Faamanuiaina mo Lana Auaunaga

Sa faamautinoa mai lava e tagata ia te au e le aunoa o le a faamanuiaina lo’u aiga a o ou auauna atu ma le faamaoni o se faifeautalai faamisiona. Sa ou talitonu i upu uma. Ae peitai, sa itiiti lou iloa o se tasi o tofotofoga silisili o le faatuatua o loo taoto i luma atu.

Sa ou liliu mai ma papatisoina i le Ekalesia ina ua 18 ou tausaga. I ni nai tausaga mulimuli ane sa ou lagona ai se manaoga malosi e auauna atu i se misiona. Sa ou tatalo ma o le taunuuga sa ou mauaina se faamaoniga lemafaafitia o le mea sao lava lea; o le mea lea sa finagalo lo’u Tama Faalelagi ou te faia. I le tolu tausaga uumi mulimuli ane sa i’u ai loa ina ou alu.

Sa toeitiiti lava atoa le tasi tausaga talu ona ou i ai i le galuega, ma e lei leva ona ou siitia atu i se motu mamao atu. I le mavae ai o ni masina o tauiviga ma le ātu o le loto, sa ou lagona le saunia mo se suiga, mo se amataga fou ma se malaga fou. Sa ou lagona i le maea ai o le ma tauiviga ma le ātu o le loto o le a ou ulufale atu nei loa i se vaitau o le filemu. O le vaaiga fou sa ou maua ai se malosi faafouina mo le galuega, faamoemoega maualuluga ma le faatuatua faateleina.

I se tasi Aso Gafua, sa tonu ai ia te au e imeli lo’u Tina. Ua leva ou te lei toe maua mai se tala ia te ia ma sa ou fia iloa pe o a mai o ia. Na ia tali vave mai ma sa ou fiafia tele ai. Peitai, sa vave lava ona liua lo’u fiafia i le faanoanoa. Sa olopalaina lo’u lalolagi i totonu o ni nai sekone.

O lou tina o se tagata na faaleleia mai le vaisu o le inuava malosi ma sa le toe inu pia mo le toetoe lava tolu tausaga. O se ausiaga maoae lea ma sa ou mitamita tele ai ia te ia. Sa ou iloa lava i lou mafaufau o le a i ai pea le avanoa e ono toe foi ai o ia i tua ma sa amata foi ona ou miti ua toe oo lava i ai o ia. Peitai, sa ou tuleiesea na manatu i autafa ma sa ou filifili e talitonu o le a le toe tupu lava ona o lea sa ou punouai i le galuega a le Alii o se faifeautalai faamisiona.

Na suia atoa lenei mea ina ua ou faitau atu i le imeli a lou Tina ma iloa ai ua toe foi lava i ai. Sa faateia lava a’u ma ou nofo i luma o le komepiuta ma tagi leleoa ai. Ou te le talitonu.

O lo’u popolega sili lava lea ua tupu mai. I ni nai aso na muamua atu, sa ou lagona ai le i ai i le tumutumu o le lalolagi, ua saunia e tuuina atu a’u mea uma i ni nai masina o totoe o la’u misiona. Ma o lenei, ua ou lagona ua tietie le lalolagi i o’u luga ma ua olopalaina ai au i lalo o lona mamafa.

Sa liua vave lava ou lagona i le ita. Ma sa faatūtū atu i le Atua. Sa mamao au mai le avea ma se faifeautalai atoatoa ae sa ou lagona sa ou taumafai ma sa ou mafaufau sa tatau ona faamanuia mai le Atua ia te au mo au taumafaiga. Sa ou taumafai i le mea silisili ou te mafaia. Sa ou fia tagi leotele, lulu a’u moto i le lagi ma faamuta loa lou taumafai. Sa ou manao e faamuta lou avea ma se faifeautalai. Sa ou lagona na le lava a’u taumafaiga ma o le mafuaaga lea ua tupu ai nei mea. Aisea la e tatau ai ona ou faaauau ai pea? O le a le uiga?

I lena afiafi sa ou sailia ai se faamanuiaga faaleperisitua. Sa ou faailoa atu ou lagona sili ona o’oo’o o lou loto i lau soa ma taitai o le misiona. O lou ita uma, ou lagona o le faanoanoa, le leai o so’u faamoemoe na o ese mai i fafo a o matou fe’oma’i ai i totonu o le tamai umukuka o le ofisa. Na tuuina mai le faamanuiaga ma o upu muamua lava na tautalagia, “E alofa lou Tama Faalelagi ia te oe.”

O le mea tonu lava lena sa ou manaomia. Sa ou lagonaina le tuulafoaia ma le tuuatoatasi ma i le faalogo atu i na upu na oo mai ai ia te au se faamautinoaga loloto sa i ai o Ia iina ma sa Ia silafia au. A o ou mafaufau i lena aafiaga sa ou iloa ai sa toatele atu isi na i ai i totonu o lena potu i lena po nai lo le toafa o i matou.

I le aso na sosoo ai, sa ou faitau ai i upu a le agelu a o ia faaali atu o ia ia Alema, “Amuia lava oe Alema; o lea, ina ea ia i luga lou ulu ma olioli, ona ua ia te oe se pogai e tele e te olioli ai; ….” (Alema 8:14–15). Sa ou lagona sa finagalo le Alii ia ea i luga lo’u ulu ma olioli aua ua i ai se pogai tele ou te olioli ai! Sa ou naunau ia lotofaafetai.

Sa amata ona ou tusia se lisi o mea uma lava ou te faafetai ai. Mai mea iti i mea tetele, o le tusiaina o lenei lisi sa fesoasoani ai ia te au ia iloa muamua ona faafetai ai lea mo faamanuiaga o loo liligi mai pea e le Atua i luga o lou ulu.

I lea taimi sa ou manatu ai pe aisea na faia ai e le Atua lenei mea ia te au, ae peitai, talu mai lava lena taimi ua ou iloa ai e le o tofotofoga uma po o ma’i uma o se fetuu mai le Atua. O le faafeagai. O se faamanuiaga. A na ou le mauaina lenei avanoa e tuputupu ae ai ma aoao mai ai semanu faapenei o au lava lea e tasi e le suia. O se avanoa e toe faaleleia ai i le ogaumu o mafatiaga ma sa ou tulai ae ma sui—o sina lotofaafetai teisi ma sina faatuatua teisi.

Ou te faafetai mo le tele o mea. Ou te faafetai na fesoasoani mai le Atua ia te au ia tumau ma le faamaoni e oo i le iuga o lau misiona ma olioli ai. Ou te faafetai na Ia tuuina maia ia te au o le tele o avanoa e tuputupu ae ai ma aoao ai ma toe faaleleia. Ou te faafetai mo uo ma aiga i le fale, lata mai pe mamao o e na siitiaina au i le taimi na ou vaivai ai ma o loo vaivai pea. Ou te faafetai mo lou Tina ma lona malosi i le le fiugofie i lana lava malaga patino e agai atu i le le toe inu ava malosi. Ou te faafetai mo Keriso. Ou te faafetai na Ia tauaveina a’u i taimi sa le mafai ai ona ou savali ma sa Ia foai mai ia te au le malosi ina ua leai so’u malosi. Ou te faafetai o loo soifua le Atua ma o loo Ia silafia i tatou uma.

Sa auauna atu Simone i le Misiona a Kiripati mai ia Novema 2015–2017. O loo i ai nei o ia i le uarota muamua a YSA i Aukilani.

E i ai sau tala faafaifeautalai e te manao e faasoa atu? Imeli mai Shilo i le shilo.kino@ldschurch.org