Mai le Talafatai i le Talafatai: O La Maua Malaga i le Malumalu

Ina ua tuanai se malaga e iva itula i le po, sa ma taunuu i Juliaca, Peru. Ua oo i le Aso Tofi, ae o lo o maua manaomia pea ona faamau faailoga o ma tusifolau ma ni pemita malaga ina ia mafai ai ona o ese ma le atunuu. I le aso na sosoo ai o se aso malolo o le atunuu, ma e sa tapunia uma ofisa o le malo mo le faaiuga o le vaiaso, sa maua taunuu ma faatali i le laina i le Faletupe o le Atunuu i lena taeao ina ia mautinoa ua lava le taimi a o lei tapunia uma ofisa i le aoauli.

Ina ua maua oo atu i le laulau i le ta o le 11:00 am., sa faaali mai e le alii ofisa lona faanoanoa. “Faamalulu atu,” sa ia faimai ai. “Matou te le faamaonia nei ituaiga pepa iinei. E tatau ona oulua o atu i le ofisa i Puno.” Sa maua ofo ma le fiafia—o Puno e 45 minute le mamao ese.

Ina ua mavae le tau sueina o se taavale laupasese, sa maua taunuu i le ofisa i Puno i le 1:30 p.m. i le afiafi. Ua uma ona tapuni faitotoa. Sa ou tuitui le uamea o le faitotoa i le malosi ou te mafai. Sa tatala le faitotoa e se tamaloa ma le ita tele ma fesili mai, “O le a le mea e te manao iai?” Sa fai lau tatalo faatauanau le leoa ma tilotilo atu i mata o lenei tagataese. “Lau susuga,” sa ou faapea atu ai, “O au o se Mamona, o le a ou faaipoipo i le malumalu i Sao Paulo, Brazil, ma e mafai ona e fesoasoani mai ia te au.” Na suia lana amio faavevesi. “Ou te faamalie atu i lau susuga,” na ia faimai ai, “ae ua tapuni mea uma i le sili atu ma le itula, ma ua toeititi uma ona o ese tagata.” Sa ou tali atu, “Tuu mai au ou te alu atu i totonu ma tuu atu i lou Atua e fesoasoani mai ia te au e saili le mea o loo ou manaomia.” Sa ia tuuina mai au ou te alu atu i totonu.

Ina ua maua le pule o Rosa, sa ou faamatala atu le tulaga o iai maua. Sa ia tali mai ma le faaaloalo, “O na pepa e faamaonia e ni tagata faigaluega se toatolu, ma ou te manatu ua o uma tagata.” Ae o tamaloloa uma e toatolu sa iai lava iina, ma e sa ia faatonuina i latou e nonofo e fesoasoani ia te au.

Sa fesili mai le tamaloa muamua mo pepa sa lei iai ia te au. “Sa tatau one e alu i le Matagaluega o le Atiinae, faatau mai pepa e tolu, ma aumai iinei e faatumu ai,” sa ia faamatala mai. “E tatau ona e faatali sei aulia le Aso Gafua.”

Sa ou le gaoioi—Sa ou le talitonu i ai! Sa ou toe faia se tatalo le leoa. “Lau susuga,” sa ou faiatu ai, “O au o se Mamona, ma ou te alu i le malumalu i Sao Paulo i Brazil, e faaipoipo ai. Ma e mafai ona fesoasoani mai ia te au. Na foliga mai sa le toe faatopetope o ia. Sa ia saili i pusa uma ma mulimuli ane ua maua pepa sa manaomia. Sa vave ona siakiina e le alii ofisa na sosoo ai ma faamau faailogaina o maua tusifolau.

I le faamalama o sosoo ai, a o ou totogi le lafoga e malaga ese ai i tala Amerika, na foliga mai sa iai le fiafia tele o le teutupe e faapea mai ai, “Ou te faatoese atu. Tagai mai i lenei faailoga?” O le faailoga i luga o le laupapa ua faapea mai, “E le talia tala” Sa oo lava o le a le aoga la maua fuafuaga—sa leai se mea e mafai ona ou faia.

“Talia le totogi,” sa ou lagona atu Rosa o fai mai i o matou tua. Na talia e le teutupe le tupe ma tuuina mai ia te au pepa. Sa maua o ese atu loa!

I le agai atu i le taulaga o La Paz i Bolivia, sa faasolo ina pogisa ina ua amata ona fetogi mai maa i la matou pasi. I faamalama sa matou iloa atu tagata le fiafia i auala, o loo fetogi maa ma atiae poloka e taofia ai taavale. Sa alu atu malie le matou pasi i le ogatotonu o le taulaga. I lena po na amatalia ai se tetee faamalosi e faatoilalo le malo i Bolivia.

Sa ma o ese mai le pasi ma amata ona saili se faletalimalo. Pau lava le tasi na ma maua sa matua taugata tele, ae ina ua maea ona faiatu pea lava pea o lau faamatalaga i se tamaloa lelei sa galue ai iina, sa ia auina atu i maua i le potu e teu ai mea e faamama ai le faletalimalo i se tau taugofie lava. Sa ia tuu se faamalu i luga o le fola ma tuuina mai ni ieafu e puipuia ai i maua mai le malulu ma le malomaloa o tauga fana o loo faalogoina i fafo i le po atoa.

