O Iesu O le Keriso: O le Molimau a Perofeta o Aso e Gata Ai
Ata na tusia e Jim Madsen
Ua valaau mai le Alii o Iesu Keriso, “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u” (MF&F 19:23). E pei ona silafia, o le fuaiupu lenei ua avea ma mau autu o le Mutuale i lenei tausaga. Ua e mafaufau ea i le auala e te aoao ai ia te Ia ma faalogo ai i Ana upu?
O le tasi o auala tatou te aoao ai ia te Ia e ala mai i Peresitene o le Ekalesia; o perofeta o aso e gata ai ua valaauina o ni molimau faapitoa o Keriso, ua latou molimau, ma faaauau pea ona molimau, i le matafaioi paia a le Faaola i le muai olaga, soifuaga i le lalolagi ma le soifuaga pe a maea le lalolagi i le fuafuaga e faavavau a le Tama Faalelagi.
Muai Olaga
“Ua tatou iloa o le faaolataga o lo o ia Keriso; o ia o le Alo Ulumatua o le Tama e Faavavau, sa filifilia ma muai faauuina i le aufono i le lagi e faataunuu le Togiola le iu ma le faavavau; sa soifua mai o ia i le lalolagi o le Alo o le Atua; ma ua ia aumai le ola ma le tino ola pea i le malamalama e ala i le talalelei.”1
Peresitene Iosefa Filitia Samita (1876–1972), o le Peresitene lona 10 o le Ekalesia
“le Alo o le Atua … e iai le mana e fausia ai lalolagi, e taitai i latou. Sa ia afio mai iinei o le Alo Pele e Toatasi e faataunuu se misiona, … o le aumaia o le faaolataga i tagata uma. E ala i le tuuina atu o Lona soifua sa Ia tatala ai le faitotoa i le toetu ma aoao atu le ala tatou te maua ai le ola e faavavau.”
Peresitene Harold B. Lee (1899–1973) Peresitene lona 11 o le Ekalesia
O Iesu Keriso sa avea ma o loo avea pea ma Alii le Atua Pule Aoao. (Tagai Mosaea 3:5.) Na filifilia o Ia ao lei fanau mai. O Ia o le Foafoa pule aoao o le lagi ma le lalolagi. O Ia o le puna o le ola ma le malamalama i mea uma.”3
Peresitene Ezra Taft Benson (1899–1994), o le Peresitene lona 13 o le Ekalesia
Olaga Faaletino
“le faamoemoega o le misiona a Keriso i le lalolagi o le ofoina atu o Ia lava e fai ma taulaga e laveai tagata mai le oti e faavavau. …
“E leai se tasi e iai se mana e faasao ai agaga o tagata ma tuuina atu ia i latou le ola e faavavau, sei vagana ai le Alii o Iesu Keriso, i lalo o le taitaiga a Lona Tama.”4
Peresitene Wilford Woodruff (1807–98), Peresitene lona 4 o le Ekalesia
“O Iesu o le Togiola o le lalolagi, o le Faaola o tagata. …
Na afio mai e aoao i tatou i le uiga o le Atua, ma i faataitaiga ma i manatu faasino mai le ala e faapea, afai tatou te savavali ai, o le a taitai atu i tatou i Lona afioaga. Na afio mai o Ia e tala noanoataga o le oti sa saisaitia ai le tagata, ma mafai ai le toetu e ala i le faoa o le manumalo o le tuugamau ma le matuitui o le oti.”5
O Peresitene Heber J. Grant (1856–1945), o le Peresitene lona 7 o le Ekalesia
“O Iesu Keriso ua aafia ai tagata sili atu nai lo se isi lava ua soifua mai. …
“… Sa ia faamalolo mai, faapupula mata o le tauaso, tutuli agaga leaga, faatuina mai e ua oti, tuuina atu le filemu i e puapuagatia, talai le tala fou o le talalelei o le alofa, molimau atu i le Tama, aoao atu le ata o le faaolataga, ma faataatia le faavae mo le faalapotopotoga ua aumai ai le faaolataga o le tagata—Lana Ekalesia.”6
Peresitene Spencer W. Kimball (1895–1985), o le Peresitene lona 12 o le Ekalesia
Pe a Mavae le Olaga Nei
“O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”7
Peresitene Iosefa Samita (1805–44), o le Peresitene Muamua o le Ekalesia
“Ua Ia faatoilalo i le oti, seoli ma le tuugamau, ma toetu manumalo o le Alo o le Atua, o le Tama lava e faavavau, o le Mesia, o le Perenise o le filemu, o le Togiola, le Faaola o le lalolagi. … Sa manumalo i mea uma, ma afio ae o Ia i le lagi ma nofo ai i le itu taumatau o le Atua.”8
Peresitene John Taylor (1808–87), Peresitene lona 3 o le Ekalesia
“Ou te molimau i le paia ma le faafetai o Iesu o le Keriso, le Faaola o le lalolagi. O le mea moni o Ia o le totonugalemu o la tatou tapuaiga ma le ki o lo tatou fiafia. “Ina tatou mulimuli ia i le Alo o le Atua i ala ma savaliga uma o le olaga. Ia tatou faia o ia ma a tatou faataitaiga ma o tatou taiala.”9
Peresitene Howard W. Hunter (1907–95), Peresitene lona 14 o le Ekalesia
“E le lava lou agaga faafetai mo le Togiola na faatinoina e lou Faaola ma lou Togiola. E ala i Lana taulaga i le faaiuga o se olaga atoatoa—o lena taulaga na ofoina atu ma le tiga e le mafaamatalaina—o noanoataga o le oti ua motusia, ma o le toetu o tagata uma ua faamautuina. I tua atu o lenei, ua talaia faitotoa o le mamalu faaleselesitila mo i latou uma o e talia le upumoni paia ma usiusitai i ana mataupu.”10
Peresitene Gordon B. Hinckley (1910–2008), Peresitene lona 15 o le Ekalesia