E aera kam mwaing nako Rexburg?

I mwin bwinririki ni maekara n te tabo are a karako iai membwa n te Ekaretia, kaainabau ao ngai ti mwaing nako Rexburg, Idaho, USA, n uakaan ma uautu aika tiaki membwa. Bon te kakabwaia te maeka n uakaan ma ngaiia.

E korouteute te karo n ana katawanang n te moantai ngke ti buti ni kawaira n rinnako. Kaainabau ao ngai ti ri nuukan ara katawanang ni kamwataua taraan te tabo. Ngke I kaaenakoa baiu, I titiraki, “Eng e aera kam mwaing nako Rexburg?”

E kaeka, “Au mwakuri—ao ti kakaaea te kaawa ae onoti ae kainnanoa kabwarabwarana nakon Kristo.”

I namakinna bwa kaanga te bwaketi n ran ae mwaitorotoro ae taaraki iai matau (ibukina bwa I namakina te totokoaki n ana iango kaain rarikiu are e taku bwa ti aki kina Kristo), ma I moangare. I nanomatoa n te tai anne bwa tera are e taekinna ke e karaoia kaain rarikiu ae boou n te tai anne, ti na bon riki bwa kabanea n tamaroa n rao are e a tia te utu ni karekea. Ti na bon kataia n tai nako n reitaki ma ngaia n te aro n akoi, n tangira, ao n aro aika riai, n aron are e na karaoia te Tia Kamaiu.

Te waniua n ririki ake i mwina e uoti waki ni kakukurei aika mwaiti i marenaia ara utu. Te tina e kaoaki ao e iri waki ni kukurei n te Botaki N Aine. E kaoai ao kaain rarikira aika mwaiti nakon aia botaki aine aika Kiritian ike e raroanako man mwengara are e mwanenaki n ana ekaretia. Kainnabau ao ngai ti kaoaki nakon aia taenti natiia ao aia kaotioti n te katangbiano. Aia utu a kairaki n botaki ni kuka ao ni bukamaru irouia kaain rarikira aika Aomata Aika Itiaki Ni Bong Aika Kaitira. Ao ti karekei aia tareboon natiia ake a ikawai ngkana a kainnanoa baoia n okiri mwengaia man aia mwakuri ngkana a aki reke aia karo n te tarebon.

Naake karo a raraoma bwa natiia a bae ni moana tatangirakiia Aomata Aika Itiaki Ni Bong Aika Kaitira, ngaia are a aikoa kariaia natiia mwaane n ira ana buroukuraem te 6 Tikauti n ara uoote. Ma mwengara e aranaki bwa te tabo ae mano, are a kariaia bwa a na takaakaro natiia ma tibura iai ngkana a roko.

Ni katoa tai a kataia kaain rarikira ni buokira n nori “kaairuan ara kawai (ibukina bwa ti aki ata Kristo) ti kauringiia bwa ti karinei aia koaua ao aroia ni maeka ao ni karikirakeiia natiia. Ngkanne ti reitia bwa ti kantaninga naba te karinerine ibukin ara koaua are ti anganiia, are e boboto naba i aon ana reirei te Tia Kamaiu.

Ngkana tinan te utu e kataia ni karaoi kakaokoro n ara koaua ni kararoaia ma ngaira n taekinna bwa Aomata aika Itiaki ni Boong Aika Kaitira a kakoaua iroun “Iesu ae kaokoro,” I kauringnga bwa ti uaia ni kakoaua Ngaia are mai karawa ao natin te Atua ae tangiraki. N tokina ngaia ao ngai ti uaia n iraorao n te reitaki ae tamaroa.

A mwaing nako aia utu n aki kaaina te Ekaretia. Ma ngkana a kona ni kangai, “Ti maeka i buakoia kaain te Moomon; aomata aika raraoi ao a kakarinerine ma nanoia ni koaua,” ngkanne N na namakinna bwa ti tokanikai n arora n riki bwa rao aika tamaroa ao ni buokiia riki ni butimwai ao ni karaoa ae riai n aia taratara irouia Aomata aika Itiaki ni Boong aika Kaitira.