ʻOua ʻe Vaʻinga ʻaki e Afí!
Fai ʻe Jean B. Bingham
Palesiteni Lahi ʻo e Fineʻofá
“Tauhi e ngaahi fekaú! [Pea te ke fiefia pea nonga]” (Tohi Hiva ʻa e Fānaú, 68).
ʻI heʻeku tupu haké, ko e taha ʻo ʻeku ngaahi ngāué ko hono tutu ʻa e vevé. Te u tānaki fakataha ʻa e vevé mei he falé. Te u faʻo ia ʻi ha fuʻu talamu ukamea ʻi he tafaʻaki ki mui ʻo e ʻapí. Hili iá pea te u tutu leva ha foʻi masi ʻo lī ki he loto talamú.
ʻI ha ʻaho ʻe taha naʻe fuʻu havili, pea ne toutou mate pē e foʻi masí. Naʻá ku fakakaukau ke ʻai ha foʻi ama mei ha nusipepa. Ne u pehē ʻe ulo lōloa feʻunga ange ai ʻa e afí ke vela ai e vevé. Naʻá ku manatuʻi ʻoku ʻikai fakapotopoto ke vaʻinga ʻaki ʻa e afí, ka ne u tukunoaʻi e fakatokangá. Ne u takaiʻi ha nusipepa ki ha foʻi kouni, ʻo tutu ʻaki ia ha foʻi masi, peá u lī ia ki he loto talamú.
Uiiiu! Ne ʻai ʻe he matangi mālohí e nusipepá ke ulo lahi, pea ne vave ʻa e vela e vevé. Ne fakalaka hake e ulo kakaha ʻo e afí ʻi hoku matá. Meʻa mālié he naʻe faʻu ki mui ha konga lahi ʻo hoku louʻulú. Ka ne vela hoku topé ʻo hangē ha fanga kiʻi filo fefeka tuʻu hangatonú! Ne maʻa mo hoku kemó mo hoku laʻimatá foki. Naʻe fuʻu vave ʻene hokó!
Ne u ako ai ha lēsoni: Kapau te ke vaʻinga ʻaki ha meʻa fakatuʻutāmaki, te ke ala lavea ai! ʻOku fakatokanga mai ʻetau ongomātuʻá mo e Laumālie Māʻoniʻoní ke tau fakaʻehiʻehi mei he ngaahi meʻa fakatuʻutāmakí ʻo hangē ko e ponokalafí mo e faitoʻo kona tapú. Kapau te tau fili ke tukunoaʻi e ngaahi fakatokangá, ʻoku ʻi ai ha ngaahi nunuʻa.
ʻOku ou fakamālō ne toe tupu mai hoku laʻi ʻulú. ʻOku tatau ia mo e fakatomalá. ʻI he taimi ʻoku tau fai ai ha ngaahi fili hala, te tau lava ʻo fili ke liliu. ʻE lava ke fakamolemoleʻi kitautolu koeʻuhí ko e Fakalelei ʻa Sīsū Kalaisí. ʻOku tatau ai pē pe ʻoku tau kei talavou pe motuʻa, ʻoku ʻi ai maʻu pē hotau Fakamoʻuí ke tokoniʻi kitautolu. ʻE lava ke tau toe ongoʻi nonga, ʻo hangē ko ia ʻi he ʻaho ne tau papitaiso aí.
Ne ʻomi ʻe he Tamai Hēvaní e ngaahi fekaú koeʻuhí he ʻokú Ne ʻofa ʻiate kitautolu. ʻOkú Ne finangalo ke maluʻi mo tokonia kitautolu. Ko ha meʻaʻofa fakaʻofoʻofa moʻoni kuo foaki mai ʻe he Tamai Hēvaní mo Hono ʻAlo ko Sīsū Kalaisí kiate kitautolú!