I A Mena Ni Mwengau

Ngkai mwakoron te waki ni mwakuri n ibuobuoki, I a mwananga nako Rwanda ma tabeman taokita n ibuobuoki ni kainnanoakin mwakuri ni kuakua. I mwin uoua te wiki, ngke e a kaan tokin kawaiu, I a moanna n uringa mwengau ao au utu. I a uringia au utu, au kainiwene ae kamwengaraoi, ao mwengau.

N au kabanea n Tabati i Aberika, I a kona ni babairea au tai bwa I aonga ni kona n ira te taromauri. E ngae ngke e tuai ni butimwaeaki raoi te Ekaretia i Rwanda, I kona ni karekea te tai n ikotaki ma kaetieti i aon ana uebutiaite te Ekaretia.

Ao bon kaetieti tabeua bwai aikai: “Toua rikaki te kawai ae aoraoi ni moa man autin te Botaki Ni Mwakuri. Taratara kakaaea mataroan te tabo ae uki. Ngkanne nakonako n ira te kaintamwarake rikaki.”

Ngke I tou mwin kaetieti aikai, I a moanna n ongo tangin tekorana te kuna n taromauri are I rang n ataia. I ruo rikaki n taian kaintamwarake, ao taekana “Ai Matoara Nanoia Aika Raraoi” (Kuna N Taromauri, nambwa 85) a teke taningau iai. E toki te kaintamwarake n te auti ae uarereke, ike a bati aomata ni wiwingare n ibetutu n teibaba i matan te tabo n rin. N akea taraan ae te iruwa ngai irouia kaain te taromauri, I namakina ngkekei naba te namakin n utu. A mwaiti tari ao mwaane n Rwanda ake a kerakeai ni kamaurai n iobai ma ngai, ao n te tai are a karaoa anne, e a kounako mai aon akuu te uota ae rawawata ni botu n ti ngai—I a mena ni mwengau!

Riniu n te auti, I ira te botaki are kaokoro are teniua te aoa are akea kaokorona ma are n ana uoote i California. Naake iai irouia te Nakoanibonga ae te Aaron te Aaron a kabuta te toa, maroro a boto i aon te Tia Kamaiu, ao reirein te Reirei n Tabati bon ti tearona naba ma are e reiakinaki n ana uoote mwengau n te wiki anne.

Are rang ni kakawaki, I namakina korakoran Tamnein te Uea i nanon wakin bobotaki akanne. E otaraoi bwa e kukurei te Uea irouia aomata ake a tamaroa ni beku Ibukina. I noria bwa n te ririki are mai mwaaina, ti tabeman kaain Rwanda ake a kaei wakin bobotaki ikai. N te tai aei I a wareka te mwaiti ae e nako n 100 ake a roko, iteran te mwaiti bon ataei ake a mamatangare.

Ngkai e a uki Rwanda nakon te mwakuri ni mitinare, I taku bwa a na kunea te nakoraoi ae korakora mitinare n aron ae e kakoaua te Tamnei nakon rikiraken mwaitiia kaain Rwanda aika taan tia kakaae n te koaua bwa te Ekaretia ae kaokaki bon abanuean te Atua ibukin te aonaba ae bwanin—ibukin kontenanti ni kabane, ibukiia aomata ni kabane, ao ibukiia ni kabane natin te Atua. Ai kakatongara Ngai ibukin te Ekaretia, bwa tao e tei i aon nuukan mataniwin te aba i California ke i nano ni kawain Aberika nuuka are aoraoi.