Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEma Mamata Tonu ʻi he Mavahe Atu ʻEma Kiʻi Pēpē Tangatá Mei he Moʻuí ni
Tā fakatātā ʻa Allen Garns
Hili e ʻuluaki fakaʻatá, ne talamai ʻe he toketaá kiate kimaua ʻoku ngalingali ʻe ʻi ai ha ngaahi palopalema fakaesino ʻo ʻema pēpeé. Ne ʻikai ke ma ʻamanaki mo hoku husepānití ke fanongo ki ha meʻa pehé ni, pea ne liliu leva ʻeku vīsone ki he kahaʻú.
Ne fele ʻeku ngaahi fehuʻi mo e ngaahi hohaʻa fekauʻaki mo e meʻa ke u ʻamanaki atu ki aí ʻi he kotoa ʻo e taimi ne u feitama aí. Ka ne ma teuteu fakalelei ki he fāʻeleʻi ʻo ʻema pēpeé. ʻI he hokosia ʻo e ʻaho ko iá, ne u ongoʻi ʻi hoku lotó ʻoku ʻamanaki ke fāʻeleʻi mai ha tokotaha ʻoku makehe mo fakaʻofoʻofa.
Ne ma fakahingoa ʻema kiʻi pēpē tangatá ko Sanitiako, pea ʻi he hili pē ha taimi siʻi mei hono fāʻeleʻí naʻá ma ʻiloʻi ʻoku ʻikai ngata pē ʻi he ʻi ai e palopalema ki hono sinó ka ne ʻi ai foki mo ha ngaahi palopalema lalahi fakaemoʻui lelei ne uesia ai hono mafú, ʻaté, mo hono ongo maʻamaʻá. Ne fakatoʻotoʻo e kau toketaá ke tau ki ai ha mīsini mānava mo ha mīsini ke tokoni ki hono mafú mo hono maʻamaʻá. Ne kamata ke ma aleaʻi mo hoku husepānití ʻi heʻema kei ʻi he falemahakí ʻa e ngaahi founga te ma ohi fakataha hake ai ʻa Sanitiako mo hono ngaahi tokouá. Ko e taimi ia ne ma fakatokangaʻi ai ʻokú ma fuʻu fie maʻu lahi ʻaupito ʻa ʻema Tamai Fakalangí.
Ne fakalakalaka feʻunga ʻema kiʻi “Sanitií” ke toʻo e mīsini fakamānavá. ʻI he taimi ne kamata ai ke ne mānava ʻiate ia peé, ne hangē haʻane pehē mai, “ʻE mami, te u fakatoʻa mo fai ʻeku tafaʻakí.” Naʻá ne kukuʻi homa ongo tuhú ʻi hono kiʻi nimá. Naʻá ne mālohi, ka naʻe ʻikai ke mālohi feʻunga hono mafú. Ne kamata ke ʻikai toe ngāue hono mafú, pea ʻi ha kiʻi taimi siʻi pē, naʻá ne foki atu ki heʻene Tamai Hēvaní.
Naʻe ʻikai haʻaku ʻamanaki te u aʻusia ha meʻa pehē. Ke talitali loto fiefia ki he fanauʻi mai ʻete tamá, mo palani ha ngaahi meʻa lahi maʻana, pea hili iá, ko e meʻa fakamamahi taha ia ki ha faʻē mo ha tamai ke sio tonu ki heʻene mavahe atu mei he moʻuí ni.
Naʻá ku ʻalu mo hoku husepānití ki he temipalé hili e tanu ʻo Sanitiakó. Ne ma ongoʻi fiemālie ʻi heʻema hū atú. Naʻá ku ʻiloʻi ʻe ʻi ai ha ʻaho te u feʻiloaki ai mo ʻeku pēpeé pea fiefia mo ia ʻi heʻeku hoko ko ʻene faʻeé. ʻOku ou fakamālō ko e ngaahi temipalé pea mo e ngaahi fāmili taʻengatá. ʻOku ʻamaua leva ʻi he taimí ni ke moʻui taau ke ma toe fakataha mo Sanitiako.