Malaga e ui atu i le Fale Fetafai Anamua
E pei ona i ai i totonu o malumalu i nei ona po, o le faatusa i totonu o le fale fetafai e mafai ona aoao ai i tatou e uiga i la tatou malaga e toe foi atu i le afioaga o le Atua.
Mo le faitau afe o tausaga, ua avea pea le malumalu ma se nofoaga e faaaoga ai e le Atua sauniga o le perisitua ma feagaiga paia e aoao ai Lana fanau i upumoni e faavavau e uiga i Lana fuafuaga o le faaolataga.
I taimi o a latou malaga i le vao, sa poloaiina ai le nuu o Isaraelu e fausia se fale fetafai ina ia mafai ai e le Atua ona “nofo ma i latou” (Esoto 29:46). “O le Fale Fetafai o lona uiga moni o le ‘nofoaga e nofo ai’ ma sa ta’ua i talitonuga sa afio moni lava le Atua i totonu o ona puipui paia. I taimi sa tolauapi ai Isaraelu, sa faatu ai le fale fetafai i le ogatotonu o le tolauapiga (e fai ma faatusa o le manatu, o le Atua e tatau lava ona avea ma totonugalemu o olaga o lona nuu).”1
Mafaufau i mea nei i totonu o le fale fetafai ma mea e mafai ona latou aoao ai i tatou e uiga i lo tatou toe foi atu i le afioaga o le Atua.
Ata Mai le Good Salt Na Saunia e Steve Creitz / Laiseneina Mai le GoodSalt.com
Fale Fetafai: Ua i ai i le fale fetafai ni vaega se tolu ia e tatau ona pasia e se tasi ia oo atu ai i le afioaga o le Atua: o le faapaologa, o le mea paia, ma le Paia o Paia (tagai Esoto 25–30).
Fata Faitaulaga: O le tulafono a Mose na tuu mai ai taulaga ina ia osia i i, o le faatusa o le Faaola ma Lana “taulaga tele ma mulimuli” (tagai Alema 34:10). O le taulaga e mafai foi ona avea ma faatusa o lo tatou salamo—lafoaia o a tatou agasala ma ofo atu se loto momomo ma le agaga salamo (tagai 3 Nifae 9:19–20; Taiala i Tusitusiga Paia, “Taulaga”).
Faatanoa Vai: A o lei ulu atu i totonu i le mea paia, sa faaaoga e ositaulaga le faatanoa vai apamemea e mulumulu ai o latou lima ma vae (tagai i le Esoto 30:19–21), ua faamanatu mai ai ia i tatou le manaomia ona faamamaina o i tatou a o tatou saunia e toefoi atu i le afioaga o le Alii (tagai i le 3 Nifae 27:19–20).
Tu’ugalāmepa: E faamu e lamepa e fitu le suauu olive lelei, e maua ai le malamalama i le nofoaga paia (tagai i le Levitiko 24:2–4). E mafai ona faamanatu mai e lenei mea ia i tatou le malamalama o Keriso ma le Agaga Paia, o puna ia o le malamalama faaleagaga.
Laoai o le Areto: E sefululua potoi areto e le faafefeteina sa tuu i luga o le laoai o le areto i Sapati taitasi, o se upu o lona uiga o le “areto e laulau i luma [o Ieova]” i le FaaEperu (tagai i le Esoto 25:30). Sa taumafaina potoi i totonu o le mea paia i Sapati uma e fai ma “feagaiga e faavavau” (tagai i le Levitiko 24:5–9).
Fata Faitaulaga o Mea Manogi: E faamu e ositaulaga mea manogi i taeao ma po taitasi i luga o se fata faitaulaga e tu i luma o le veli. O le asu e alu a’e i luga e mafai ona faatusa i tatalo e fai a’e i le lagi (tagai i le Faaaliga 5:8).
Veli: Sa ulufale atu le faitaulaga sili i le Paia o Paia e ui atu i se veli. O Kerupi, po o agelu, sa mamanuina i luga o le veli (tagai i le Esoto 26:31–33; MF&F 132:19). E mafai ona faamanatu mai e le veli ia i tatou a o vavaeeseina ai nei i tatou mai le afioaga o le Atua i se veli, o le Faitaulaga Silisili ese—o Iesu Keriso—e mafai ona vavaeina le veli.
Paia o Paia: Sa ulufale atu le faitaulaga sili i lenei vaega sili ona paia o le fale fetafai e faatasi i le tausaga i le Aso o le Togiola. O le Paia o Paia ua fai ma faatusa o le afioaga o le Atua ma sa i ai le atolaau o le feagaiga, le pupuni lea sa ta’ua o le nofoa o le alofa. “Ta te fetaiai ma [oe] i lea mea,” sa fetalai atu ai le Alii ia Mose, “ma ou tautala atu ia te oe” (Esoto 25:22; tagai foi Esoto 29:43; 30:36).2