Ako Mohinumdom ni Jesukristo

Tangtanga ang pahina H12 gikan sa magasin, ug ipapilit kini sa baga nga papel. Pil-a ang booklet sa sakrament diha sa gituldokan nga mga linya. Kon magkanta kamo sa himno sa sakrament diha sa simbahan, paminawa unsay gisulti sa mga pulong mahitungod ni Jesukristo. Sa inyong pag-uli matag semana, pagsulat og usa ka butang sa inyong booklet nga inyong nakat-unan mahitungod ni Jesus gikan sa himno.

1. Akong hinumduman si Jesus kon ako moambit sa sakrament. Isaysay ang istorya mahitungod sa Katapusang Panihapon gikan sa Mateo 26:17–30. Basaha og dungan ang Lucas 22:19, ug ipabalik sa mga bata ang mga pulong “Buhata ninyo kini sa paghandom kanako.” Ipasabut nga ang pag-ambit sa sakrament naghatag kanato og kahigayunan sa paghinumdom sa Manluluwas ug sa Iyang Pag-ula. Pagpakita og mga tray sa sakrament. Tabangi ang mga bata nga makasabut nga ang pan magpahinumdom kanato sa lawas ni Jesus ug ang tubig magpahinumdom kanato sa Iyang dugo. Isulat diha sa pisara: “Unsa ang inyong buhaton aron makahinumdom ni Jesus samtang kamo nag-ambit sa sakrament?” Isulat ang mga tubag sa pisara. (Pananglitan: magbasa og kasulatan mahitungod kang Jesus, paminaw sa mga pag-ampo sa sakrament, maghunahuna mahitungod sa Pag-ula ni Jesus.) Dasiga ang mga bata sa pagsulay sa usa sa mga sugyot sa sunod higayon nga sila motambong sa miting sa sakrament.

2. Ang paghinumdom ni Jesus makatabang kanako nga mopili sa matarung. Sa dili pa, pagputos og Pakete sa mga Hulagway sa Ebanghelyo 240 (Si Jesus ang Kristo) nga sama sa Pinaskohan nga tan-awon. Sultihi ang mga bata nga sa sulod maoy usa ka butang nga nagrepresentar sa labing mahinungdanon nga gasa. Ipatubag sa mga bata ang oo o dili nga mga pangutana aron sa pagtag-an kon unsa kini. Paablihi ang gasa ngadto sa bata nga nakatag-an. Ipapilit ang litrato ni Jesus diha sa pisara. Sa dili pa, ibutang ang mosunod nga gilis sa mga pulong sa bisan asa nga han-ay palibut sa lawak: “Si Jesus nabunyagan,” “Si Jesus nag-alagad sa uban,” “Si Jesus nag-ampo ngadto sa Amahan,” “Si Jesus nagpangadto-adto sa paghimog mga kaayohan,” “Si Jesus nahigugma kanato,” “Si Jesus nakat-on sa pagtrabaho,” ug “Si Jesus mitahud sa Iyang inahan.” Bahina ang pisara sa duha ka mga bahin. Sa itaas sa usa ka bahin, isulat ang “Paghinumdom ni Jesus.” Sa itaas sa ikaduhang bahin, isulat ang “Motabang kanako nga mopili sa matarung.” Hatagi ang matag klase og pakisayran sa kasulatan o litrato nga nagsulti mahitungod sa bahin sa kinabuhi ni Jesus. Mga ehemplo: Mateo 3:13–17—Si Jesus nabunyagan; Juan 13:4–15—Si Jesus nag-alagad sa uban; 3 Nephi 17:15—Si Jesus nag-ampo ngadto sa Amahan; Juan 15:12—Si Jesus nahigugma kanato; Pakete sa Hulagway sa Ebanghelyo 206 (Ang pagkabata ni Jesukristo)—Si Jesus nakat-on sa pagtrabaho; 242 (Si Jesus ug ang Iyang Inahan)—Si Jesus mitahud sa Iyang Inahan. Hangyoa ang mga bata nga basahon ang kasulatan o tun-an ang litrato ug pangitaon ang ginunting nga pulong nga naghulagway niini. Sa diha nga ang matag klase nakapili sa husto, ibutang ang ginunting nga pulong sa unang bahin. Tabangi ang mga bata sa paghunahuna og usa ka sama nga pagpili nga ilang mahimo, sama sa “Ako pagabunyagan.” Isulat kini sa ikaduha nga bahin atbang sa katugbang nga gilis sa pulong.