Iango man te Maungatabu ni Kabuta

Tebwi ma nimaua te bong i mwain wakinan te maungatabu ni kabuta, ara utu a katekea aia kanikina ao ni katanoata bwa antai ara irua ae tina amarake ma ngaia. “Ketinna bwa Antai ae E na Roko ni Katairiki?” Ngkanne tia manga karin tamneia burabeti, taani mamata, ao taani kaotioti aika ai tibwa ngkai man te maungatabu are mai mwaina man ana maekatiin te Ekaretia.

I katauraoi man kakaean te burabeti are ti na butimwaia n te tairiki anne. N tabetai I kunei bwai i tinanikun te auti ake a tei ibukin bwai tabeua. I kunea i mwina, ao I katikui i aon te raurau. N tain te katairiki, ao I karakina rongorongon bwai tabeua, e kataia temanna ma temanna ni ketinna bwa antai. Tabetai, I karakina teuana ke uoua te karaki are e tibwaua te burabeti n tain te maungatabu ni kabuta are mai mwaina.

I mimi ni bwai ake a uring natiu ibukia ara burabeti ao ara abotoro aika a tangiraki, ao I ataia bwa te takakaro ae bebete aei e a tai ni karikirakea au tangira ao rabakau ibukia aomata naba aika a kakannato aikai.

Ngke a roko n ira ara maungatabu n te titeiki Unimwaane Neil L. Andersen man te Koram n te Tengaun ma Uoman ma kainnabana, ae Kathy, Sister Anderson e tibwaua ana karaki nakoira. E taku bwa ngke a maeka i Buranti, e karaoi kaobin taian taetae n te maungatabu ni katoaia natina ni kabane—ma ake a uarereke naba. E tounako ngke e kunea bwa a rangin koro ni bobuaka boon taian botokaobi. Ngkanne e a kaoti te bwai teuana n ana iango: “Tera ae rangin kakawaki ibukin am utu ni karekei aia taeka burabeti?”

Te karaki aei e rota nanou, ao I kakoaua raoi bwa kaain ara utu ni kabane a reke irouia taian taetae ibukin te maungatabu. A rangin kukurei natira aine. Ti kabonganai ibukin botakin ara utu n te tairiki ao n tain te kamatebwai ni koroboki aika a tabu. I tangira temanna natiu te aine bwa e na wareki taian taetae ao ni kanikinaei n te mwakeingke. Ao temanna natira te aine, e a tibwa tia ni bwabetitoaki, e bubutiai bwa N na wareki taian taetae ma ngaia kaka teuana i mwin teuana.

Ngkai mwakoron au reirei n te Botaki n Aine, I kakawenakoia aine bwa a na manga rinanon taian taetae man te maungatabu are mai mwaina; tabeman aine a manga warekia riki, tabeman a matakuakina n te intenete. Tabeman aine a kamatata aron aia namakin riki tauraoia ibukin te maungatabu ae na roko.