Te Riikan ae Boou

Benji e tei imatan te tirotaam, ni kaeta ana neketai. Ana kabaraki ae mainaina ao ana kawaerake ae e ro buruuna a bon rangi ni botau raoi. Irana e bon komwiaki. E a bon tara n tauraoi ni katabuaki nakon te riikan. Ai ngaia are bukin tera e namakina te neweti?

Benji e anai ana boki aika tabu ao ni kitana te ru. E kataia n aki iangoia ibukin ae kanga bwaai aika kakaokoro n riki n te ekaretia n te bong aio. Ao ngkanne bon iai te tabe ae boou ibukin te nakoanibonga are e raraoma iai ngkana e iangoia: kabutan te toa. Tera ngkana e karaoa te kairua n ana moan tai n te wiiki ae na roko? E kataia ni mwaninga anne naba ngke e a kitana te auti.

Te botaki n toa e waaki n aron are n taainako. Ma imwiina, Benji e nako ma ana utu nakon ana aobiti Bitiobi Salazar. Aio are e a bon kaokoro. N te taneiai e na mena n te mwakuri ni kaukuki n te Moanrinan n te tai aio.

Benji e tekateka ngke tamana, te bitiobi, te beretitenti n te Kairake ni Mwane, ao ana kauntira te bitiobiriki a katokai baia iaon atuna. Tamana e anganna te Nakoanibonga are te Aaron. N tain te kakabwaia, te namakin n neweti a bua. E namakina te rau ao te kukurei.

Benji e teirake ao ni iobai ma ngaia ni kabane. Imwiina e rabwata tinana ao tarina, Jay, ao mwanena ae uarereke, Mirasol.

Imwiina, e nako n te Reirei n Tabati. E ngae ngke kiraati aika boou tiaki n aron are n te Moanrinan, a teimatoa n namakinaki te taneiai. Te reirei bon iaon te tataro. E a tia ni iai reirei iaon te tataro mai mwaina n te Moanrinan. Benji e ikerakea te ang n okinnano. Tao te riki n rikan e na aki rangi ni matoatoa.

“E na nakoraoi,” Jay e tuanga Benji imwiin te taromauri “N na kakabwaia te toa, ao ngkoe ko na kabutia.”

Te namakin n neweti a bane ni mwanga oki. “Eng, e rang n tamaroa,” e taetae ni karaurau. Kabutan te toa bon te bwai are e rangi n raraoma iai Benji!

Imwiina n te tairiki anne Benji e a kunea tamana ni wareware iaon te kaute. “Tera ngkana I katibanakoia tabeman ao aki karekea te toa?” e titiraki. “Tera ngkana I bwaka?” E kona n noria ni mataata n aia aron te ngaina i nanon ana iango, te ture n rebwetata iaon te burooa ao mwangkon te ran ni kiba n taabo nako.

Tamana e koona angan Benji. “I uringa te moantai are I kabuta te toa. I bon neweti riki nakoim n te tai aio.”

Benji e kakoea matana n te kubanako. Ngkoe? Ko aki maaka te bwai teuana!”

Tamana e ngare. “I a tia ni maaku n te tai ae bati. Ko ataia bwa tera ae buokai ni kona newetiu?”

Benji e iango n te tai ae uarereke. Tataro

E wiingare Tamana. “Eti anne. Tataro. Ao tamau e anganai te kakabwaia. Ko tangirai bwa N na anganiko teuana?”

E katoutoua atuna ni kawaekoa Benji. “Eng! I tangira ae bati n anne.”

Te utu e botaki i nanon te ruu ni maroro. Tamana e katoka baina iaon atun Benji. Ngke e taetae Tamana, Benji e namakin rannimata ni moanna n riki. “Uringnga,” e taku Tamana n te kakabwaia, “ko a tia ni karekea te nakoanibonga rinanon te otenanti ae tabu. Te Tama are i Karawa e anganira te nakoanibonga bwa ti aonga ni beku ibukia tabeman. Ngkana ko kona ni karaoa aio ma te nano ae onrake ma te kantaninga, ko na kakabwaiaki n aio ao bwaai ni kabane.”

Ni kabane te wiki anne Benji e tataro ibukin te buoka. Te Tabati are imwina, e a iriia rikan i moan te umantabu. E kakauongo raoi ngke Jay e taekina te kakabwaia iaon te kariki.

N te tai ae karina e namakina te raraoma riki. E kona ni karaoa raoi aio? E bon rangi ni kakawaki! Ngkane e uring berita man ana kakabwaia Tamana. Ana namakin n raraoma e nako ngke e a roko te Tamnei irouna.

E tabekarake te ture ao ni mwaing ma te aki nanououa nakon aia kaintekateka ake a katabeaki iai. N tabeakinna raoi, e anga te ture nakon te aine n te moan rinan ni kaintekateka.

E wiingare nakoina. Benji e wiingare ni kabooa, n ataia bwa e bon beku ibukin te Uea.