Kawaekoan te Mwakuri ni Kamaiu
Ngkana ti kaoia, n tangiriia, ao ni beku ibukiia tabeman, ti riki bwa ana reirei ni koaua Iesu Kristo ao n ibuobuoki ni kawaekoa te mwakuri ni kamaiu.
E ngae ngke iai te ingainga n nano ibukiia mitinare aika bwanin aia tai ni mwakuri aonrain ao ni kawari autinibootaki, bitaki aikanne bon mwakoron tamnein te mwakuri ni kamaiu ae uarereke. Ae kakawaki riki bwa ti na kanga ngaira membwa n riki bwa kaain te tamnei ni kawaekoa te mwakuri ni kamaiu. Ti aki tuangaki bwa ti na irekereke ma te burokuraem ae boou. Ti aki ti kaungaki bwa ti na riki bwa ana reirei ni koaua Iesu Kristo. Tabera bwa ti na ka irekerekeira ma te tangira ao te beku ibukiia ake irarikira—ni karauan nanon te tia mwakuri ae kainnanoa buokana, kaoakiia raoraora nakon te bwabetito, buokan kaain rarikira ae a kara ma mwakurian ana katawanang itinanikun ana auti, kaoan te membwa ae aki rangin ni kakaonimaki ni katairiki ma ngaia, ke ni buoka kaain rarikira ma rongorongon ana utu. Aikai kawai aika bwainaki ao ni kakukurei ni kaoia membwa aika aki rangin ni kakaonimaki ao naake tiaki kaain ara onimaki nako nanon maiura ao nakon otan te euangkerio. Tibwauakin taai ni kakukurei ao taai aika tabu mai nanon maiura ma ngaiia e kona n riki bwa te kawai ae rangin nakoraoi ibukira bwa ti na “mwakuri n ana nne ni kurebe [Iesu Kristo] ibukin kamaiuakin tamneia mwaane [ao aine]” (D&C 138:56).
Tera te Mwakuri ni Kamaiu?
Te mwakuri ni kamaiu bon ana mwakuri Tamara are i Karawa “ni uota te aki mamate ao te maiu ae akea tokina ibukiia aomata” (Moses 1:39). Te mwakuri ae kakawaki aei e irianaki ma ana mwakuri ni mitinare te membwa, kateimatoakia aika tibwa rairaki, manga kaungakiia aika aki rangin ni kakaonimaki, te mwakuri n te tembora ao n rongorongon te utu, ao reiakinan te euangkerio.1 N tainako, ao ti iangoi mwakuri n te euangkerio bwa aki ti tebo. Ma n Te Mwakuri ni Kamaiu: Te Kanakobwana ibukiia Taan Kairiiri ni kabuta te aonaaba n Tuun 23, 2013, Unimwaane Russell M. Nelson man te Kooram n Abotoro n te Tengaun ma Uoman e reirei bwa “e aki kona ni kaokoroaki te mwakuri. A aki bwenauaki mwakuri aikai, boni mwakoron te mwakuri ni kamaiu ni kabane.”2
Te kibuntaeka ae “Kawaekoan te Mwakuri ni Kamaiu”—aran te kanakobwana n reitaki n te webutiaite (hasteningthework.lds.org)—e kaineti ma ana berita te Uea: “Nooria, N na kawaekoa au mwakuri inanon taina” (D&C 88:73).
Otenanti n te nakoanibonga aika kakawaki—bwabetito, kamatoa, katabuaki nakon te nakoanibonga ibukiia mwaane, otenanti n te tembora—a riki bwa bwaai aika kakawaki inanon kawaira n oki nakon Tamara are i Karawa. Ngkana ti ibuobuoki n te mwakuri ni kamaiu, ti ira ao ti kaungaia tabeman bwa a na ira te kawai n te berita ae tabu aei.
Membwa ao Mitinare a Bootaki ni Mwakuri iaan Kiingin te Nakoanibonga
E a roko te tai are ti na kabanea ara iango iaon moan reirei are kaainakin ana Ekaretia te Uea e nanonaki bwa ko a weteaki bwa ko na kabanea nanom ae bwanin nakon Ana mwauri ni kamaiu. Beretitenti n te Titeiki ao bitiobi iai irouia kiingin te nakoanibonga n te mwakuri ni mitinare n aia iunite n te Ekaretia3 ao ni buokiia membwa ni karaoi bwaai ake a karaoi ana reirei ni koaua Kristo—n tibwaua otan te euangkerio. Beretitenti n te mition iai irouia kiingin te nakoanibonga are e na buokiia ni karaoi aia mwakuri mitinare ake a kairiia.4 Mitinare aika bwanin aia tai a kataneiaki n reireiniia naake a tauraoi n ongoraeakina te euangkerio. A buokia membwa ma aia mwakuri mitinare ibukiia membwa, tiaki ni kaibibiti. Mitinare aika bwanin aia tai ao aika membwa a uaia n reitaki ni uota te euangkerio nakon maiuia naake e a tia te Uea ni katauraoiia bwa a na karekea.
