E na oki Mataio?

Iai ara kurubu n ataeinimwaane ae aintoa ni maiuia n tamnei n ara uoote, ma natira te mwaane ae Mataio e rena ma temanna ae tiaki te membwa are a kaai n ti tebo nanoia n tangira te ka ma mwakuri ni mwakaeneke. Te kananokawaki iai bwa, teuaae raon Mataio aei e roko man te utu ae akea nanona n taekan te aro. Ana karo a kariaia te mooi manging ao te moko n aia auti ao a aki kakoaua kakawakin maiuakinan te itiaki.

E a reke Mataio n te karinan are i eta n ana buroukuraem te Botaki n Tikauti n ataeinimwaane, ma e aki ira te botaki are e na anganaki iai nnena anne ibukina bwa e a katoka maiuakinan ana kainibaire te Botaki n Tikauti. I boboti ni kabane kaniwangana n Tikauti ao I karaoa nneia te bwaoki ni kamataku ae kakateke ibukiia. Ngkanne I a kawakin i nanona, n te iango bwa n tetaina e na manena nakoina. Ngke e a roko n ana ririki 16, Mataio e a momoko, e a moomooi, ao e a kamanenai turaki aika aki kariaiakaki n te tua. E kitana te reirei ao e a maeka ma raona te aine. E a burenibwai norakina iroura i nanon uoua te ririki.

Ti rawawata. Ti aki ataia bwa e na kona n okira ana utu ma ana onimaki iroun te Atua ma te euangkerio, ma ti motinnano n rimwin ana kakairi Aramwa ni karaoan aron natina te mwaane are e rawa ni kan kairaki. Aramwa e bon reitinako naba tangiran natina irouna ao e tataro ma te onimaki bwa e na “anganaki atakin te koaua” (Motiaea 27:14).

Ti tataro n aki toki bwa e na rin te Uea i nanon maiun Mataio, ao ti kabonganai anga nako n ara taetae ma ara mwakuri ni kaota iai mwaitin tangirana iroura. Ngkana e na roko n te auti, ti aki taekin taeka ake e na taraira bwa ti takutaku ke ti motikitaeka nakoina. Ti bon ti kaotia nakoina aron kimwareireira n norakina.

N tebongina e roko Mataio n te auti ao e taku bwa e kan maroro. E taku bwa e kaaitibo ma temanna te ataeinaine are iai ana titiraki n taekan te Ekaretia. I mwaain are e aki kona ni kaeka bwa e a aki atai boia, taeka a moanna n otinako mai wina. E a kunea bwa ngaia e a kona ni kakaboboi ana titiraki neierei n aron waekoakoan naba tabekan ana titiraki. E taku Mataio bwa akea ana uriuring bwa e a kanga naba n reke irouna reirei aikai n ana iango ake e taekin, ma e ataia bwa a koaua ana taeka. E mimi bwa bukin tera e wawakina maiuna n arona arei e ngae ngke e onimakina te euangkerio.

I mwin ana iaiango ae korakora i nanon tenibong, e a motinnanoa kitanakin aekan te maiu are e a tia ni wawakinna. E a okira mwengana ni bubuti buokakina ni manga moana wakin maiuna n irakin nanon te euangkerio.

E tarebonia ai tarina temanna Mataio n te tabo teuana, are e a tia n tokanikai i aon kaangaanga ake ti tearona ma ana kaangaanga ao e bubuti ngkana e kona ni maeka ma ngaia. E kariaia te bubuti ai tarina aei, ao e a moana kaekaean te taromauri n te Ekaretia Mataio ma teuaaei ao a kaaitibo ma te bitiobi ni karekea buokana ni karaoan wakin te rairannano. E namakina te tangira ao te boutoka ao e a riki ni korakora iai mwakurin ana onimaki n te Ekaretia.

N angaraoin te tai e a kaaitibo ma temanna te ataeinaine ae tamaroa, ao e raoiroi. A a tangira ao a mareaki n te tembora.

Ngke e a bungiaki aia moan nati, I a roko ni kawariia ma uotau te bwaoki ni kamataku are kakateke are I karaoia ngkoa ma kanoana kaniwangan Mataio ake man te Botaki n Tikauti. E kaonaki n te kimwareirei ae bati iai ao e kakatonga ni katinea n te tabo are e na kai nonoraki i nanon mwengana.

E aki kaoti te anera nakon natira te mwaane, n aron are e reke nakon Aramwa te Ataei Riki. Ma okirikakin Mataio nakon te koaua e bon kamimi n aekana.