Lau Pē pea Lotu
ʻI hoku taʻu 17, ne talamai ʻe haʻaku kaungāmeʻa ko ha Māmonga ia. Ne ʻikai ke mahino kiate au pe ko e hā ʻa e Māmonga ʻi he taimi ko iá. Ne ʻikai ke tokanga ʻeku ongomātuá ke u ʻalu ki he lotú, ko ia ne ʻikai ke u ʻilo lahi ki he Tohi Tapú pe ki he ʻOtuá, pea naʻe ʻikai ke u fie ʻilo ki ai. Naʻá ku talaange ki hoku kaungāmeʻá, “Kapau ʻoku ou fie ʻilo ha meʻa fekauʻaki mo ia, te u fekumi ki ai ʻiate au pē.”
ʻI heʻene ʻiloʻi ne ʻikai ke u fuʻu tokanga ki he Siasí, naʻá ne ʻomai kiate au ha tatau ʻo e Tohi ʻa Molomoná. Hili iá naʻá ne kole mai ke u lau mo lotua ia. Naʻe ʻikai ke ne fakamālohiʻi au pe te ne loto-mamahi ʻi he ʻikai ke u fie fanongo ki he Siasí. Ko e meʻa naʻá ne fie maʻu ke u faí ko e lau mo lotu.
ʻI heʻeku fakaava hake ʻa e tohí ʻi he pō ko iá, ne u fakatokangaʻi ʻene fakamoʻoní ʻi he takafí. ʻI heʻeku lau ʻene fakamoʻoní, naʻá ku ongoʻi ʻoku totonu ke u ako lahi ange fekauʻaki mo e tohí ni. Ko ia ne u kamata mei he 1 Nīfaí. Ne ʻikai ke u lava ʻo tuku e tohí ki lalo. Ne u fie ʻilo lahi ange.
Naʻe ʻosi ha taimi nounou mei ai, ne u ʻalu ʻo fakafāmili mo hono fāmilí pea ne nau akoʻi au fekauʻaki mo e ongoongolelei ʻa Sīsū Kalaisí. Neongo naʻe ʻikai ke u ʻilo ha meʻa fekauʻaki mo e ongoongoleleí, ne hangē ʻoku ʻuhingamālie e meʻa kotoa. ʻI heʻeku ako lahi angé, naʻe liliu hoku ʻulungaanga fekauʻaki mo e siasí, ʻOtuá pea mo Sīsū Kalaisí. Ko e toki taimi ʻeni ʻi heʻeku moʻuí ne u fie fai ai ʻa e finangalo ʻo e ʻOtuá. Naʻe ʻikai fuoloa kuo akoʻi au ʻe he kau faifekaú peá u papitaiso mo fakamaʻu ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ne liliu ʻe he Tohi ʻa Molomoná ʻeku moʻuí. ʻI heʻeku toe fakakaukau ki aí, ne lava ke u sio ki hono tokoniʻi au ʻe he Laumālie Māʻoniʻoní ke u fie ʻilo lahi angé. Ne tokonia au ʻe he ongoongoleleí ke u ʻilo pe ko hai au, naʻá ku haʻú mei fē, pea mo e feituʻu te u lava ʻo ʻalu ki aí kapau te u faivelenga. ʻOku ou fakamālō ki hoku kaungāmeʻá ʻa ia naʻá ne vahevahe ia mo aú pea fakahā mai kiate au ʻoku vahevahe ʻe he kaungāmeʻa moʻoní e ngaahi moʻoni ʻo e ongoongoleleí.