O Le Filifiliga e Tusitusi
E alaala le tusitala i Rhineland-Palatinate, Siamani.
“Ua latou saoloto e fillifili” (2 Nifae 2:27).
Na nofo sasao i luga Justina i lona nofoa. Na ia tuu ana penitala fou i le pito i luga o lana kesi. O le aso muamua lenei o le aoga. Na ia feiloai i ana uo i le vasega ma na tusia se ata malie.
Ona fai mai lea o Mrs. Werner, “Taimi o le galulue i le tusitusi!” Na tufa atu e Mrs. Werner pepa i le vasega. “E 30 minute tou te galulue ai i lenei vaega. Ona tatou o ai lea i le malologa.”
Na folo faua Justina. “Oi leai. Tusitusi nei loa?” na ia mafaufau ai.
O le tausaga ua tuanai na faigata ia Justina le faitau ma le tusitusi. Na foliga mai o ana uo uma lava na fiafia i ai. Na le faigata tele mo i latou. Ae faapefea pe afai o lenei tausaga o le a toe pei foi o lena tausaga?
Na piki i luga e Justina lana penitala. Sa ia tilotilo atu i lana pepa. Sa mole lona manava. Sa taufai tusitusi uma lava isi tamaiti aoga. Sei vagana ai o ia.
Na ia manao e talanoa atu ia Mrs. Werner. Pe o le a ita o ia o loo i ai se faaletonu ia Justina? E tusa lava pe ita o ia, e sili atu lava lena nai lo le tusitusi.
Na savali atu Justina i le kesi a lona faiaoga. “Mrs. Werner? E faigata atu lenei mea nai lo le mea na ou faia i lena tausaga. Ou te le manatu e mafai ona ou faia.”
Sa leai se foliga ita o Mrs. Werner. Sa ataata atu o ia ia Justina. “Fai le mea e te mafaia. Atonu e te ofo i mea e te mafai ona faia. E te le mafai ona filifili i taimi uma mea e te lelei ai. Ae e te mafai i taimi uma ona filifili po o le a le tele o lau taumafai.”
Na toe savali atu Justina i lana kesi. Sa ia mafaufau e uiga i mea na ta’uina atu e Mrs. Werner. “E mafai ona ou filifili e taumafai.” Na faapena le mea na ia aoaoina i le Peraimeri. Na faitau e lana vasega se mau na faapea mai ua “tatou saoloto e filifili.” O lona uiga e mafai ona tatou faia a tatou lava filifiliga. Ua talitonuina i tatou e le Tama Faalelagi ia faia ni filifiliga lelei. Ua ia folafola mai e fesoasoani ia i tatou pe a tatou faia ni mea sese.
Pe o le a ese le aoga i lenei tausaga? Atonu e mafai ona ia filifili e faia se eseesega! Na piki i luga e Justina lana penitala. Sa ia tilotilo atu i lana pepa. Sa lagolelei lona manava. “Ua lelei. O le a ou faia lenei mea,” na ia mafaufau ai.
Na ta mai le logo o le malologa. E lei uma lava Justina. Ae ua sili atu nai lo le afa lana pepa! Na sii i luga lona lima. “E mafai ona ou nofo ma faaauau ona galue? Ua ou latalata lava ina uma.”
Sa ataata Mrs. Werner ma luelue atu lona ulu.
Na iu lava ina tuu atu e Justina lana pepa. Sa fai sina tiga laitiiti o lona lima. E oo lava i lona faiai na tiga! Ae sa ataata o ia. Na te lei galue malosi lava faapea muamua i le tusitusi.
O le aso na sosoo ai na galulue ai le vasega i le faitau. Na tau atu e Mrs. Werner ia faitau tagata uma mo le 20 minute. Sa toe taumafai Justina. Na ia tatala lana tusi ma faaleo atu upu.
Na amata ona faia e Justina ni filifiliga i aso taitasi. Na ia filifilia e faitau. Na ia filifilia e tusitusi. Atonu o le faitau ma le tusitusi e le leaga tele lava!
Na oo lava ina ia filifili e alu i le faletusi. Na ia aveina atu tusi i le fale. O le tausaga talu ai na te lei faia lava lena mea. Na vave lava ona ia faitau i taimi uma. Ma sa malie moni lava! Ma o le tele lava ona ia faitau, o le lelei foi lea o lana tusitusi.
Na faasolo ina matua Justina, na fiafia o ia sa ia filifili e galue malosi i le faitau ma le tusitusi. Aua o nisi na o mea e fiafia o ia e fai i le taimi nei.