Mwiokoara ni Kamaiu

Tabeua taai aika nako I karekea au reta mairoun te mwaane are e a tia ni kitana te Ekaretia. E tei ibukiia kaain ara aro aika mwaiti. I mwin kabwarabwarana bwa e kanga n rangin aki kakaonimaki n te aro, e koroboki:

“E rangin mwaiti ae I a tia ni karekea ao ngkai e a karako. I aki kukurei ao I namakinna ae aiti tabo ma I a kabwaka ni bwai ni kabane. Iai au koaua n tainako ibukin te euangkerio, e ngae ngke I aki maiuakina ana reirei ae bwanin. I bubuti ibukin ami tataro.

“Taiaoka tai mwanuokinii taekara ngaira ake ti mena ikai—Aomata Aika Itiaki ake a bua. I ataia bwa e mena ia te Ekaretia, ma n tabetai I iangoia bwa I kainnanoa riki temanna ae e na kaota te kawai nakoiu, ni kaungai, ni kanakoa maaku ao ni kaota ana koaua nakoiu.”

Ngke I wareka te reta aei, I uringa mwanangau are I karaoia nakon teuana te tabo ni kaoti korobanna n te aonaaba—te miutiam ae kinaki ibukin Victoria ao Albert i London England. Ikanne, iai te mwakuri n rabakau ni korobanna, ae karauaki raoi ni katamaroaki ao ni korobannaaki n 1831 iroun Joseph Mallord William Turner. Tarakin tein te tamnei anne bon te nang ae tinebu ae roro ma unin ao bwanaonaon taari ae korakora ni kaota te kabuanibwai ae e na riki ao te mate. Iai te ota ae kiakia otana man te kaibuke ae mena n te tabo ae raroanako. Mai nuka raoi te buroburo n ran are e riki man teberaken taian nao, iai i aona te booti ni kamaiu. A kabanei korakoraia ni bwennari mwaane i aon aia bwennarina ngkai e tebo te booti ni kamaiu i nanon te angibuaka aei. I aon te bike ao e tei temanna te buu aine ma uoman ataei, ni mwaimwai n te karau ao n oreaki n te ang. A tara taari ma te maaku. I kakimototoa aran te korobanna n au iango. Tarakin aei irou bon Te Nako ni Kamaiu.¹

Ibuakon kaangangaan te maiu, iai te kabuanibwai ae nang roko. Mwaane ao aine, ataeinimwaane ma ataeinaine a kuneaki ni bae tangaroaia ao ni kaitara te urubwai. Antai ae e na kona ni kairii booti ni kamaiu, ke ni kitana mwengaraoina ni mwengana ma ana utu, ao n nako ni kamaiu?

E bon aki bebete tabera. Ti mena i aon ana mwakuri te Uea, ti katauaki ibukin Ana buoka.

N tain ana mwakuri te Mataniwi, E weteiia taan tia akawa i Kariraia bwa a na kitan aia karaun ao n iria, e katanoata, “N na karaoingkami bwa taan akawa.”² Ti bia irii nakoaia taan tia akawa aika mwaane ao aine, bwa ti aonga ni katauraoa te buoka are ti kona ni karaoia.

Tabera bwa ti na roko irouia ao ni kamaiuia naake a kitana te waki ni kamaiu, anne ae e na bon riai n uotaki nakon ana taibora te Uea n amwarake n Ana taeka, ao ni kukurei n reitaki ma Tamneina, ao n “aki manga riki bwa iruwa ke ianena, ma ae raom n aomata n iraorao ma aika itiaki, ma ana baronga te Atua.”³

I a tia ni kunea bwa uoua bukin bwai ake a irekereke ma kaokan te kakaonimaki ao bitaki ibukin anua, katei ao mwakuri. Te moan, a oki aomata ibukina bwa iai temanna ae kaota nakoia aia konabwai ae akea tokina ao ni buokiia ni bairea kakoroan bukiia. Aomata aika a aki bati n roroko a aki kona n tiku n aroia ni karokoa a nora te tamaroa are a na kona ni karekea.

Te kauoua, tabeman a oki ibukina bwa aia koraki aika a tangiraki ke “ae raom n aomata n iraorao ma aomata aika itiaki” a tia n ira ana reirei te Tia Kamaiu, a tia n tangiriia kaain rarikiia n aron tangiraia i bon irouia,⁴ ao a tia ni buokiia tabeman ni kakoroi bukin ataakin miia ao aia iango.

Te kaunganano ni kan karaoan te mwakuri aei e a tia—ao e na reitinako n riki bwa—te reirei ibukin te tangira.

N namakinana ae koaua, aomata akanne ake a boo tangaroaia n teberaken ma angibuakan taari man ana korobanna Turner ai bon aroia angia aomata ake kaain te aro aika aki roroko ake a kakantaninga kamaiuakiia mairouia naake a kairii booti ni kamaiu. Nanoia a ririkana te kani buokaki. Tiina ao kaaro a tataro ibukiia natiia mwaane ao aine. Buu aine a tataro bwa a na kona n reke buokaia kainnabaia. N tabetai ataei a tataro ibukiia aia karo.

Bon au tataro bwa e na iai nanora ni kan kamaiuiia kaain te aro aika aki roroko ao ni kaokiia nakon kimwareirein ana euangkerio Iesu Kristo, bwa a aonga n raonira ni katoonga bwaninin te iraorao are e na anga.

Ti riai n nako ni kamaiuiia naake a bua ake a katobibira, ake a kara, aine ake a mate buuia, ake a aoraki, naake a mwauku, kaain te aro aika aki roroko, ao naake a aki kawakin tuua. Ti bia karababai baira n ibuobuoki ao ma nanora are e ataa te nanoanga. Man karaoakin aei, ti na uota te kimwareirei nako nanoia, ao ti na namakina te rauaki ae korakora ae e kaoti nakoira ngkana ti buoka temanna i nanon te kawai nakon te maiu ae akea tokina.