N Riki bwa te Mitinare N Tataekina Au Euangkerio
Man te maroro are e karaoaki n tain te botaki n taromauri n te Tienta ni Kataneiai ibukiia Mitinare i Provo n Tuun 24, 2011.
Ko kona ni karaoa aei! Te Uea are ko tei ibukina ao ni beku ibukina e ataia bwa ko kona ni karaoa aei. I ataia bwa ko kona ni karaoa aio.
Te Abotoro te moan, e moanibwai ao n tai nako te mitinare. Ibukin anne, I rang ni kukurei n taetae nakoimi raou n toro n te mwakuri ae moan te rianako ni bong aika kaitira.
Tera te Tataekina Au Eungkerio Mitinare?
A Tataekina Au Eungkerio mitinare bon ana toro te Uea, a weteaki n te taetae ni burabeti ao ni kariaiakaki man te katokabai, are e na tataekina ana euangkerio ae akea tokina ae kaokaki te Tia Kamaiu n Ana kawai (tara D&C 50:13–14, 17–24; D&C 68:1).
Te kantaninga ni kabane n te mitinare e kabwarabwaraaki inanon Taetaekina Au Euangkerio bon “kaoakiia tabeman n nakon Kristo man buokiia ni karekea te euangkerio are manga kaokaki rinanon onimakinan Iesu Kristo ao Ana Mwakuri ni Kamaiu, rairannano, bwabetito, karekean te bwaintangira n te Tamnei ae Raoiroi, ao n teimatoa ni karokoa te toki.1
Te mwioko ae tabu n taetaekina te euangkerio ma te kariaiakaki ao n anga te otenanti ni kamaiu are e a tia ni mwakuri ngke e kanakoaki Atam man te Onaroka are i Eten ao e na reitinako ni karokoa “Iehova ae Korakora e na taekinna bwa e a tia te mwakuri.”2
Bwai aika kainnanoaki n Riki bwa TE MITINARE N TATAEKINA AU EUNGAKERIO
I tangiria ni maroroakin nimaua bwai aika tangiraki ibukin rikim bwa Tataekina Au Eungkerio mitinare
Te bwai ae tangiraki #1: Tataekina Au Eungkerio mitinare a ota bwa a na beku ao n tei ibukin Iesu Kristo.
Tataekina Au Eungkerio mitinare a ataia ao a ota bwa antai ake a tei ibukina, bukin tera ngkai a beku, ao tera are a na karaoia. Mitinare ake a bwanin aia tai a weteaki ni beku ao ni katabuaki raoi bwa toro ao taan tei ibukin te Uea Iesu Kristo. Ti riki bwa taan kakoaua n Arana ao ni koauana, mimitongina, ao n ana mwakuri n ibuobuoki Iesu Kristo nakoiia aba nako, reti ao newe, ao aomata (tara D&C 133:37).
Ti tangira te Uea. Ti beku Ibukina. Ti Iriria. Ti tei Ibukina.
Bukin ana waki a riai n riki bwa bukin ara waki. Ana raraoma a riai n riki bwa ara raraoma. Ana Mwakuri a riai n riki bwa ara mwakuri. Kawaina a riai n riki bwa kawaira. Rikiraken ana kantaninga a riai n riki bwa ara kantaninga.
Ngkai ngaira aika taan tei ibukin te Tia Kaboira, ti taetaekin reirei ake boto ao koaua man Ana euangkerio ae kaokaki ae bebete ao ni matata. Ti aki tei ibukin oin ara kantaninga ke iango (ake akea raoi kaekakiia ae matata). Ti tataekina ao ni kakoaua ni koaua aika bebete ake a bebete n ana kawai te Uea ao man mwaakan Tamneina.
Tataekina Au Eungkerio mitinare a oota bwa te mwioko n tei ibukin te Tia Kamaiu ao ni kaoti kakoaua Irouna e aki toki. Taiaoka Uringa n iango ni kabane ake ko iangoi, ni kabane ake ko karaoi, ao n arom ni kabane ake ko uaiakinna, ao n tei Ibukina raoi nakoia natin Tamara are i Karawa ni kabane ake ko reitaki ma ngaia ngkai ao n tainako.
