N te Moanibong, Eberi 15, 2013, e raka iaon 300 kaain te Ekaretia a botaki iaon Zaisan Hill i Ulaanbataar, Mongolia, ni kauringa ana 20 n ririki te Ekaretia n te aba anne. Te kuaea ae 50-kaaina a anene, ao te kurubu a kakauongo nakon bwanaan Unimwaane Neal A. Maxwell (1926–2004) ae raweaki ngke e katabua Mongolia ibukin tataekinan te euangkerio inanon 1993.

Unimwaane Tai Kwok Yuen, kaain ngkoa te Beretitentii n te Aono i Asia are e raona Unimwaane Maxwell nako Mongolia n 1993, n taekinna bwa e kanga “bain te Uea n aki totoki ni kakammwakuri inanon te mwakoro aio n Ana onikurebe.”

A kakaokoro aekaki ni kamataku rinanon te wiki are a kanikinaea te kauring. Manga botakia kaain te mition e a karokoia 200 mitinare ake a oki ni mwakuri. E raka iaon 1,000 kaain Mongolia aika a tia ni mwakuri bwa mitinare aika bwanin aia tai—e kaania 1 ibuakoia 10 kaain te aro i Mongolia. Mwakuri ni bwabetito are a karaoaki ni kabuta Mongolia n tairikin te Kanimabong; 24 aomata ake a bwabetitoaki n te bong anne. Mary N. Cook, are e a tibwa kamotirawaki man te beretitentii ni kabuta n te Kairake n Ataeinaine, e taetae n aia taromauri Kairake n Ataeinaine, ao te auti ae kaukaki n rongorongon te utu e kaota te witeo ma kaetieti ibukin te karikirake ae boou ibukin te Family Tree . Te kamataku n te katei are e a kaota katein Mongolia ae rangi n bati ao aia tarena kaain te Ekaretia aika bati.

Ni Meei 1, 2013, kaain te Ekaretia i Haiti a iri karikirake n unikakin aroka n te aro ae bubura man kabuta te aba. A rangi ni bati aroka aika uarereke ake a unikaki ni moan bongin te karikirake, ao e na rawata riki ae na manga rimwiina. Ngkana e tabwanin te karikirake, 400,000 aroka aika boou aika a na bwebwerake i Haiti, n ikotaki ma remon, aoranti, nii, bwabwaia, ao oak.

E kaboi aroka te Ekaretia bwa mwakoron ana buoka ae aki toki ni manga kaoka aron Haiti i mwin rotakina n te ruru. Te buoka aei e karekea naba te mwakuri n ibuobuoki irouia membwa ni booa karaoan ana ka-30 n ririki te Ekaretia n ana botanaomata te abamwakoro aei. Tenibwi te ririki n nako Beretitenti Thomas S. Monson are e membwa ngkanne n te Kooram n Abotoro are Tengaun ma Uoman, e roko i Haiti ni katabua te aba ibukin taetaekinan te euangkerio are kaokaki.

Unimwaane Neil L. Andersen man te Kooram n Abotoro are Tengaun ma Uoman e roko i Haiti n tain rungakin te koronririki are e tararua tabekan rabunan te atibu ni kanuringa are e kaota moan rokon te Ekaretia i Haiti.

Ni Meei 2013 te Ekaretia, ni kabonganaan mwangan ana botaki are e tabeakin ana kekeiaki ana katoki kainnano te Botaki n Katoki Kainnano Irouia Aika Itiaki Ni Bong Aika Kaitira e anga e raka i aon teuana te mirion te bwauna ke 453592.40 kg te amwarake nakon Feeding America, te botaki ae rang ni bubura n Aban Amerika, ae akea rakana ma e kamaiuiia aika baki. Te bwaintangira n amwarake i nanon tin n aron uanikai, wetitaboro, ao bin, ake a na tibwatibwaaki nakoiia utu ake a kainnano ni nneia bwaoki aika totoakaei aika kakaokoro ao auti ni katantan riaon Aban Amerika.

Bob Aiken, te beretitenti ao te tibi n tia kakoroi moti n aobitia n Feeding America, e taku bwa te bwaintangira e karekei 625,000 taian tibwa n amwarake.