Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e FAKAFIEMĀLIE FAKATUʻASINO MEI HE FOLOFOLÁ
Tā fakatātā ʻa Allen Garns
ʻI heʻeku kei siʻí, naʻe maʻu au ʻe he langa huí. Ne lahi ʻeku faʻa puké, pea ne lau houa e nofo ʻeku ongomātuʻá mo au ʻi he ngaahi ʻōfisi ʻo e kau toketaá. Naʻá na hohaʻa ki heʻeku moʻui leleí mo ongoʻi tuenoa koeʻuhí ne ʻikai ke na lava ʻo fakaleleiʻi e meʻa ne hokó. Ne ʻikai ke u fakahoungaʻi e meʻa ne na ongoʻí ka ne u toki ongoʻi ia ʻi heʻeku sio tuenoa ki he fekuki ʻeku faʻeé mo e kanisā huhú.
ʻI he fakaʻosinga ʻo ha uike ʻe taha ne u fakaʻuli ai ki Niu Sēsī ke u fakataha mo ʻeku Faʻeé ʻi hono ʻapí ʻi heʻene foua e kimó. Ne u fie fakataha mo ia pea mo tuku foki ha taimi mālōlō ʻa hoku tuongaʻané mei hono tokangaʻi fakaʻaho iá. Koeʻuhí ko hono faitoʻó, ne fie maʻu ai ha taha ke ne tokangaʻi ia ʻi he poʻulí. Ne fokotuʻu ha mohenga maʻana ʻi he lotofalé. Ne u palani ke mohe pē ʻi he seá. Ne felāngaaki ʻeku faʻeé pea ne ʻikai ha meʻa te u ala fai. Ne u ongoʻi tuenoa mo loto-foʻi.
ʻI he fāifeinga ʻa ʻeku Fineʻeikí ke mohé, naʻá ku ongoʻi ha ueʻi ke lau ange kiate ia e folofolá. Naʻá ne ʻofa ʻi he folofolá, ka naʻá ne fuʻu vaivai ke puke pe lau ia ʻiate ia pē. ʻI heʻeku ʻeke ange pe ko e hā e meʻa ʻokú ne fie maʻu ke u laú, naʻá ne talamai ʻokú ne saiʻia he tohi ʻa ʻAlamaá. Hili haʻaku lau vave pē e ngaahi talamuʻakí, ne u ongoʻi ha ueʻi ke u lau e vahe 7.
Ne fonu Laumālieʻia e lokí ʻi heʻeku lau e ngaahi lea ʻo hono fakamatalaʻi e ngāue fakafaifekau ʻa Kalaisi ʻi he māmaní: “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē; pea ʻe fai ʻeni koeʻuhí ke lava ʻo fakamoʻoniʻi ʻa e folofolá ʻa ia ʻoku pehē te ne toʻo kiate ia ʻa e ngaahi mamahi mo e ngaahi mahaki ʻoku moʻua ai hono kakaí.
“Pea te ne toʻo kiate ia ʻa e maté, koeʻuhí ke ne vete ʻa e ngaahi haʻi ʻo e maté ʻa ia ʻoku haʻihaʻi ʻa hono kakaí; pea te ne toʻo kiate ia ʻa honau ngaahi vaivaí, koeʻuhí ke fonu hono lotó ʻi he ʻaloʻofa” (ʻAlamā 7:11–12).
Ne hokohoko atu pē ʻeku laú kae ʻoua leva kuo mohe fiemālie ʻeku fineʻeikí. Naʻe fakaafeʻi ʻe he folofolá ʻa e Fakafiemālié ki hono ʻapí mo tokonia ia ke mohe. Naʻa ku maʻu ha fakamoʻoni lahi ange ki he mālohi ʻo e folofolá pea mo Sīsū Kalaisi, ʻa ia naʻe loto-fiemālie ke hoko ko hotau Fakamoʻui pea ke fakafiemālieʻi kitautolu ʻi he kotoa ʻo hotau ngaahi faingataʻaʻiá.