Kaoa te Tia Kamaiu bwa e na Rin Inanom

Ngke te ataeinimwane ngai, n tain te Kiritimati tinau e karekea tamnein te Tia Kamaiu ni karebwerebwe n te mataroa. Ti tuai n riki bwa kaain te Ekaretia n te tai anne, ao I titiraki n tainako, “Bukin tera Iesu e karebwerebwe iaon te mataroa? Antai are e mena n iterana are teuana?”

Tabeua te ririki imwina I kunea bwa akea bwain kaukan te mataroa i aon iteran te mataroa are itinaniku are e karebwerebwe iai te Tia Kamaiu. Te aomata are e mena i nanona e kainnanoa kaukan te mataroa. Ngkai I ataia bwa antai are n iteran te mataroa are teuana. Bon ngaira! Te Tia Kamaiu e bon karebwerebwe, ao ngaira ni kabane ti riai ni kauka te mataroa ao ni Kaoia n rin i nanon maiura.

Ngke tebwi tabun au ririki, I baireia ni kaoa te Tia Kamaiu nako nanon maiu man bwabetitoakiu ao n riki bwa kaain te Ekaretia. Raoraou bon katoto aika tamaroa nakoiu. Ai aron naba tibu te unaine. Bon te tia mwakuri n te tembora i Los Angeles California Tembora. E na kitana are auti n te aoa 4:00 n te ingabong ni mwakuri ibukin te Uea i nanon te tembora.

Tii uoua te ririki imwin bwabetitoau, I baireia bwa I tangiria ni mwakuri ibukin te Uea bwa te mitinare ae bwanin au tai. Iaon au mition, I buokia aomata aika bati n reiakinia ibukin te Tia Kamaiu bwa a aonga ni kona ni kaoia nakon nanon maiuia.

Imwiina, I mwakuri bwa te beretitenti n te mition i Samoa. I aki toki n titirakinia mitinare aika boou bwa ni ngai are a baireia bwa a na karaoa aia mwakuri ni mitinare. A bati aika taku bwa a mena n te Moanrinan ngke a baireia bwa a na karaoa aia mwakuri!

Te Moanrinan e na buokiko ni katauraoiko ibukin te mwakuri ni mitinare. Kabatia am reirei n aron ae ko kona. Katea am kouru bwa ko na mwakuri ni mitinare. Imwiina ngkoe naba ko na kona naba ni buokiia aomata ni kaoa te Tia Kamaiu nakon nanon maiuia. Rikim bwa te mitinare e na bita maium—e bita maiu.