Bwai ae tangiraki #2: Tataekina Au Eungkerio mitinare a riai n tau.
Te bwai ni katauraoi ae kakawaki n te riki ni Tataekina Au Eungkerio mitinare bon te itiaki i matan te Tia Kamaiu.
N na taekin tabeua koaua aika bebete n ti kamatata n aron are I ata arona.
-
Ti kariaiakaki bwa taan tia tei ibukin te Tia Kaboira ao te Tia Kamaiua te aonaba.
-
Ti weteaki ni katanoata Ana euangkerio ae kaokaki ae akea tokina.
-
Ti aki kona n uota namakinan kaairuan buren te aonaba ao n anganaki te kariaiakaki n tei Ibukina ao ni karaoi mwakuri ma te mwaaka n Arana ae tabu.
-
Ti aki kona ni buokiia tabeman n tokanikai i aon kabaebaen te bure ngkana ngaira ti niroaki i nanon te bure (tara D&C 88:86).
-
Ti aki kona ni buokiia tabeman n reiakina te rairannano ngkana ngaira ti tuai n reiakina te rairannano ae karaoaki raoi ao ae tabwanin.
-
Ti kona ni katanoata ao ni kabwarabwara ma te mwaaka ti n are ti kataia ni karekea.
-
Ti na bukintaeka i matan te Atua ibukin bwai aika raraoi aika ti tangiri ao arora n tau ni mwakuri bwa taan tia tei Ibukina.
Ti aki tangiraki bwa ti na kororaoi. Ma ti tuangaki bwa ti na itiaki ao n eti raoi n nakonako i matan te Tia kaboiia kaain Iteraera. “Ko na itiaki ngkoe ae ko uouoti ana bwai ni mwakuri te Uea” (taraa D&C 38:42).
Te rairannano bon te koaua n te kantaninga ao te kamaiu—tiaki te kabwaranano ao te karawawata. Te rairannano ni koaua e nanorinano—ma e aki kakamaku. Te rairannano e kantaningaaki n tai nako ao e anga te raunnano, karawawata ae bati ao e kauarerekea te maraki. Te rairannano bon te bwaintangira ae rang ni bobuaka are e kona n reke rinanon ana Mwakuri ni Kamaiu Teuaare ti tangiria, ti beku ibukina ao ti iriiria.
E ngae ngke ko a tia ni karaoa te bure ae kakaiaki, rinanon ana Mwakuri ni Kamaiu Iesu Kristo ao te rairannano ae karaoaki man te nano, ko kona ke ni kaitiakaki ao n riki n tau iai.
Iai kairake aika kainnanoa te rairannano ae bwanin. Aio te tai. Taiaoka, taiaoka, taiaoka tai taotaona am bong n rairannano.
Iai kairake aika tia n rairi nanoia ao a reitinako n rairi nanoia ake a titiraki ngkana a tia ni karaoi ni kabane ake a kantaningaaki bwa a na butimwaeaki iroun te Uea (tara D&C 97:8). Taiaoka uringnga, te Uea e kantaningaia bwa ko na itiaki ma tiaki ni kororaoi. Te Tamnei ae Raoiroi e na manga mwakuri i nanon maium bon te kanikina ae koaua ni kabwaraan am bure iroun te Uea ibukina bwa “Tamnein te Uea e aki maeka n taian tembora aika aki tabu” (Ereman 4:24). Ao n ataia bwa te tua ibukin kabwaraan aia bure aomata ni kabane (D&C 64:10) n ikotaki ma kabwaraan am bure.
Tataekina Au Eungkerio mitinare bon ana reirei te Uea Iesu Kristo aika karinei aia berita aika tabu ao a ongeaba nakon tua. Taiaoka uringnga n tai nako ao riki n itiaki ao n tau n tei Ibukina.
