O le Mea Tatou te Maua Ai le Toafimalie

Ata

sister walking into messy living room

Ata na tusia e Emily Shay

A o matou nonofo ma lou aiga i Las Vega, Nevada, ISA, sa ou auauna ai mo se vaitaimi o se peresitene o le Aualofa a le uarota. Sa faaosofia au e le fesootaiga matagofie sa ou maua ma ni uso lelei i la matou uarota. Ou te fiafia e fuafuaina gaoioiga e siitia ae ai, taitaiina o le Aualofa, auai i fonotaga ma taitai o uarota, ma auauna atu i aiga.

Sa ou faaalu se taimi taua lava e alu ai i aiga e asiasi i uso. Sa ou tausi foi i tina ua vaivai, mai, pe na o le lofituina—o uso ua manaomia le faamafanafanaga, i le faaleagaga ma le faaletino. Sa ou lagona le faamalieina ma e sa ou manaomia i fafo atu o ou tiute o se tina talavou o le fanau e toaono.

Ona faafuasei lea ona suia lo’u olaga.

Sa talia e lou toalua se siitaga o lana galuega i se tasi setete. I se masina sa matou tapena ma tuua lo matou aiga i le la o Las Vega mo se fale mautotogi laitiiti i le malulu o Casper, Wyoming. O le vaiaso lava lea na matou o ese ai, sa ou iloa ai ua ou maitaga—i le masaga!

I le po na matou taunuu ai i lo matou fale mautotogi, sa ou mai tigaina ai lava. Na ou manatua a o taoto i luga o le moega ua tau le mafai ona gaoioi a o ou vaai i lou toalua o tausi la ma fanau ma teu a matou mea mai le taavale. O le amataga lena o le luitau faaletino sili ona faigata o lou olaga. I le fa masina na sosoo ai, sa le sao sau meaai ma sa tau le maua se malosi e auauna ai i lou aiga, tausi le ma fanau, ma—i nisi o taimi—fai meaai.

A o faamasani lou toalua i lana galuega fou, sa ou faamasani i lo matou aai fou ma faaulufale le toafa o la ma fanau i le aoga. Sa tumu lo matou fale mautotogi laitiiti, ma mo ni vaiaso sa matou faaaoga a matou mea mai atigi pusa. Ou te auaina atu lau fanau i le aoga mai le faitotoa i taeao taitasi ona faaalu lea o le aso i luga o le sofa a o taaalo lau fanau laiti latalata ane.

I se tasi taeao ina ua tuua e tamaiti mo le aoga, na tatagi ai le logo o le faitotoa. Na tatala e se tasi o lau fanau laiti le faitotoa, ma o loo tu ai iina se uso mai le auperesetene o le Aualofa a la matou uarota fou Sa ia umia se ato o ni aitema ma sa la faatasi ma lana lava tama teine. Ua ia sau e faafeiloai atu au i le uarota.

Sa ou maasiasi.

O au lena, o loo ofu pea ou ofumoe, o taoto i luga o le sofa ma le pakete i ou tafatafa. O lau fanau laiti e toalua e le o lelei ona fai o laua ofu o loo taaalo i le fola gaogaosa ma pusa e le i talaia lava.

Sa sau i totonu lenei uso matagofie na tuu lana ato i le tulimanu o le laulau. Ona nofo lea o ia i lalo o le potu malolo gaogaosa ma ma talanoa—ma fesili mai e uiga ia te au ma lo matou aiga.

A o ma talanoa, sa ou lagona le loto maualalo. I le na o le masina muamua, sa ou iai i lona tulaga, asiasi i tagata ma ofoina atu le fesoasoani. Ae o lea ua liliu le laulau. Sa ou taoto faasasao i lou tua i se fale gaogaosa i le manaomiaina lava o se toafimalie. Sa ou nofo toatasi, ua lofituina, ma fesagai ma se tulaga e tele naua nai lo lou iloa. O au o se tasi o na uso sa manaomia se fesoasoani. Sa vave ma atoatoa ona faamanatu mai e le Alii ia te au ou te manaomia o Ia ma le fesoasoani e ofoina mai e ala mai Ana auauna.

Ina ua ia aluese, o le vaaiga o lana ato faafeiloai i luga o lau laulau na ou maua ai le toafimalie ma le malamalama. I ni vaiaso na sosoo ai, sa ou tofoina mea na i le ato ma sa faafetai mo la maua fegalegaleaiga a o ia asiasi mai pea lava pea, ma ofo mai le fesoasoani ma le lagolagosua i le taimi o na masina faigata. Sa ou maua se agaga faafetai fou mo le faamoemoe ma le toafimalie e mafai ona aumai e se uso e toatasi i seisi.

I ni nai masina mulimuli ane, sa matou faatau se fale e lava lona tele mo lo matou aiga tuputupu ae. Na faaiuina lou maitaga faigata i le fanau mai o se masaga aulelei. Ma o le uso agalelei o le Aualofa na avea ma au uo lelei ma e sa faaauau ona faamalosia ma siitia ae au i lana molimau ma faataitaiga. E masani ona ou tomanatu pea i le taeao faigata o lana uluai asiasiga ma lagona le faafetai ua ia faataunuuina lona valaauga.

Ou te molimau atu o tatou uma lava o “tagata aisi” i luma o le Atua (tagai Mosaea 4:19). E mafai ona fesuisuiai o tatou tulaga i soo lava se taimi, ma aumai ai i tatou i se vaaiga fou i le tele o lo tatou faalagolago i lo tatou Tama—ma luga o i latou ua auauna ia i tatou mo Ia. Ua ou iloa nei silisili o le Aualofa o se nofoaga e maua ai e uso o tulaga uma le toafimalie a o latou tausia, auauna atu, ma alofa le tasi i le isi.