Ko Hono Tali e Tukupā ʻa ha Palōfita
Ne hiki mai hoku fāmilí mei Filipaini ki ʻAmelika ʻi hoku taʻu 11. ʻI he kamataʻangá ne faingataʻa ke u anga ki he feituʻu foʻoú. Ka ʻi he taimi pē ne u poto ai ʻi he lea faka-Pilitāniá ne vave ʻaupito ʻeku muimui mo fai e ngaahi meʻa manakoá. Ne u saiʻia ke fanongo kihe ngaahi hiva onopōní, mo fulifulihi e fōtunga hoku ʻulú, pea tui mo e ngaahi ākenga fakamuimui taha ʻo e valá. Naʻe ʻikai ke ʻi ai haʻaku fakamoʻoni. Pea naʻá ku angatuʻu.
Ne liliu ʻeku moʻuí ʻi heʻeku fili ke tali e tukupā ʻa e palōfitá ke lau mo ako fakamātoato e Tohi ʻa Molomoná. Ne u lau e tohí mei he kamataʻangá ki heʻene ʻosi. Ne u maʻu ha ongo ʻoku lelei mo fakaʻofoʻofa, ka ne teʻeki ai pē ke u fakapapauʻi pe ʻoku moʻoni.
Neongo ne u tailiili ka ne u ʻahiʻahiʻi e talaʻofa ʻa Molonai ʻi he Molonai 10:4–5. Ne u fakakaukau ʻe hā mai ha kau ʻāngelo, ka naʻe ʻikai ʻi ai ha meʻa ʻe hoko. Ne u pehē, “Ko hono ngataʻangá pē ia?”
Neongo ʻeku taʻe-fiemālié, ne u hokohoko atu hono ako e tohí. ʻI ha pō ʻe taha ne u misi ai fekauʻaki mo e Tohi ʻa Molomoná. ʻI heʻeku ʻā haké, ne u ongoʻi ha māfana ʻi hoku lotó, nonga hoku ʻatamaí, pea mo ha fakapapau. Ne u fakakaukau, “Ko ia ʻeni. Ko ʻeku talí ʻeni.”
Hili e aʻusia ko iá, ne tupulaki ʻaupito ʻeku loto falalá. Ne fakalakalaka ange ʻeku akó, ne lahi ange e ngaahi ʻekitivitī fakaako ne u ʻalu ki aí, pea ko e meʻa mahuʻinga tahá, ne u mālohi ʻaupito ʻi he Siasí. ʻOku hokohoko atu ʻeku ako e Tohi ʻa Molomoná mo moʻui ʻaki hono ngaahi akonakí. Na‘e hoko ʻa e ngaahi aʻusia ne u maʻu lolotonga ʻeku lau e tohi ʻa Molomoná ko ha taula kiate au ʻi heʻeku moʻuí.