Te bwai ae tangiraki #3: Tataekina Au Eungkerio mitinare a kawakin taeka n te maiu ae akea tokina.
I kaoi ngkami bwa kam na reitinako ni kakukurei ngkami n taekan te maiu (tara D&C 84:85). Ni kakukureingkami n taekan te maiu ae akea tokina e raka riki nakon ti kamatebwaiana ke kamatenanoana, n aron are “kakukureingkami n ana taeka Kristo” (2 Nibwaai 31:20; tara naba 2 Nibwaai 32:3) e raka riki nakon are ti noran katoto ke katotongana. Kawakin kaubwai n taraana irou e boboto iaona ao ni mwakuriana, neweabaia ao n karinna n am iango, iangoia ao n tataroakinna, karaoia i nanon maium ao n reiakin, kabongana raoiroina ao ni kakaaitau iai, ao ni kukurei ao ni kimwareirei i nanona.
Kauring aroia natin Motiaea ake mwaane—aman mitinare ake a rianako aroia ake araia Amon, Aaron, Aomna, ao Himni—“a bon matoatoa n te rabakau ibukin te koaua, bwa bon mwaane ngaiia aika a raoiroi aia atatai ao a bon tia n ukeukeri koroboki aika tabu ma nanomwakaia” (Aramwa 17:2).
Mitinare aika a kakaonimaki aikai a reitinako ni kawakin taekan te maiu ae akea tokina. A bon wakinako naba ni karaoi tibwangaia ake a na karaoi bon irouia ao ni kairia ma kamatebwaian koroboki aika tabu. Te atatai n te tamnei ao n te ataibwai e rinnako i nanon tamneiia, ao reirei ao koauan te euangkerio a kamatoaki i nanoia ni koaua man mwaakan te Tamnei ae Raoiroi.
Ngkai ti riki bwa taan tei ibukin te Tia Kamaiu, ngkoe ao ngai iai mwiokoara ae teimatoa ni mwakuri korakora ao n unikia inanora ao n ara iango reirei ao koaua aika boboto iaon manga kaokakin te euangkerio man ana Boki Moomon. Ngkana ti karaoa anne, kakabwaia ake a taekinaki n te berita bwa te Tamnei ae Raoiroi e na “uoti bwaai ni kabane nakon [ara] ururing”, (Ioane 14:26) ao e na kakorakoraira ngkai ti anga reirei ao ni kakoaua. Ma te Tamnei e kona ni mwakuri ma ngaira ao inanora tii ngkana ti Anganna te bwai teuana are e na mwakuri ma ngaia. E aki kona ni buokiira n uringii bwaai ake ti tuai n reiakin (tara Aramwa 31:5).
Tataekina Au Eungkerio a reitinako mitinare ni kawakin taekan te maiu are akea tokina, a katan iaan tamaroan ana taeka, ao iai mwaakan te taeka inanoia. Taiaoka uringnga n tainako, n tau n tainako n tei Ibukina, ao kawakin ao katan iaan tamaroan ana taeka.
Te bwai ae tangiraki #4: Tataekina Au Eungkerio mitinare a ataia bwa te Tamnei ae Raoiroi bon te kabanea n rietata ao te tia reirei ni koaua.
Te Tamnei ae Raoiroi ngaia te kateniman n te Atu n Atua, ao Ngaia te tia kakoaua ni koaua ni kabane ao te kabane n rietata ao te tia reirei ni koaua. Te reirei are ti anga ao kakoaua ake ti kaoti bon katauraoi nakoia taan kakae ni mwakuri ao n reiakin ibon iroun teuanne ke neienne.
Ngaira aika mitinare, teuana mai ibuakon tabera bon kaoakiia taan kakae ni kabonganai inaomataia n rinerine ao ni mwakuri ni kaineti ma ana reirei te Tia Kamaiu. Karaoan ao kawakinan kabaeaki n te maiu n tamnei, n aron te tataro ibukin te koaua, kamatebwaian ao tataroakinan ana Boki Moomon, irakin bowi n te Ekaretia, ao kawakinan tua, e kantaningaia bwa te tia kakae e na kamwakura ana onimaki, ni karaoi, ao ni bitaki.
