N na Tibwaua te Euangkerio ma Natin te Atua ni Kabane

Ko a tia ni kana te bwai teuana ae rangi n tamaroa are ko kan tibwaia? Te burabeti ae Riaai n te taina e mi bwa e kana mwakoron te uanikai ae kangkang. E rangi ni kangkang n te aro are e “kaonrakea tamnei [na] ma te kimwareirei ae moan te bati” (1 Nibwaai 8:12). Riaai e tangira ana utu bwa a na katoongnga te uanikai ae kangkang anne naba.

Te uanikai are i nanon miin Riaai bon aekan ana tangira te Tama are i Karawa. Riaai e tangiriia ana utu n namakina ana tangira te Tama are i Karawa. E tangiria n tibwaua te euangkerio ma ngaia ibukina e ataia bwa e na kakukureia.

Ataei n tainako a bon rangi n tatauraoi n tibwauakin te euangkerio ma tabeman.

Maria ae waniua ana ririki e noria mitinare iaon te kawai i Ecuador. E titirakinia ngkana a na kona n anga reirei n te euangkerio nakoina. Mitinare a roko nakon mwengan Maria n anga reirei nakon ana utu. Maria bon te moan n ana utu ni bwabetitoaki. E bon rangi ni kukurei ngke ana utu ni kabane a bane ni kaaina te Ekaretia naba.

Eric ae ruaiwa ana ririki e bon rangi n ingainga ibukin aia ribooti aia bootaki n toa te Moanrinan n te aro are e a kaoia kaain rarikina bwa a na roko. A bon roko.

Ataei aikai ni kauoman a tibwaua te bwai teuana ae kakawaki ma aomata ake a tangiriia. Ngkai ko tibwaua te euangkerio, am kakoaua e na rikirake. N ai aron Riaai, ko na namakina te kimwareirei ae rangi ni bati.”