Bukin tera ao Tera ae I Riai ni Kaotibure iai nakon Au Bitiobi?

A bati roronrikirake aika a namakina riki te karaunnano ni kaoti aia kairua nakoia aia karo ke taan kairiri n te roronrikirake. E ngae ngke am karo ao taan kairiri a kona ni karekei boutoka ao reirei aika a riai, Te Uea e a tia ni katanoata bwa te bitiobi bon te tia motikitaeka ae tabangaki i Iteraera (tara D&C 107:72, 74). Iai tabena ni bairea tauia kaain ana uoote. Man te katabuaki ao te maiu ae tamaroa, te bitiobi e tau ni karekei kaotioti man te Tamnei ae Raoiroi ibukiia kaain ana uoote, n ikotaki ma ngkoe.

Te bitiobi e kona ni buokiko rinanon te mwakuri n rairannano ni kawai ake am karo ke tabeman taan kairiri a aki kona ni karekei. Ngkana te bure e bon tau matoatoana, e kona ni baireia bwa bwaai ake a riai n reke n te Ekaretia a na tianaki. Ibukin te katoto, bwa mwakoron am mwakuri n rairannano, e kona n tuangko bwa ko na aki kana te toa ke n aki kammwakura te mwaaka n te nakoanibonga i nanon tabeua te tai. E na mwakuri ma ngkoe ao ni baireia bwa ningai are ko na manga tau riki n okiri mwakuri aika tabu akanne.

Am bitiobi e na reireiniko bwa tera ae ko na karaoia ni kakorakora am konabwai n totokoi kariri. E kona ni kaungako ni kamatebwaia te atu n reirei, n aron te rairannano, ao imwina n tibwauaia ma ngaia tera are ko a tia n reiakinna. E kona n tuangko bwa ko na kakawari ma ngaia ni katoa wiiki ao n ribooti bwa ko uara ni kanakoan aro ni kariri.

Ko kona n iangoia, “Akanne a bane n tangiraoi, ma N na kanga n ataia ngkana te bwai are I a tia ni karaoia e bon tau matoatoana are I a kainnanoa te taetae nakon te bitiobi?” Te kaeka ae uarereke: “Mataniwiin nanom e na tuangko.” Ngkana ko namakina te wirikiriki ni mataniwin nanom, karaoia naba ngkekei (tara Aramwa 34:31–34).

Ni kaineti ma te rairannano, Beniamina are te Uea e anga reirei, “I aki kona n tuangkami bwaai ni kabane ake kam na bure iai, bwa bon moan te mwaiti aanga ma kawai, ao a mwaiti ake I aki kona n uring” (Motiaea 4:29). Ngaia are n aki anga karinan bwaai ake ko riai ni kaotibure nakon am bitiobi, kariaia bwa N na tibwaua tabeua koaua are a na buokiko ni karaoa te babaire anne.

I ataia bwa ko a tia ni kataia n riki n ongotaeka, ma tao ko a tia ni karaoi tabeua kairua—tabeua bure aika matoatoa. Angiia kairua are a karaoia aomata a kona ni katokaki rinanon oin am tataro ao am rairannano ae koaua. Tabeua kairua, ake a irekereke ma te bure, e tangira te kaotibure nakon te bitiobi imwain are ko na kona ni karekea ana kabwarabure te Uea.

Ngkai ko iangoi kairua ake ko a tia ni karaoi, ko kona n namakina bwa ko kairua, aki rau, aki kukurei, ke rawawatam. Ngkana ko rinanon teuana mai buoakan namakin akanne, ngkanne ko kainnanoa te taetae ma am bitiobi ibukin kairua akanne.

Tai kataia ni kamaiu am kairua. Ko kona n iangoia, “E na rangi ni kamamaa n tuanga te bitiobi tera are I a tia ni karaoia. E iangoia bwa ngai te aomata ae tamaroa riki nakon anne. E na bon tiaoki ngkana I tuangnga tera are I karaoia. E na bon aki manga tangirai.”

I berita nakoim e na aki kabuakakako. Ngkai ana toro te Uea, e na riai n akoi ao n oota ngkai e kakauongo nakoim. E na kona ngkanne ni buokiko rinanon te mwakuri n rainnano. Bon ngaia ana tia uarongorong te Uea n nanoanga ni buokiko n riki n itiaki rinanon te Mwakuri ni Kamaiu iroun Iesu Kristo.

E a tia n taku te Uea bwa ngkana te aomata e rairananona, e na mwaninga aia bure ao n aki manga uringnga.

Bwa ti aonga n rairananora man ara bure, ti riai ni kaoti ara bure ao ni mwaninga taekaia. (tara D&C 58:42–43).

Ngkana ko kaoti ao ni mwaninga am bure, te Uea e na mwaninga taekan am bure. Ko na aki bukin taeka ibukin am bure akanne ngkana e a roko motikan taekam.

