Uso i Taimi Uma

Ata

always brothers

Na osooso i luga ma lalo Seth i le nofoa i tua ma usu se pese ula. “Faamolemole nofo i lalo, Seth,” na fai atu ai Tama. “E tatau ona ou taulai atu i le aveina o le taavale.”

“E le mafai ona ou nofo i lalo,” na fai atu ai Seth. “E ese lava le manaia!”

Sa ataata Tama. “Ou te faafetai ua e fiafia e vaai i lou uso pepe fou.”

Ina ua la taunuu atu i le falemai, na mili atu loa Seth i le potu o Tina. Sa ia iloaina le mea o i ai le potu aua ua lima aso o i ai Tina iina. Na tatau ona nofo o ia i le falemai aua sa mai Pepe Caleb, ma sa fai foi sina mai o Tina. Na fesili atu Seth ia vaai ia Caleb i le tele o taimi, ae na fai mai lava Tina, “E lei oo i le taimi.” Na ia fai mai o le a filifili e fomai le taimi e lava ai le malosi o Caleb mo se tagata asiasi.

Na valaau mai le fomai ananei. O le aso lenei!

Ina ua savali atu Seth i le potu o TIna i le falemai, o loo ia siiina Caleb. Na momoe atu Seth e vaai i lona uso pepe fou. Na laitiiti lava Caleb. Na foliga mai e laitiiti tele o ia nai lo tausoga pepe o Seth. Ma sa i ai se mea na ese e uiga i lona isu ma taliga. Sa ia foliga mai e pei o se tamai saa!

“Talofa, lau pele,” na fai atu ai Tina. “Sau e fufulu ou lima, ona mafai ai lea ona e siiina le pepe.”

Na fufulu e Seth ona lima i se fasimoli faapitoa. Na ia pe’a atu i luga o le moega i talaane o Tina. Sa faalagolago atu Tina e tuu atu ia te ia le pepe. Na fesoasoani Tama e tuu faalelei ona lima i le tulaga sao.

Na tilotilo atu Seth i lalo ia Caleb. “Talofa, Caleb,” na ia fai atu ai. “O au o lou uso, o Seth. O le a e moe i lou potu, ma e mafai ona ou faaali atu ia te oe au meataalo, ma e mafai ona ta taaalo i le paka.”

Na tilotilo sao atu lava Pepe Caleb ia Seth. Na mafaufau Seth o ia o le pepe sili i pepe uma lava.

Ina ua vaivai lima o Seth, na oo i le taimi o Tama e sii ai Caleb. Na uu mai e Tina se tasi lima o Seth ma vaai atu i ona mata.

“Seth,” o lana tala lea. “Pe e te manatua ina ua e aoao e uiga i le fuafuaga o le faaolataga i le Peraimeri?”

Sa luelue le ulu o Seth. Sa o se aso matagofie lena aso. Na i ai ia Sister Lopez se masina ma se fetu ma se paneta lapoa o le lalolagi i luga o fasi laau. Sa mafai ona uu e Seth le la.

“Pe e te manatua le ala sa tatou ola ai i le lagi ae tatou te lei o mai i le lalolagi ma le ala o le a tatou toe foi atu ai i le lagi pe a tatou oti?”

Sa toe luelue le ulu o Seth.

“O loo mai tele lava pea Pepe Caleb. Ma ua fai mai le fomai o le a le ola umi tele o ia. O le a vave ona oti o ia ma toe foi atu i le lagi.”

Na tilotilo atu Seth ia Tina. Sa tilotilo atu o ia ia Pepe Caleb i lima o Tama. Ona ia faanonou lea. Na pei e matutu lona faai. “Ae ou te alofa ia te Ia. Ou te manao ia te ia ia nofo iinei ma ma nonofo i lou potu ma ma taaalo. E le manao foi o ia e nofo?”

Na fusi mai e Tina Seth. “Ae a e manao o ia ia faatasi ma tatou. O i tatou o lona aiga. Ae o le a ia toe vaai ia i tatou.”

“O le a ia toe vaai ia i tatou?”

Sa luelue le ulu o Tina. “Sa ma faaipoipo ma Tama i le Malumalu. Na folafola mai ia i maua e faapea e mafai ona faatasi e faavavau lo tatou aiga. O le a avea pea oe ma Caleb ma a ma fanau.”“

O lona uiga o le a avea pea Pepe Caleb ma ou uso,” na faamatala atu ai Tama. “Ma o le a e toe vaai ia te ia i le lagi.”

Sa faanoanoa Seth. Na ia lagonaina foi pei ua ita. Ae na ia mafaufau e uiga i le feiloaiga ma Pepe Caleb i le lagi ma ataata laitiiti lava. Na ia aapa atu ma milimili le lauulu vaivai o Pepe Caleb. “O le a uso pea i maua i le lagi? Manaia tele lena.”

Na kisi atu Tina i le alafau o Seth. “E manaia tele.”