N aki taraia bwa mwakuri mwaakara ngaira ni beku, ngkoe ao ngai ti bon aki kona ni kooka ke n imanonoa te koaua n aia namakin taan kakae. Ara kabanea n tamaroa ni mwakuri e na kona n tii uota rongorongon te koaua nakon te nano (tara 2 Nibwaai 33:1). N tokina, te tia kakae e riai ni mwakuri inanon te koaua ao ni kaoa te koaua inanon buroon teuanne ke neienne. Tii inanon te kawai aei taan kokoaua ake a ukoukora te koaua ao naake a tibwa rairaki a karikirakea korakoraia n te maiu n tamnei ao ni kunei kaeka ibukiia.
Ngkai mwiokoara bon buokaia taan kakae n reiakinna man te onimaki ao man mwaakan te Tamnei ae Raoiroi, te mwakuri aei tiaki ibukiu ao tiaki ibukim. Ti kainnanoia ni karaoi ni kabane ni mwakara ni kakoroa bukin mwiokoara ni mitinare ao n uaia n “anga te kawai” bwa e aonga te Tamnei ae Raoiroi ni kona ni mwakuri. Tabena ao ana mwakuri aika tabu. Ni koauana, ni kabane ake ko karaoi ao ngai ti karaoi bwa taan tei ibukin te Tia Kamaiu ao ataakin ao ni kataakin katikan te iango nakoim—n te rongorongo are ti tei ibukina, ni mwakuriana are ti kabonganai, ke anuara ake ti karaoi ao taraakira—bon tein te nakoanibonga ae kewe are e kawaeremwea ana mwakuri te Tamnei ae Raoiroi.
Te Uea e titiraki ngkana te aomata e taekina taekan te koaua man koauan te Tamnei ke ni kawai tabeua. Ao ngkana man kawai tabeua bon tiaki mai iroun te Atua (tara D&C 50:17–18).
Taiaoka ururinga Teuaei n tainako, kona riki n tau n tei Ibukina, kakukurfeiko n Ana taeka, ao kariaia te kabanea n rietata ao te tia reirei ni koaua, te Tamnei ae Raoiroi, ni kakoaua ni koaua ni kabane.
Bwai ae tangiraki #5: Tataekina Au Eungkerio mitinare a ataia bwa te reirei e raka riki nakon te taetae ao karakinana.
Ngke e tekateka te Tia Kamaiu iaon te Maunga are Oriweta, E katanoata: “Tai iangoi moa ami taeka n raraomaeakin: ma ane kam anganaki n te aua naba arei, ao kam na atongnga: bwa tiaki ngkami ake kam taetae, ma E taetae te Tamnei are Raoiroi.” (Mareko 13:11).
Te Tia Kamaiu n ni moan tain te mwioko n tararua n te tai aei e tuangiia mitinare bwa a na “kaurei wiia ao a na kanoaki (tara D&C 33:8, 10) ao n tabeki bwanami nakoia aomata ao n taekin iango are E na katikui i nanomi, ao a na aki kaminoi nanoia aomata. Bwa te bwai are a na taekinna a na bon anganaki ni katoa aua n te tai naba anne (tara D&C 100:5–6).
Koroboki aika a tabu aikai a katuruturua te baeten ae kairoroaki ibukin te kabwarabwara ao ni buokaia taan kakae n reiakina te koaua. Tataekina Au Eungkerio mitinare a ataia bwa ti aki reirei taian reirei aikai; ti reiakiniia aomata. Ti aki tii wareki ke ni kamatenanoi rongorongo n taekan atun maroro n taekan te euangkerio. Ti kaoia taan kakaei n namakina te bitaki n nano ae korakora. Ti ota bwa te taetae ao karakinana n ti ngaia bon tiaki te anga reirei.
