ka makapainteres nga leksyon, dayon misugod sa pag-istoryahanay kabahin sa umaabut nga Pasko. Ako misiguro kanila nga ang tanan mamaayo ra apan miingon nga kini usa ka “looy” nga Pasko alang kanamo. Sila misiguro kanako nga sila mag-ampo alang sa among pamilya.

Usa ka adlaw sa dihang ang akong bana miabut aron sa pagkuha kanako gikan sa trabaho, siya miingon nga ang tanan sa balay dili na gayud makapaabut sa akong pag-abut. Usa ka sister gikan sa among branch nagbilin og daghang mga kahon. Sa dihang amo kining giablihan, kini aduna sa tanang mga lamiang pagkaon alang sa panahon: prutas, mga cooky, candy, pipila ka mga grocery, mga pang-adorno, ug mahigugmaong giputos nga mga regalo. Ang akong mga mata napuno sa mga luha sa pagpasalamat. Ug kadto dili lamang mao ang katapusan. Ang pamilya sa usa sa akong mga visiting teacher misurprisa kanamo sa buntag sa Pasko og usa ka kahon sa mga regalo.

Sa katapusan ang among “looy” nga Pasko nahimo gayud nga malipayon. Ang among panimalay napuno dili lamang sa diwa sa Pasko apan usab sa mainiton ug gugma sa akong mga visiting teacher ug sa uban pang mga miyembro sa among branch. Ako nakasabut nga ang Ginoo sa tinud-anay dili mohatag sa tanan natong mga panginahanglan apan sa kasagaran pinaagi sa ubang mga tawo—ilabi na niadtong Iyang gi-assign ug gidasig nga motan-aw ug moamuma kanato.