Sa vave ona ma o ese ma le fefe i le taeao po na sosoo ai, A o maua o atu i le nofoaga e faatali ai le pasi, sa ma vaai i ni fitafita ma taavale tau o loo tafana i latou o lo o tetee i le vaega faamalosi e faatoilalo le malo.

Sa amata ona tau le maua se penisini, o lea ua le alu ai ni malaga se tolu a le pasi e pei ona masani ai, ae sa na o le tasi na faasalalau mai. O pepa o nofoa o le pasi ua uma ona faatau atu a o lei oo i le taimi o le malaga. Sa ou maua le pule ma faiatu upu sa ou faaaogaina foi ma isi tagata: “Lau susuga, o i maua o ni Mamona, ma e ma te malaga atu i le malumalu e faaipoipo ai. Ma e mafai ona e fesoasoani ia te maua.” Na ia fesili mai. “O fea le mea e te lua o iai?” “Cochabamba, lau susuga.” Na ia tatala le pusa ma toso ae ni pepa o nofoa se lua. Sa mafai ona ou iloa ua leai se pepa nofoa o totoe. “Faavavevave,” sa ia faimai ai, “o lea o le a alu le pasi.” Na foliga mai ua mama a ma atopa’u, ma ua tau le tutu o maua vae i le eleele—i o maua lima ua uumau ai faamanuiaga o lena aso.

Na ma taunuu i Cochabamba i le taulotoaiga o ni vevesi tele mai e o loo faatoilalo faamalosi le malo. Sa maua maua se maketi e faatumulia i faleie, sa faamatuu mai ai e se tagata agalelei mai Peru ma te faamama ma teuina a maua atopau a o ma o atu i le nofoaga e faatali ai pasi. E faaaoga ai la maua faaoleole masani, sa ma faatalitali ai mo se isi pasi ma taunuu ai i ni nai aso i Santa Cruz, Polivia, e latalata i le tuaoi o Brazil. Mo ni taeao se tolu, sa ou alu ai i le nofoaga o nofoaafi ma fesili pe iai nisi malaga. O le tali lava o le leai. Ae i le aso lona fa, na faasalalau mai ni tala o le a aluese se nofoaafi mo Brazil i se taimi e le o mamao.

I le taimi lea, ua utiuti la maua tupe. Sa faasoa atu lou popolega i lou toalua, o le sa tali mautu mai, “Tusa lava pe ta te savavali pe tietie i le tua o se asini, o le a ta taunuu lava.” O lana tali sa ou maua ai le fiafia. Sa ou le faaletonu ona o tupe mo le taunuuga o la maua malaga aua o lo o maua talitonuga sa faalagolago i lo ma faatuatua.

A o ma talanoa, na savali mai se tamaitai matua agai mai ia i maua. Sa tu o ia i luma o lou toalua ma faimai, “Tamaitai talavou, pe e te le manaomia ni pepa malaga se lua mo le aso?” Na pei e sei ese e lou toalua pepa mai lima o le loomatua. Sa ou totogi i le loomatua, ma nimo atu ai i le faapotopotoga. Na alu ni nai sekone mo maua e iloa ai o loo faatasi mai pea le Alii ma ana agelu i o maua tafatafa.

Ina ua ma taunuu i le Malumalu i Sao Paulo faafetai i le vaega mulimuli o le malaga mai se uo sa maua faia i luga o le nofoaafi, sa tapunia le fale e nonofo ai i le malumalu. Talia ae fiafia, sa ma malolo filemu ai i ni nofoa se lua i fafo o le malumalu. Ua iai iina, lona matagofie e faapei ona ma moemiti iai, ma le faatusa o le agelu o Moronae i ona luga. Ua oo mai le vaeluaga o le po, ma e sa ma fetagisi ma feopoopoai, vaivai ma susu mai le timu pau. Sa ma le lagona le pala susu, le fiaai, poo le malulu, ua na o lagona e le mafaamatalaina o le fiafia ona o le latalata lava i le maota o le Alii. Sa maua usiusitai, ma o le ma taui lena.

A o ma faamafanafana i lena taimi, na eueu mai lou tauau e se tasi. O se tasi o au soa na ma misiona faatasi, o le sa faamauina i le malumalu i lena aso ma e sa foi mai ma lona toalua mai se taumafataga o le afiafi. Sa ia tuuina mai ma te nonofo i lo la potu i lena po, ma e o le aso na sosoo ai sa fai o ia ma molimau i la maua faamauga, na faataunuuina e le peresitene o le malumalu lava ia. O se mea matagofie naua le vaai atu i lou toalua i le potu selesitila, ua ofu i le ofu sisina.

I se tupe nono mai lau uo misionare ma se fesoasoani mai le peresitene o le malumalu, sa ma toe foi atu i lalo ifo o le lima aso, e aunoa ma se faatuai—ma le na o le $20 tala e amata ai lo ma aiga ma lou toalua, Maria Ondina, o lau soa e faavavau.