Ti Moangare ao Kangai I Aki
Te tia koro karaki e maeka i Metro Manila, Philippines.
I kataorikaaki angabwai n te mooi manging, ma n te tai aei te beretitenti n te kambwana e a anganai te kiraati ni wain.
Kamatata n te tamnei iroun Sudi McCollan
Tain te tiamwa teuana, I ira te kataneiai n te atimwakoro i Bicol, Philippines. Tarakin taari e rang tikiraoi, ao I tataninga ni katoa moaningabong ni kan nonoria.
I mamaka rokon te bong, eng. Anne ngkana aomata n te kaembwa a moanna ni mooi manging ao n amwarake. Kakao nakon baka n amwarake a ririki, ao raou ni kataneiai ti na bae n iri ibukina bwa aki irakina bon kaotan akean te karinerine.
Te moan baka bon te butimwai nakoiia taan kataneiai aika boou. I bon maku n iri, ibukina bwa I bon ataia bwa a na anganai bwa N na mooi manging ao I aki ata raoi arou ni karotua. I wetea raoraou man au uoote, ao e anganai reirei aika raraoi are e kakorakora onimakinau.
Ngke e waki te baka, a anganira te mooi bwa ti na nim, ma te kabwaia, a aki kairoroira bwa ti na mooi. Ngkai a butimwaia raou ni kataneiai arou n aki mooi, karotuan te mooi are i mwina e aki bebete irou—ni karokoa te tairiki teuana. N tain te baka teuana, te beretitenti n te kambwana e roko. E uota te bwatoro n lambanog (te kamangin are e karaoaki man te ni). Teutana i mwin rokona, I noria bwa e kabwaroa te wain teutana. I mwina e taku, “Ko riai n reireiniko ni mooi” ao e anga te kiraati teuana nakon temanna te tia kataneiai. E waekoa n nimma.
E moanna ni bukibuki manawau. N tokina e na roko n au tai. I wirikiriki ni karaurau nakoiu, “N na bon aki mooi, N na bon aki mooi.” I mwina I nora te beretitenti n anganai te kiraati ni wain. I aki ataia bwa tera ae N na karaoia. Raou a bane n taraai, n taningaia bwa tera ae N na karaoia. I moangare nakon te beretitenti ao n nanorinano ni kangai, “I karautaeka, tie, ma I aki moomooi.”
I ataia ae e un. E titiraki bukin tere I aki mooi. I kaeka, “Ngai kaain te Moomon.”
E taku, “I tuai n ongoongo taekan te aro anne. Taekana bwa ai aekakin te amwarake.” A bane ni ngare.
I moangare naba, tiaki ibukin ana manikangare ma ibukina bwa I ataia bwa I karaoa ae eti.
Akea temanna ae manga anganai i mwina te mooi. Ma e teimatoa te bwainingare n aki toki, bon irouia raoraou. Temanna e manga taekinna bwa I kewe ao e aki kona n iangoaki bwa membwa n te Ekaretia a aki moomooi. N te tai aei I namakina te rawawata are e roko nakoiia membwa n te Ekaretia.
Tikuu i aon te atimwakoro e reireinai reirei aika mwaiti, tiaki ti te rabwakau ma te maiu n tamnei. I reiakinna bwa e aki toki te bwainingare, ma Tamnein te Uea e kairiko n tai nako ni karaoan ae eti.