E taku Beretitenti Thomas S. Monson n tain te kanakobana: “Aio te tai ibukiia membwa ao mitinare ni uaia ni bootaki, ni mwakuri ni bootaki, ni beku n ana nne ni kurebe te Uea ni uoti tamnei nako Ina. E a tia ni katauraoa te kawai ibukira n tibwaua te euangkerio ni kawai aika mwaiti, ao E na buokiira n ara mwakuri ngkana ti na mwakuri inanon te onimaki ni kakoroa nanon Ana mwakuri.”5
Unimwaane Neil L. Andersen man te Kooram n Abotoro n te Tengaun ma Uoman e taetae iaon kakawakin te tangira. E taku, “Ti bane ni mwakuri n te onimaki ao te katiteuanaki—te onimaki are te Uea e kairi kawaira ao ni katiteuanaki ma ngaira n tatabemanira nako ao ma mitinare, ni kaungaaki n tainako man ara tangira ibukin [Iesu Kristo], ara tangira ibukiia n tatabemaniia nako, ao ara tangira ibukia naake ti beku ibukiia.”6
Ara Kauntira n te Uoote a Kairiiri, Taan Kairiiri n te Uoote a Karaoa te Babaire
Iaan ana kairiiri te bitiobi, te kauntira n te uoote e kabebetei, boutokai, ao ni katiteuanai aia mwakuri membwa n te uoote man babairei ao ni kaira te mwakuri ni kamaiu ibukin te uoote.7
Ngkai te membwa n ana kauntira te uoote, te tia kairiiri n te mition n te uoote “e babairei ana mwakuri te uoote ni kakaai, reirei, ao ni bwabetitoia taan kakaae. E bairea te mwakuri aei ma aia mwakuri mitinare aika bwanin aia tai.”8
N taetae nakoia taan kairiiri n te mition n te uoote, e taku Unimwaane Nelson: “Buokiia [mitinare] ni kakoroi nanon aia tai ao aia boontaeka aika uaana bwa e na aki reke aia tai ni karebwerebwe iaon mataroa ni ukoukoriia aia aomata aika ana reireiniia … [Ngkoe] te bwai n reitaki imarenaia mitinare, kauntira n te uoote, ao kaain te uoote.”9
Uakoraan te Tokanikai ni Koaua.
Ngkai ngaira aomata Aika Itiaki ni Boong Aika Kaitira ti kakabwaiakaki n te tai aei ngkai e kawaekoa ana mwakuri te Uea. Bukina bwa iai Ana kantaninga te Uea ngkai e katikuira iaon te aba n te tai aei, iai ara konabwai ni karaoa ae bati riki nakon are ti taku bwa ti kona. Ti ngkana ti kakaenako ma te akoi ao te tangira nakoia naake a kainnanoa ara iraorao ao ara ibuobuoki, ti na bon aki bwaka. Aia tokanikai mitinare e reke man irakin te kairi mai ieta are e roko nakon ara iango ao nanora ao ni kaoia tabeman nakon boton maiura n te euankgerio. Te kakao bon kaotan te tokanikai, tiaki bukina bwa a bwabetitoaki aomata ke ni kakaonimaki n te Ekaretia. N aron are e taekinna Unimwaane Jeffrey R. Holland man te Kooram n te Tengaun ma Uoman ibukin korakoran aia taanga ni buaka mitinare ake a rin nako nanon te tabo ni mitinare: “Te aoa e mena iaora are ti na riai ni kangai ngkai, ‘Ae a roko.’ Ngaira ni kabane ti na babaire ibukin ao ni kabongana te bwai n reirei ae karokoaki mai i karawa n te kawai ae moan te nakoraoi.”10
Bon te tai ibukira ni kabane n ata riki tabera ni kawaekoa te mwakuri ni kamaiu. Ngkana ti karaoi mwakuri ni mitinare ibukiia membwa, kateimatoakiia aika rairaki, kamarurungaia aika aki bati ni kakaonimaki, te mwakuri n te tembora ao rongorongon te utu, ao n reiakina te euangkerio bwa mwakoron maiura ae ti tataneiai iai, ti na namakina te kukurei ae korakora ao ni kabaeaki ma ana bwaintituaraoi te tamnei ae ti kainnanoia ni kakorakora iai te Ekaretia n te ka 21 n tienture.
Kamatata n te tamnei iroun David Stoker
Kamatata n te tamnei iroun John Luke and Cody Bell