Tataekinan ana euangkerio n ana kawai te Uea e kairaki n taraakin ao kakauongo ao anga kabotau n aron are e riai ni karaoaki nakon te maroro. Tein mwakurian aika aua aikai a irekereke aikai a rangi ni kakaawaki. Taiaoka koreia bwa te taratara ae kakamwakuri ao te kakauongo e roko rimoa imwain te kikina ao te taratara anne, kakauongo, ao te taratara e roko imwain te taetae. Kabonganaan te baeten aei e karekea nakoia mitinare bwa a na kina ao reirei nakon kainnnanoia taan kakae.
Ngkana ti taraia, kakauongo, kina, ti kona n anganaki inanon te aoa mwakoron ana taeka te Uea (tara D&C 84:85)—koaua ni kabane ni katuruturua ao kaeka ake ko na anga a riai ni kaeka raoi kainnanon te tia kakae. Ti man taraakin, kakauongoan, ao ni kina ti kona ni kairaki iroun te Tamnei n taekin ao ni karaoi bwaai ake e na rangi n ibuobuoki nakoia naake ti beku ibukiia.
Te taratara bon te katauraoi ae kakaawaki ni karekean te bwaintangira n tamnei ae kakawaki n te kikina. Te kikina bon te nonori ni mwaakan te tamnei ao namakinana n te nano—noorakin ao namakinan te aro ae bure n te iango, te tamaroa inanon te aomata temanna, ke te reirei are imwina are e kainnanoaki ni buoka te tia kakae. Te kikina bon te ongora rinanon mwaakan te tamnei, ao namakinana n te nano—ongora ao namakinan te raraoma are aki taekinaki inanon te maroro ke te titiraki, koauan te kakoaua ke te reirei, ke te kakoaua ao te rau are e roko man mwaakan te Tamnei ae Raoiroi.
Tataekina Au Eungkerio mitinare a mwakuri inanon te onimaki ao a kairaki iroun te Tamnei ni buokiia taan kakaei n reiakina te koaua. Taiaoka uringnga n tainako, riki n tau ni kona n tei Ibukina, kakawakin Ana taeka, kariaia te Tamnei ae Raoiroi bwa e na kakoaua ni koaua ni kabane, ao taratara, kakauongo, ao ongora, ao kina ngkai ko kakoaua iroun Iesu Kristo nakoia taan ukoukora te koaua.
Ko Kona Ni Karaoa Aei!
Ko kona ni wareka au rongorongo ao ni kakoaua bwa roronrikirake ake tabeman a kona ao a na karaoi bwaai ake I a tia ni kabwarabwarai. Ma kona bae ni mimi ngkana ko kona ni karaoi. Taiaoka kakauongo. Ko kona ni karaoa aei.
Ngke I karekeea te bwai are e tangiria nanou, N na taui tabeua te tai ma tatabemani ngkami. N na taui baimi, kanii riki ngkami, tarai ngkami ni matami, ao ni kangai, “Ko kona ni karaoa aei! Te Uea are ko tei ibukina ao ni beku ibukina e ataiko bwa ko kona ni karaoa aei. I ataia bwa ko kona ni karaoa aei. Ao n riki bwa Ana toro, I berita bwa ko na karekea Ana ibuobuoki. Taiaoka ururinga n tainako bwa man Ana Ibuobuoki ao ni Korakorana, ko kona ni karaoa aei!”
I tangiri ngkami ao I tataro ngkai kam kataia n riki nakon are ko kainnanoia n taai aika a na roko, ko na kina ao ko na kaeka inanon te onimaki nakon bwanaan te Uea ao ana kairiiri. Ngkanne ko na bon riki ni mwaaka raoi ao n tatauraoi n tei ibukin te Uea Iesu Kristo.
Tamnei iroun Publishing Services Department; KO TANGIRAI RIKI NAKON BAIKAI? IROUN DAVID LINDSLEY