I Tuea …

Tarakin matan tinau e urua nanou. Te kakubanako. Te bwarannano. Te nanokawaki. A rotaki matana aika uoua ike a rotaki iai ana namakin—te kamwaneaki.

I aki ongea reireinakiu irouna mang ngke te 15 te ririki ni karinea te Tama are i Karawa n te taetae ao n te mwakuri, I tei ikekei, ao I namakina te kairua n atonga te taeka ae aki riai.

I aki nanonna bwa N na tuea. I mwain te ririki anne, I tuai man kabongana te taeka ae buakaka. Ma n te tiamwa anne I mwakuri ibukin ana tabo n Ika Utah ma ana tabo n Tararua ibukin Takakaro ao I kaewea te anua mairouia tabeman ataeinimwaane ake I mwakuri ma ngaia.

Oin ara mwakuri bwa ti na koroi taian uteute man iteran taian kawai. Ti waekoa ni baireia bwa Arctium minus bon te uteute ae buakaka. E rikirake ni mwaiti n tabo nako, ao e tiring aroka ake tabeua. E nimti bwai are e roko irarikina.

Tiabora ake i nanon baira, ti kabonganai ibukin kaitaraia ara kairiribai ni karokoa banen te tiamwa anne ni karokoa are ti a kua—ao taeka aika a bareka. N te moan tai I a kunea aron kakamarakin aia taetae raou ni mwakuri. Ngkanne I a butimwaea ni kaitara. N te kabane, I a kabonganai aia taetaebuaka. N tokin te tiamwa, e nim te taetaebuaka n au taeka n aron te aroka ma uena ae rabunaki ni buraeraen te kamea.

Ma e boni ngae n anne, ana kaeka tinau i bukin au taetaebuaka ae akea nanona, e ana nanou bwa I kainnanoa te bitaki.

E aki bebete. Te taetaebuaka tiaki te rinerine ibukin te taetae. Bon te banna naba ibukin te iango. Taian maroro ake ti butimwai nako nanon maiura,bon taeka ake ti wareki, ao tamnei ake ti nori a katikii ara iango. I reiakinna n te tai ae waekoa bwa I riai ni bita te bwai are I kaoa nako nanou ngkana I tangiria ni kan biti taeka ake I kabonganai.

Ma te kakaitau, I kakaonimaki ni kakaea te taromauri ao te tieminari. Te taetaebuaka e tiringi iango aika a rietata, ma ni mena n te tabo are I a taneiai nakon iango aika a raoiroi ni manga rangin kakorakorai riki. I kabanea au tai i aon warekan koroboki aika a tabu ni katoa bong ao n tataro. I kararoai man taian tamnei ao burokuraem man te terewition I iangoia bwa N na manga aki oki ni kabwarabwarai iango aika aki raraoi.

I iangoia ma te karaurau, I kunea bwa e a nakoraoi au taetae. N tokin te ririki, I a inaomata man te anua n taetaebuaka.

Man te tai I reiakinaki taekan mwakan taian taeka. Taeka a kona ni karikibwai ke n urubwai iai. A kona ni kammaraki, ke ni kamarurung. A kona n uotia rikaki aomata, ke a kona n uniki kora ibukin te kantaninga ao te tangira.

I kunea kakaongorana bwa te Tia Kamaiu i bon irouna, te tia Karika karawa ma aonaaba, e kananonaki bwa te Taeka (tara Ioane 1:1–4; D&C 93:6–11).

I a tia n reiakinna bwa te tuea iai nanona ae raoroi iai ao nanona ae buakaka naba. Ti tuea bwa ti taekina te koaua n te bowi n te tua. Ti berita, ke ti tuea, bwa ti kawakin ana tua te Atua ngkana ti bwabetitoaki. Ni kaototongan anne, ti karaoi berita aika tabu ni kawakin ara ottenanti n te tembora bwa ti aonga ni karekei ana kakabwaia aika a korakora te Tama are i Karawa.

Ni kabaneana: Ti na riki n ai aron Taeka ngkana ara taeka a Karinea ao ni kaota Aron mimitongina.