Kae ʻOua Ke Tau Toe Feʻiloaki
Ko e Tohi ʻa Molomoná: ko ha Mana Moʻoni
Mei he “It Was a Miracle!” Ensign, Nov. 1977, 11–13.
Mei he kamataʻangá ki heʻene ʻosi, ko e Tohi ʻa Molomoná ko ha fakahā, ko ha liliu fakalaumālie, ko e ngāue ia ʻa e ʻOtuá kae ʻikai ko ha tangata.
Lanu Puipuituʻá mei he Getty Images
ʻOku ou … fakamoʻoni ki he uiuiʻi fakalangi ʻo e Palōfita ko Siosefa Sāmitá pea mo … fakahaaʻi ʻeku tui ki he mana ne liliu mo pulusi ʻaki e Tohi ʻa Molomoná. …
ʻI he ʻaho 22 ʻo Sepitema 1823, ofi ki Palemaila, Niu ʻIoke, naʻe fakahā ʻe ha ʻāngelo ʻa e ʻOtuá hono tukuʻanga totonú ki ha kiʻi tamasiʻi [taʻu hongofulu mā fitu] ko Siosefa Sāmita. …
… Tuku muʻa ke tau kiʻi fakakaukau ange ki hono liliu ʻo e lekōtí ni. ʻOku pehē ʻe Siosefa Sāmita naʻá ne fai ia ʻi he meʻafoaki mo e mālohi ʻo e ʻOtuá. …ʻI he siʻisiʻi ʻo ʻene tuʻunga fakaakó ʻi he taimi ko ia ʻo ʻene moʻuí, ne ʻikai mo ha toe founga ange ʻe taha te ne mei lava ke fakahoko ai ia. …
… ʻOku anga fēfē [leva] hono tala ʻe he kau fakaangá ne hanga pe malava ʻe Siosefa Sāmita ʻi heʻene kei talavoú ke toʻo ha ngaahi konga mei he Tohi Tapú pea ʻi ha founga poto moʻoni ʻo ʻai ke ngali ko ha konga ia ʻo e Tohi ʻa Molomoná?
Naʻe pehē ʻe heʻene faʻeé ne teʻeki ai ke ne lau e Tohi Tapú ʻo ʻosi ʻi he konga kimuʻa ko ia ʻo ʻene moʻuí. Naʻe anga fēfē leva ke ne filifili lelei ha ngaahi veesi pea fakahū kinautolu ʻi ha founga totonu mo pōtoʻi foki ki he Tohi ʻa Molomoná?
Koeʻuhí ne teʻeki ke ne lau ʻo ʻosi e Tohi Tapú, ne ʻikai ke ʻi ai haʻane ʻilo feʻunga ke ne fai ai ha fakatonutonu fisifisimuʻa pehē ʻo tatau ai pē pe naʻe poto ʻi he tohí mo e fakatonutonú, ʻa ia ne ʻikai ke ne maʻu ha taha ʻo kinaua ʻi he konga kimuʻa ko ia ʻo ʻene moʻuí.
[Ka] ko e Tohi ʻa Molomoná ko ha ngāue fakalotu fisifisimuʻa moʻoni ia, pea ʻoku mahulu atu ia ʻi he ngaahi ʻamanaki lelei taha pe pōtoʻi ngāue ʻo ha kiʻi tamasiʻi faama. …
Hangē ko ʻení, lau ha niʻihi ʻo e ngaahi malanga fakaʻofoʻofa ʻa e Fakamoʻuí ʻi he tohi ko iá. Fakatokangaʻi ange ʻoku lau ʻe he ʻEikí mei he kau palōfita ‘o e Tohi Tapú. Te tau pehē nai ne maʻu ʻe Siosefa Sāmita ʻi heʻene taʻe akó ʻa e poto pe pōtoʻi tohí ke ne toe hiki foʻou e ngaahi malanga ʻa e Fakamoʻuí pea fakahū ki ai ha ngaahi potufolofola mei he Tohi Tapú, ʻo fakakaukau ke toe fakaleleiʻi ange e meʻa ne folofola ʻaki ʻe Sīsuú?
… Ne ʻikai ke liliu ʻe [Siosefa Sāmita] … ʻa e ngāue ʻa Molomoná, pe ngaahi malanga ʻa Sīsuú, pe maluʻi fakaofo ʻo ʻApinetaí, pe ngaahi tohi ʻa Malakaí pe ʻIsaiá. Naʻá ne hoko ʻataʻatā pē ko ha taha liliu lea, ʻikai ko ha ʻētita pe ha taha faʻu tohi; pe ko ha kaihaʻa ʻo ne ngāue ʻaki ha ngāue ʻa ha taha kehe. …
Mei he kamataʻangá ki heʻene ʻosi, ko e Tohi ʻa Molomoná ko ha fakahā, ko ha liliu fakalaumālie, ko e ngāue ia ʻa e ʻOtuá kae ʻikai ko ha tangata. Mei he kamataʻangá ki heʻene ʻosi, ʻoku moʻoni kotoa ia.