N tabetai te aomata e na katoka karaoan ae bure ma e tuai man kaotibure, ngkana e kainnanoaki, nakon ana bitiobi teuanne ke neienne. N aron ae riki, te aomata e reitinako ni uota rawawatan te bure n ti ngaia, n onea mwin are e na angan te Tia Kamaiu ni uotanako te rawawata.

Kariaiai n anganiko te katoto. Teuana te tairiki tabeua te ririki n nako, I karaoa te intawiu ma ikawai ibukin kabouan aia beba ni kariaia te tembora. Te aine ae ana ririki imarenan 40 ao 60 e roko ibukin ana intawiu. E a tia ni mareaki n te tembora ao e teimatoa ni kakaonimaki n te Ekaretia ni kabane maiuna.

I namakina te nanokawaki ae korakora n tamneina. Ngke e a wakinako te intawiu I karekea ana wirikiriki te tamnei. I taku nakoina, “Titita, iai irou te namakin bwa ko a tia ni karaoa te kairua ae matoatoa ngke tebwi tabun am ririki ao ko tuai ni kaotibure nakon te tia kairiri n te nakoanibonga. Ko tauraoi n tuangai taekana?”

E waekoa ni moana tangina. E tuangai bwa e bon koaua, ma e a tia n taainako n rangi namakina te mama ae korakora ni kaota ana bure aio nakon te bitiobi. Ngke e kaota te bure are e a tia ni karaoia, e tibwauai kamatata aika tau ibukiu ni karaoa taekana bwa e tau.

Kaotan ana bure nakon te tia kairiri n te nakoanibonga e mwakena tokin te mwakuri n rairannano nakon moanakina. E a tia ni uouota te rawawata ao te nanokawaki ae e aki riai man te bure anne n raka iaon 30 te ririki.

Ibukina bwa e a tia ni kabwanina te kabanea ni mwaneka n te rairannano, ana kairua a uotakinako mai irouna. I riai n tabetai n noria imwiin te intawiu anne. Matana e rikirake n oota, ao e bon kukurei.

I tangiriko bwa ko na ataia bwa I aki ata arana. Te Uea e kona ni kanakoi ururing akanne mai iroun te bitiobi. Tera are I uringnga bwa rinanon te kaotibure nakon ana tia kairiri n te nakoanibonga, te aine aio e a bon kabebeteaki ana namakin n te kairua are e a tia ni uotia i nanon ririki aika a rangi ni bati.

Taiaoka tai karaoa te kairua anne. Ngkana iai iroum namakin n te kairua ma ko aki koaua bwa ko kainnanoia ni kaotibure nakon am bitiobi, nako nakoina. Kariaia bwa e na buokiko. Tai manga kataia ni uouota te rawawata ae e aki riai rinanon maium, are e na katikuko ma te namakin ae rawawata. Rinanon am kaotibure nakon te bitiobi ao am rairannano, te Uea e na tabeka te rawawata anne man tamneim (tara Itaia 1:18).

Tamnei

A young woman seated across the desk from her bishop.

Iesu Kristo e kabooa boon aia bure ni kabane te botanaomata rinanon Ana anga karea n te mwakuri ni kamaiu. E kaoiko n rairananom ao n totokoa te nanokawaki ao te korakai aika a na ikotaki. “Rairananom, bwa rimwi … am korakai ana korakora—korakorara ko aki ataia, rianakora ko aki ataia, eng, rawawatara uotakina ko aki ataia.

Iesu e taekinna bwa e a tia ni karawawataaki ni bwaai aikai ibukiia bwa ana aki maraki ngkana a rairi nanoia;

Ma ngkana aki rairi nanoia a riai ni karawawataaki n ai arona …

E tuangira riki bwati na rairinanora, … ao ni kaoti ara bure, bwa rimwi ao ti na karawawataki man reke kaira n aron are E a tia n taekinna (tara D&C 19:15–17, 20).

I kakoaua bwa rinanon karawawatana, Iesu Kristo e a kaman tia ni kabwaka boon am bure. Ko kona ni kabwaraki am bure ngkana ko rairananom. Tai kataia ni kabwaka boon am bure. Akea mwaitin am karawawataki ae e na kaboiko; bon tii rinanon te Mwakuri ni Kamaiu are ko na karekea te kabwaraki am bure.

Ko bia kammwakura am onimaki i nanon Iesu Kristo ao Ana Mwakuri ni Kamaiu. I kakoaua n aran Iesu Kristo bwa rinanon te rairannano, n ikotaki ma te kaotibure nakon am bitiobi ngkana e riai, ko na riki n itiaki. N raonaki, rinanon ana akoi te Tia Kamaiu—Mwaakana ae kona n anga nako—ko kona ni kakorakoraki n am konabwai n totokoa te kariri n tai aika a na roko. N tokina, ko na karekea te rau n te iango ao te kukurei n te maiu aei, ao ko na maeka n te maiu are akea tokina n te aonaaba are e na roko.