Ua Saunoa atu le Palemia o Samoa i le Autalavou o le Au Paia o Aso e Gata Ai

O le Afioga ia Tuilaepa Dr. Sailele Malielegaoi, Palemia o le Malo Tutoatasi o Samoa, sa saunoa i se faapotopotoga o talavou laiti ma talavou matutua i Pesega, Apia ia Novema talu ai.

Na ia saunoa i e na auai:

“E maua e soo se taitai o le Malo se lagona o le lotofaafetai i le vaaia o loo malolosi ia Ekalesia i Samoa i le faatulagaina ma le aoaoina o tagata talavou ina ia ola i se siosiomaga o le vavalalata ma le faifaimea faatasi, fealofani ma le fiafia, ma le felagolagoma’i i mea uma latou te faia. Atonu o se tasi lea o uiga o le parataiso i le lagi na fetalai i ai perofeta a le Alii. E leai se isi e fia nofo i se siosiomaga o le feitaga’i, fefinauai, lotoleaga ma le faitio.” “I le silasila lava ia a le Malo, o se tala fiafia tele pe a faia soo ni faatasiga e pei o le tou faatasiga nei, i totonu o ekalesia e fesoasoani ai i talavou laiti e faasoa ai le tasi i le isi e fesoasoani ai ia i latou ia tutumau mausali i aoaoga a le ekalesia ma ola ai i ni aiga fiafia i le fealofani ma le filemu. O ia talavou laiti e mauaina le taitaiga a le Atua ma faamanuiaga e ala i aoaoga, poto ma le malamalama, atamai ma le manuia faaletamaoaiga.” “E tatau ona outou manatua afai tatou te ole atu i le Atua, o le a Ia tali mai ia tatou tatalo. E pei lava ona tali mai le Atua i tatalo a le Tupu o Solomona e tuuina atu le atamai ia te ia e pulea lelei ai Isaraelu. O le mafuaaga lena tatou te faalogo soo ai i se faaupuga faapea, ‘Afai e le i ai le Atua i le fauina o se fale po o soo se isi lava galuega, e galulue fua i latou o e galulue.’” “Aua tatou te faalagolago i lo tatou lava poto ma le malamalama. E tatau ona tatou tatalo ma le faatuatua mo faamanuiaga tatou te manaomia. A fetaiai ma ni faafitauli ma e lagonaina le leai o se faamoemoe, tootuli ma tatalo mo le fesoasoani a le Atua. A muta lou poto faatapulaaina ma le malamalama, o le taimi la lena a le Atua. Ma o le a Ia tauaveina oe ma au avega i ou taimi o mafatiaga. Ae e tatau ona e talitonu i le Atua ma faatuatua ia te Ia o le a Ia tali mai i au tatalo. Ae e te lei tatalo atu, ua uma ona silafia e le Atua le mea o i lou loto.” “E tatau ona e alofa i le Atua. Afai e te alofa i le Atua, e te alofa foi i lou tuaoi ma fai mealelei mo isi ma fesoasoani i e mafatia.”

“O a nisi lesona e tatau ona tatou aoaoina? Ia tatou usitai ma faia le finagalo o le Atua. O le a le finagalo o le Atua? Tausi Ana poloaiga. Aemaise lava Lana poloaiga ia alofa le tasi i le isi. Sa saunoa mai le Aposetolo o Paulo, e tolu lava ni mea taua i le olaga o se tagata—Faatuatua, Faamoemoe, ma le Alofa Mama. Ae o le mea pito sili o nei mea o le Alofa. Tatou te le vaaia le Alofa o savali e pei o se tagata aua e leai sona tino. Tatou te faia le tino o le Alofa e ala i a tatou galuega lelei. E tutusa lava ma se faaupuga e faapea, ‘O le faatuatua e leai ni galuega e mate ia.’” “O le anoanoai o galuega lelei o loo faia e la outou ekalesia o le tino lea o le Alofa ma lona faailoaga silisili, ma o loo ola moni lava la outou ekalesia i le poloaiga ia alofa atu i le lua te tuaoi e pei o oe lava ia te oe. Ou te iloa o le a faaauauina pea e la outou ekalesia ana galuega lelei e le gata i Samoa ae faapena foi le lalolagi atoa. Ua 20 nei tausaga talu ona avea au ma Palemia o Samoa ma e le mafai ona ou faitauina le tele ma le anoanoai o fesoasoani ua tuuina mai e la outou ekalesia mo tagata o Samoa ma le Malo. Sa valaauliaina au e Peresitene Gordon B. Hinckley (1910–2008) e asiasi atu i le tou laumua o le Ekalesia i le Aai o Sate Leki i Iuta i ni nai tausaga ua alu, ma ina ua ou asiasi atu i fale o fesoasoaniga alofa a le tou ekalesia, sa ou vaaia ai le anoanoai o atigipusa tetele o fesoasoaniga alofa ua uma ona teuina ma faaigoaina ma saunia mo le foai atu i le Auaunaga mo Fesoasoani Alofa a la’u Ekalesia Katoliko, sa matala ai ou mata iina. O lea la, e avea ai au ma sui o le Malo ma tagata o Samoa, ou te fia tuuina atu ai le loto faafetai ma le agaga talisapaia a lo tatou Malo ma o tatou tagata i la outou ekalesia ma ona taitai ma tagata o le ekalesia, mo la outou fesoasoaniga taua ma faifaipea ia Samoa. O la outou Polokalame o Moli Kerisimasi i le Motu ua fesoasoani i le tatou Malo e tuuina atu lena manaoga i o tatou tagata, ma e faafetai tele atu ai le Malo. E faafetai atu foi le Malo mo le tele o taimi ua faamama ai e la outou ekalesia lo tatou taulaga i Apia ma isi nofoaga e faaaoga e le tatou atunuu mo le Faamanatuina o le Tutoatasi i tausaga taitasi, ua ta’ua ai nisi o le tele o fesoasoaniga.” “Mulimuli, e taua tele le ola i mataupu faavae ma aoaoga o loo talai atu. Ia aua nei pei i tatou o i latou o e e lelei tele i le talai atu ae e le ola ai i mea latou te talai atu.”